Instagram دا كوپتەن كۇتكەن فۋنكتسيا پايدا بولدى

استانا. قازاقپارات - Instagram الەۋمەتتىك جەلىسى جاريالانعان Stories جازبالارىنا 15 مينۋت ىشىندە وزگەرىس ەنگىزۋگە مۇمكىندىك بەرەتىن جاڭا فۋنكتسيانى ىسكە قوستى.

Фото: petapixel.com

ەندى جاريالانعان Stories جازبالارىنداعى ءماتىندى، مۋزىكانى، ستيكەرلەر مەن سۋرەتتەردى 15 مينۋت ىشىندە وڭدەۋگە بولادى. بۇل رەتتە قارالىم سانى، لۇپىلدەر مەن جاۋاپتار ساقتالادى.

بۇل تۋرالى Instagram پلاتفورماسىنىڭ باسشىسى ادام موسسەري الەۋمەتتىك جەلىدەگى پاراقشاسىندا حابارلادى.

جاريالانعان Stories جازباسىن وڭدەۋ ءۇشىن ەكراننىڭ تومەنگى وڭ جاق بۇرىشىنداعى «تاعى» باتىرماسىن باسىپ، «Stories ءتى وڭدەۋ» تارماعىن تاڭداۋ قاجەت. سودان كەيىن قاجەتتى وزگەرىستەردى ەنگىزىپ، ساقتاۋعا بولادى.

بۇعان دەيىن Stories جازباسىن ءوشىرىپ، قايتا جاريالاعان كەزدە قارالىم، ءلۇپىل جانە جاۋاپ سانى ساقتالمايتىن. سونىمەن قاتار بىرنەشە Stories قاتارىنان جاريالانسا، ولاردىڭ باستاپقى رەتى وزگەرەتىن.

- كوپتەگەن پايدالانۋشى بۇل فۋنكتسيانى كوپتەن بەرى سۇراپ كەلەدى. سوندىقتان ونى ىسكە قوسقانىمىزعا قۋانىشتىمىن، - دەدى موسسەري.

Stories فۋنكتسياسىن وڭدەۋ مۇمكىندىگىنەن بولەك، Instagram بۇل بولىمدەگى وزگە دە قۇرالدارىن جاڭارتىپ جاتىر. اتاپ ايتقاندا، جاڭا قارىپتەر، ستيكەرلەردىڭ ءتۇرلى تۇستەرى مەن پىشىندەرى قوسىلادى. ولاردى پايدالانۋشىلار وڭاي تابۋى ءۇشىن جەكە توپتارعا توپتاستىرادى.

سونداي-اق بىرنەشە فوتوسۋرەتتى تاڭداۋ تەتىگى جەتىلدىرىلىپ، فوندى بەزەندىرۋدىڭ جاڭا ۇلگىلەرى ۇسىنىلادى. ولاردىڭ ىشىندە بۇلىڭعىرلاۋ اسەرى، ءتۇرلى تۇستەر مەن گراديەنتتەر بار.

ەسكە سالا كەتەيىك، بۇعان دەيىن Meta كومپانياسى Instagram قولدانۋشىلارىنىڭ جاسىن جاساندى ينتەللەكت كومەگىمەن انىقتاۋ تەحنولوگياسىن بۇكىل الەمدە كەڭەيتەتىنىن جاريالاعان بولاتىن.