حيزبوللاعا پەيدجەرلەردى جەتكىزگەن كومپانيانىڭ يەسى جۇمباق جاعدايدا جوعالىپ كەتتى
استانا. KAZINFORM - «ليۆانعا پەيدجەرلەردى جەتكىزۋمەن اينالىسادى» دەلىنگەن كومپانيانىڭ يەسى، ءۇندىستاندىق 39 جاستاعى نورۆەگيا ازاماتى رينسون يوسي جارىلىستاردان كەيىن جوعالىپ كەتتى، دەپ حابارلادى بريتاندىق Daily Mail گازەتى.
بۇعان دەيىن تايۆاندىق پەيدجەر ءوندىرۋشىسى Gold Apollo ليۆاندا جارىلعان پەيدجەرلەر پارتياسىن بۋداپەشتتىڭ BAC Consulting Kft كومپانياسى شىعارعانىن ايتقان. ماجارستان ۇكىمەتى كومپانيانىڭ دەلدال ەكەنىن جانە پەيدجەرلەردىڭ ەشقاشان ەلدە بولماعانىن ايتتى. كەلىسىمگە بولگاريالىق Norta Global Ltd كومپانياسى دا قاتىسقانى حابارلاندى.
باسىلىمنىڭ مالىمەتىنشە، Norta Global كومپانياسىنىڭ يەسى Rinson Xose بولىپ تىركەلگەن.
يوسي سەيسەنبى كۇنى الدىن الا جوسپارلانعان ءىس ساپارعا كەتكەن دەپ ايتىلۋدا. الايدا ونىڭ نەگىزگى جۇمىس بەرۋشىسى، نورۆەگيالىق NHST مەديا كونگلومەراتىنىڭ باسشىلىعى سودان بەرى ونىمەن بايلانىسا الماعاندىقتان سارسەنبى كۇنى كەشكە نورۆەگيانىڭ قاۋىپسىزدىك قىزمەتىنە حابارلاسقان.
وسلو پوليتسياسى كەلەسى كۇنى «اقپاراتقا قاتىستى الدىن الا تەرگەۋدى باستاعانىن» حابارلادى.
ايتا كەتەيىك، 17-جانە 18-قىركۇيەكتە ليۆاننىڭ ءارتۇرلى ايماقتارىندا بايلانىس قۇرىلعىلارى، سونىڭ ىشىندە پەيدجەرلەر مەن راتسيالار جارىلعان. مىڭداعان قۇرىلعىنىڭ ءبىر ۋاقىتتا جارىلۋىنا نە سەبەپ بولعانى ازىرگە بەلگىسىز. حيزبوللا مەن ليۆان رەسميلەرى وقيعا ءۇشىن ءيزرايلدى ايىپتادى. يزرايل شەنەۋنىكتەرى ازىرگە ولاردىڭ قاتىسى بارىن راستاعان نەمەسە جوققا شىعارعان جوق.