حەزبوللا يزرايلدىڭ سولتۇستىگىنە 55 زىمىران ۇشىردى

استانا. KAZINFORM - ليۆاننىڭ حەزبوللا توبى سەيسەنبى كۇنى تاڭەرتەڭ يزرايل ارمياسى شەكارالاس ايماقتان بەكاا القابىنا جاساعان قارقىندى سوققىلاردان كەيىن يزرايلدەگى اسكەري نىساندارعا جاپپاي زىمىران شابۋىلىن جاسادى.

«حەزبوللا» سەيسەنبى كۇنى تاڭەرتەڭ ليۆاننان يزرايلدىڭ سولتۇستىگىنە 40 زىمىران اتقىلاعان. كەيىنىرەك 15 زىمىراننان تۇراتىن ەكىنشى شابۋىل جاسادى.

يزرايل ارمياسى جوعارعى گاليلەيا مەن گولان كوگىندە «شامامەن 55» زىمىران ۇشىرعانىن تىركەگەنىن ايتىپ، ولاردىڭ كەيبىرىنىڭ قاعىپ تۇسىرىلگەنى، قالعاندارىنىڭ ادام شىعىنىنسىز اشىق اۋماقتارعا قۇلاعانى ايتىلدى. يزرايل اقپارات قۇرالدارىنىڭ حابارلاۋىنشا، جوعارعى گاليلەيا مەن گولان كوگىندە زىمىران شابۋىلىن ەسكەرتەتىن اۆتوماتتى ەسكەرتۋ سيرەنالارى ەستىلگەن.

«ۇشىرۋلاردان كەيىن كوپ ۇزاماي اسكەري-اۋە كۇشتەرىنىڭ ۇشاقتارى سناريادتار اتىلعان قوندىرعىلاردىڭ بىرىنە شابۋىل جاسادى»، - دەلىنگەن ارميا مالىمدەمەسىندە.

يزرايل اقپارات قۇرالدارى زىمىرانداردىڭ قۇلاۋى سالدارىنان اشىق اۋماقتاردا اۋقىمدى ورمان ءورتى شىققانىن حابارلادى. حەزبوللا يزرايلدىڭ ەكى اسكەري بازاسىنا ونداعان زىمىران ۇشىرعانىن مالىمدەدى. ول گولان جوتاسى نافاح كازارماسىنداعى 210-شى ديۆيزياسىنىڭ شتاب- پاتەرىن جانە ياردەن كازارماسىنداعى 210-ديۆيزيانىڭ ارتيللەريالىق جانە بروندى پولكتەرىنىڭ شتاب-پاتەرىن نىساناعا العانىن ايتتى.

توپ مالىمدەمەسىندە بۇل شابۋىلدىڭ يزرايلدىڭ بەكاا ايماعىنداعى تۇنگى شابۋىلدارىنا جاۋاپ بولعانى باسا ايتىلدى. وسىلايشا، ءبىر كۇن بۇرىن يزرايل اسكەريلەرى ليۆاننىڭ شىعىسىنداعى بەكاا ايماعىنداعى حەزبوللاعا تيەسىلى قارۋ قويمالارىنا شابۋىل جاسادى. بۇل ليۆاننىڭ شىعىسىنداعى حەزبوللانىڭ ىقپالى بار ايماق. ول يزرايل شەكاراسىنان شامامەن 100 شاقىرىم جەردە ورنالاسقان. ليۆاننىڭ دەنساۋلىق ساقتاۋ مينيسترلىگى توعىز ادامنىڭ جاراقات العانىن ايتتى. ولاردىڭ التاۋى ليۆاندىق جانە ۇشەۋى سيريالىق ازامات.

ليۆاننىڭ وڭتۇستىگىندەگى دەير-كانۋن ايماعىنا جاسالعان تاعى ءبىر اۋە شابۋىلى كەزىندە قوزعالىستىڭ يارين ايماعىنداعى زىمىران بولىمشەسىندە ماڭىزدى ءرول اتقارعان حەزبوللا سودىرى حۋسەين الي حۋسەين قازا تاپتى.

اۆتور
ەركەجان سماعۇلوۆا