«حەزبوللا» حاماس جەتەكشىسى ولتىرىلگەننەن كەيىن يزرايلمەن سوعىستى كۇشەيتەتىنىن مالىمدەدى

استانا. KAZINFORM - ليۆاندىق «حەزبوللا» جۇما كۇنى يزرايلگە قارسى سوعىس جاڭا شيەلەنىسۋ كەزەڭىنە ءوتىپ جاتقانىن مالىمدەدى. ال يران حاماس جەتەكشىسى ياحيا سينۆار ولتىرىلگەننەن كەيىن «قارسىلىق رۋحى كۇشەيەتىنىن» ايتتى.

«حەزبوللا» يزرايلمەن قاقتىعىس جاڭا شيەلەنىسۋ كەزەڭىنە ءوتىپ جاتقانىن جاريالاپ، شيەلەنىستىڭ سيپاتى الداعى كۇندەرى بەلگىلى بولاتىندىعىن ايتتى. يزرايل اسكەرىنىڭ مالىمەتىنشە، جۇما كۇنى تاڭەرتەڭ ليۆاننىڭ وڭتۇستىگىنەن يزرايلدىڭ سولتۇستىگىنە قاراي شامامەن 15 زىمىران ۇشىرىلعان. جاعالاۋداعى اككو قالاسىندا جانە يزرايلدىڭ سولتۇستىك-باتىسىنداعى ەلدى مەكەندەردە زىمىران سيرەنالارى ىسكە قوسىلدى. اسكەريلەردىڭ ايتۋىنشا، زىمىرانداردىڭ ءبىر بولىگى قاعىپ ءتۇسىرىلدى، ال قالعاندارى يزرايلگە قوندى.

2023 -جىلدىڭ 7-قازانىندا گازا سەكتورىنداعى سوعىستى باستاعان شابۋىلدىڭ ۇيىمداستىرۋشىسى سينۆار سارسەنبى كۇنى پالەستينا انكلاۆىندا يزرايل اسكەرلەرىنىڭ وپەراتسياسىندا قازا تاپتى. بۇل ءبىر جىلعا سوزىلعان سوعىستاعى ەلەۋلى وقيعا بولدى.

باتىس جەتەكشىلەرى ونىڭ ءولىمى قاقتىعىستى توقتاتۋعا مۇمكىندىك بەردى دەسە، يزرايل پرەمەر-ءمينيسترى بينيامين نەتانياحۋ سوعىس حاماس سودىرلارى كەپىلگە العاندار قايتارىلعانشا جالعاساتىنىن ايتتى.

«بۇگىن ءبىز ەسەپتى تەڭەستىردىك. بۇگىن زۇلىمدىققا سوققى بەرىلدى، ءبىراق ءبىزدىڭ مىندەتىمىز ءالى اياقتالعان جوق»، - دەدى نەتانياحۋ بەيسەنبى كۇنى سينۆاردىڭ قازاسى راستالعاننان كەيىن جازىلعان ۆيدەو حابارلاماسىندا.

شىلدە ايىندا تەگەراندا ساياسي كوشباسشى يسمايل حانيا ولتىرىلگەننەن كەيىن حاماس ۇيىمىنىڭ جوعارعى جەتەكشىسى اتانعان سينۆار سوڭعى جيىرما جىلدا گازا تۇبىندە حاماس سالعان تۋننەل لابيرينتتە جاسىرىندى دەگەن اقپارات تارادى.

ول سارسەنبى كۇنى گازانىڭ وڭتۇستىگىندەگى اتىس كەزىندە ونىڭ سينۆار ەكەنىن بىلمەگەن يزرايلدىك ساربازداردىڭ قولىنان قازا تاپتى، دەپ حابارلادى يزرايل شەنەۋنىكتەرى.

اۆتور

ەركەجان سماعۇلوۆا