ICAO باسشىسى قازاقستاندا ازاماتتىق اۆياتسيانى دامىتۋ جۇمىستارىنا وڭ باعا بەردى
استانا. KAZINFORM - قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ حالىقارالىق ازاماتتىق اۆياتسيا ۇيىمى (ICAO) كەڭەسىنىڭ پرەزيدەنتى سالۆاتورە شاككيتانومەن كەزدەستى، دەپ حابارلايدى ۇكىمەتتىڭ باسپا ءسوز قىزمەتى.
ولار ەلىمىزدىڭ اۋە كولىگىن الەمدىك ستاندارتتارعا سايكەس دامىتۋ سالاسىنداعى ىنتىماقتاستىق ماسەلەلەرىن تالقىلادى.
پرەمەر-مينيستر ولجاس بەكتەنوۆ مەملەكەت باسشىسى قاسىم-جومارت توقايەۆتىڭ ازاماتتىق اۆياتسيانى دامىتۋعا جانە اۋە كولىگىنىڭ جولاۋشىلاردىڭ بارلىق ساناتىنا قولجەتىمدى بولۋىنا كوپ كوڭىل بولەتىنىن اتاپ ءوتتى. جاڭا اۋەجايلار مەن اۋەايلاقتاردى سالۋ جانە جۇمىس ىستەپ تۇرعان اۋەجايلاردى جاڭعىرتۋ اسا ماڭىزدى.
قازاقستاندا جۇرگىزىلگەن قۇرىلىمدىق جانە زاڭنامالىق رەفورمالار سالانى بريتاندىق مودەل بويىنشا دامىتۋ ءۇشىن جاعداي جاسادى. ق ر اۆياتسيا سالاسىنىڭ ICAO ستاندارتتارىنا سايكەستىك دەڭگەيى 2009-جىلعى 47 پايىزدان بيىل 82 پايىزعا دەيىن ءوستى، بۇل پولشا، چەحيا، دانيا سياقتى جانە تاعى دا باسقا ەۋروپا مەملەكەتتەرىنىڭ كورسەتكىشتەرىمەن سالىستىرىلادى. بۇل ەۋروپالىق وداق ەلدەرىنە ۇشۋدى كەڭەيتۋگە مۇمكىندىك بەردى.
«ءبىز حالىقارالىق ازاماتتىق اۆياتسيا ۇيىمىمەن ءوزارا ءىس-قيمىلعا تەرەڭ ءمان بەرەمىز جانە ەكىجاقتى ىنتىماقتاستىعىمىزدى اۆياتسيا سالاسىن دامىتۋدى قامتاماسىز ەتۋدەگى ستراتەگيالىق باسىمدىق رەتىندە قاراستىرامىز»، - دەپ اتاپ ءوتتى ولجاس بەكتەنوۆ.
ءوز كەزەگىندە، حالىقارالىق ازاماتتىق اۆياتسيا ۇيىمى كەڭەسىنىڭ پرەزيدەنتى سالۆاتورە شاككيتانو قازاقستاندا ازاماتتىق اۆياتسيانى دامىتۋ بويىنشا جۇرگىزىلگەن جۇمىستارعا وڭ باعا بەرىپ، ق ر- مەن ىنتىماقتاستىقتى ودان ءارى نىعايتۋعا مۇددەلى ەكەنىن ءبىلدىردى.
«قازاقستاندا سوڭعى بىرنەشە جىلدا اۆياتسيا سەكتورىندا ايتارلىقتاي ىلگەرىلەۋ بايقالادى. جۇيە قالىپتى جۇمىس ىستەيدى، ەلدىڭ كورسەتكىشتەرى ورتاشا جاھاندىق كورسەتكىشتەن جوعارى. ءبىز ەلدىڭ اۆياتسيا سالاسىن ودان ءارى دامىتۋعا دايىنبىز. ICAO باسىمدىقتارىنىڭ ءبىرى - تۇراقتى دامۋ ماقساتتارى كونتەكستىندە كولىكتى دامىتۋدى قولداۋ. شىعارىندىلاردىڭ نولدىك دەڭگەيىنە جەتۋ ءۇشىن ءبىز تۇراقتى «جاسىل» وتىندى كوبىرەك پايدالانۋىمىز كەرەك. وسى باعىتتا بىرلەسىپ جۇمىس ىستەۋگە دايىنبىز»، - دەپ اتاپ ءوتتى سالۆاتورە شاككيتانو.
كەزدەسۋ قورىتىندىسى بويىنشا تاراپتار سەرىكتەستىك بايلانىستاردى جان-جاقتى دامىتۋ جانە تەرەڭدەتۋ نيەتتەرىن راستادى.
وسىعان دەيىن ەلىمىزدە ازاماتتىق ۇشقىشسىز اۆياتسيانى دامىتۋدىڭ تۇجىرىمداماسى بەكىتىلگەنى تۋرالى جازدىق.