كومپانيانىڭ مالىمەتىنشە، تەحنولوگيا تىركەلۋ كەزىندە كامەلەتكە تولعانىن كورسەتەتىن تۋعان كۇنىن جازعانىنا قاراماستان، جاس ءوسپىرىم قولدانۋشىلاردى انىقتاي الادى.
جۇيە جاس ءوسپىرىم دەپ تانىعان اككاۋنتتار اۆتوماتتى تۇردە قوسىمشا شەكتەۋلەرى بار Teen Accounts ارنايى رەجيمىنە اۋىستىرىلادى.
اتاپ ايتقاندا، مۇنداي اككاۋنتتاردا بەيتانىس ادامدارمەن بايلانىسۋعا، بەلگىلى ءبىر كونتەنتتى كورۋگە جانە الەۋمەتتىك جەلىدە وتكىزەتىن ۋاقىتقا شەكتەۋلەر قويىلادى.
Meta Facebook الەۋمەتتىك جەلىسىندە دە جاستى انىقتاۋ تەحنولوگياسىن ەنگىزۋدى جالعاستىرىپ جاتىر. كومپانيا جىل سوڭىنا دەيىن Threads پلاتفورماسىندا دا وسىنداي جۇيەنى بۇكىل الەم بويىنشا ىسكە قوسۋدى جوسپارلاپ وتىر.
قاۋىپسىزدىك شارالارىن كەڭەيتۋ Meta كومپانياسىنىڭ ا ق ش- تىڭ 52 شتاتى، اۋماعى مەن كولۋمبيا وكرۋگىنىڭ باس پروكۋرورلارىمەن جاساسقان كەلىسىمىنە بايلانىستى. قۇجات كامەلەتكە تولماعان قولدانۋشىلاردى، سونىڭ ىشىندە 13 جاسقا تولماعان بالالاردى انىقتاۋ تەتىكتەرىن جەتىلدىرۋگە باعىتتالعان.
قاراشا ايىندا ا ق ش- تاعى جاسوسپىرىمدەردىڭ اتا- انالارى Instagram-نان قولدانىستاعى قورعانىس شارالارى جانە تىركەلۋ كەزىندە شىنايى جاستى كورسەتۋ قاجەتتىگى تۋرالى حابارلاما الا باستايدى.
سونىمەن قاتار اۋستراليادا Meta Apple ۇسىناتىن قولدانۋشىلاردىڭ جاس ساناتتارى تۋرالى اقپاراتتى قوسىمشا تەكسەرۋ قۇرالى رەتىندە پايدالانا باستادى.
كومپانيا TikTok پەن YouTube پلاتفورمالارىن دا كامەلەتكە تولماعانداردى قورعاۋدىڭ وسىنداي تەتىكتەرىن ەنگىزۋگە شاقىردى.
حابارلامادا ايتىلعانداي، تامىزدا جاريالانعان كەلىسىم اياسىندا Meta جاس قولدانۋشىلارعا ارنالعان قوسىمشا شەكتەۋلەر ەنگىزۋگە مىندەتتەمە العان. ولاردىڭ قاتارىندا الەۋمەتتىك جەلىنى كۇندەلىكتى پايدالانۋ ۋاقىتىنا ليميت قويۋ، تۇنگى ۋاقىتتا قولدانۋدى شەكتەۋ، مەكتەپ ساباقتارى كەزىندە حابارلامالاردى ءوشىرۋ جانە اتا-انالىق باقىلاۋ مۇمكىندىكتەرىن كەڭەيتۋ بار.
ايتا كەتەيىك، بۇعان دەيىن ا ق ش- تىڭ نيۋ-مەكسيكو شتاتىنىڭ سوتى Meta Platforms كومپانياسىن Facebook قولدانۋشىلارىنا جەكە دەرەكتەردى قورعاۋ ماسەلەسىندە جاڭىلىستىرعانى ءۇشىن 25 ميلليارد دوللار تولەۋگە مىندەتتەگەن ەدى.