حيرۋرگتەر فورۋمىندا ەل دارىگەرلەرىنىڭ وزىق تاجىريبەسى تانىستىرىلادى - مىڭجىلقى بەردىقوجايەۆ
استانا. KAZINFORM - بيىل-قىركۇيەك ايىندا ق ر پ ءى ب مەديتسينالىق ورتالىعى اۋرۋحاناسىنىڭ ۇيىمداستىرۋىمەن ەلوردادا ەكى ماڭىزدى ءىس-شارا وتەدى. 19-20-قىركۇيەكتە «مەديتسيناداعى ساپا مەن يننوۆاتسيانىڭ الەمدىك ستاندارتتارى» سالاارالىق كونگرەسى، ال 21-22-قىركۇيەكتە «زاماناۋي حيرۋرگياداعى جوعارى تەحنولوگيالار» حالىقارالىق عىلىمي-پراكتيكالىق فورۋمى بولادى. جيىنعا اقش، ازيا، ەۋروپا ەلدەرىنىڭ تانىمال حيرۋرگتەرى كەلىپ، وزدەرىنىڭ مەديتسيناداعى وزىق تاجىريبەلەرىن تانىستىرادى. بۇل فورۋمداردىڭ ماڭىزى جايىندا ق ر پ ءى ب مەدورتالىعى اۋرۋحاناسى ديرەكتورىنىڭ حيرۋرگيا جونىندەگى ورىنباسارى مىڭجىلقى بەردىقوجايەۆ ەگجەي- تەگجەيلى بايانداپ بەردى.
- ەلىمىزدىڭ مەديتسينا سالاسىنىڭ جەتىستىكتەرى مەن الەمدىك تاجىريبەنى كەڭىنەن تانىستىرۋ ماقساتىندا ماڭىزى جاعىنان اۋقىمدى فورۋم ۇيىمداستىرىپ جاتىرسىزدار. وسى جيىن كەزىندە قانداي تاقىرىپتار قامتىلادى؟
- 19-22-قىركۇيەك ارالىعىندا تەراپيا جانە حيرۋرگيا باعىتىندا ەكى ماڭىزدى كونفەرەنتسيا وتكەلى جاتىر. بۇل - قازاقستان رەسپۋبليكاسى پرەزيدەنتى ءىس باسقارماسى جۇيەسىندەگى مەديتسينا قىزمەتىنىڭ فورۋمى. ناقتىراق ايتساق، 19-20-قىركۇيەكتە تەراپيەۆتەردىڭ كونفرەنتسياسىن وتكىزبەكپىز. ونىڭ ماقساتى - تاجىريبە الماسۋ، پاتسيەنتتەردىڭ قاۋىپسىزدىگى سالاسىنداعى وزىق عىلىمي جەتىستىكتەردى قولدانىسقا ەنگىزۋ. كونگرەسس اياسىندا ينفەكتسيالاردىڭ تارالۋىنا جول بەرمەۋ، باقىلاۋ جانە ەمدەۋ، سونداي-اق اۋرۋحانالاردا ينفەكتسيالىق باقىلاۋ قىزمەتىن ۇيىمداستىرۋ ماسەلەلەرى كەڭىنەن تالقىلانادى.
ال 21-قىركۇيەكتە حيرۋرگياداعى جوعارى تەحنولوگيالارعا ارنالعان فورۋم باستالادى. بۇل جيىندا حيرۋرگيانىڭ بارلىق باعىتىن قامتيمىز، ياعني ەرەسەكتەر مەن بالالاردى ەمدەۋ ماسەلەلەرى بويىنشا بىرنەشە بايانداما جاسالادى. اتاپ ايتساق، جالپى حيرۋرگيا، ۋرولوگيا، پروكتولوگيا، گينەكولوگيا، كارديوحيرۋرگيا، نەيروحيرۋرگيا، قانتامىر حيرۋرگياسى، ينتەرۆەنتسيالىق حيرۋرگيا، اريتمولوگيا، وتورينولارينگولوگيا، وفتالمولوگيا، ونكولوگيا سياقتى بارلىق باعىتتا قارالادى.
ماسەلەن، فورۋمدا نەيروينتەرۆەنتسيا اتتى ءبىر سەكتسيا بولادى. بۇل تاقىرىپتاعى جيىن قازاقستان اۋماعىندا وسىمەن ءتورتىنشى رەت ۇيىمداستىرىلىپ كەلەدى. 2017 -جىلدان بەرى ءۇش رەت الماتىدا وتسە، بيىل ەلوردادا تالقىلانادى. بۇل سەكتسياداعى پىكىر الماسۋ اعىلشىن تىلىندە بولادى، سەبەبى ا ق ش پەن ەۋروپا ەلدەرىنەن، ءۇندىستاننان، ازيا مەملەكەتتەرىنەن كوپتەگەن سپيكەر كەلەدى. جالپى، 70-تەن استام شەتەلدىك پروفەسسور فورۋمعا قاتىسىپ، بايانداما جاسايدى.
بۇدان بولەك، نەيروحيرۋرگيا سالاسىندا پىكىر الماسۋعا ارنالعان نەيروكۋرس سەكتسياسى ۇيىمداستىرىلادى. وسى تاقىرىپتاعى جيىندى توعىزىنشى رەت، ياعني 2016 -جىلدان بەرى ءداستۇرلى تۇردە وتكىزىپ كەلەمىز. بۇعان كورشى ەلدەردەن جانە الىس شەتەلدەن دارىگەرلەر شاقىرىلدى.
جالپى، فورۋم كەزىندە «ەندوسكوپيا»، «وتورينولارينگولوگيا، وفتالمولوگيا»، «ورتوپەديا»، «ۋرولوگيا”، «كارديوحيرۋرگيا» سەكتسيالارى ەسكەرىلگەن. حيرۋرگيالىق باعىتتا 1000-نان استام مامان كونفەرەنتسياعا تىركەلدى. بۇل جيىندا قاۋىپسىز حيرۋرگيا ماسەلەلەرىن تالقىلاۋ ءۇشىن ساراپشىلىق ديالوگ الاڭى، دوڭگەلەك ۇستەل وتىرىستارى بولادى. وسى كونفەرەنتسيادا مەيىربيكەلەر مەن جاس عالىمدارعا ارنالعان جيىن وتەدى. ەلىمىزدەگى جاس دارىگەرلەر سول جەردە بايانداما جاسايدى.
- بۇل فورۋم ەلىمىز ءۇشىن قانداي مۇمكىندىك بەرەدى؟
- كونفەرەنتسيا بارىسىندا ماستەر-كلاسس وتەدى. بۇل رەتتە، الەم بويىنشا العاش قولدانىلىپ جاتقان قۇرال- جابدىقتار تانىستىرىلماق. اتاپ ايتقاندا، قازاقستان جاڭا تەحنولوگيالاردى ەنگىزۋگە ەرەكشە ءمان بەرىپ وتىر. باسقا ەلدەرگە قاراعاندا، بىزدە جاڭا تەحنولوگيالاردى تىركەۋ پروتسەسى جەڭىلىرەك. سونىمەن قاتار حيرۋرگتەردىڭ تاجىريبەسى جوعارى دەڭگەيدە بولعاندىقتان، ءبىزدىڭ ماماندار زاماناۋي تەحنولوگيالاردى كەڭىنەن پايدالانىپ كەلەدى. سوندىقتان الداعى كۇندەرى وتەتىن كونفەرەنتسيالار مەديتسينا سالاسىنداعى قازاقستاننىڭ ماڭىزدى ورنىن ايرىقشا تانىتا الادى دەپ سانايمىن. شەتەلدەن كەلەتىن سپيكەرلەر دە ءوز سالاسىندا وتە بەدەلدى ادامدار جانە ولار ءبىزدىڭ مۇمكىندىگىمىزدى جاقسى بىلەدى. ولار ۇنەمى ءوز ەلدەرىندە قازاقستاننىڭ حيرۋرگتەرى جايىندا جاقسى پىكىرىن ايتىپ جۇرگەنىن بايقادىق. وسىنىڭ بارلىعى مەديتسينالىق ءتۋريزمدى دامىتۋ باعىتىندا ءبىزدىڭ تاجىريبەمىزدى كەڭىنەن تانىتۋعا جول اشادى.
ايتا كەتەيىك، ءبىزدىڭ اۋرۋحانانىڭ دارىگەرلەرى جىلىنا بىرنەشە رەت شەتەلدەگى فورۋمدارعا بارىپ تۇرادى.
- فورۋم بارىسىندا ەلىمىزدىڭ ماماندارى ەرەكشە وپەراتسيالار جاساي ما؟
- ارينە، ق ر پ ءى ب مەديتسينالىق ورتالىعى اۋرۋحاناسى مەن ۇلتتىق گوسپيتالدە قولدانىلاتىن جوعارى تەحنولوگيالار، يننوۆاتسيالار تانىستىرىلادى. فورۋم كەزىندە ءبىزدىڭ اۋرۋحانادا وپەراتسيا جاساپ، ونى ونلاين فورماتتا كورسەتەمىز. سول كەزدە قولدانىلاتىن جاڭا تەحنولوگيالار باسقا دا ارىپتەستەرىمىز ءۇشىن پايدالى بولادى دەپ سانايمىز. ونلاين فورماتتاعى وپەراتسيالاردى كورسەتۋ تاجىريبەسىن ا ق ش-تا، فرانسيادا، تۇركيادا جانە قىتايدا وتەتىن كونفەرەنتسيالاردا بايقاپ ءجۇرمىز.
- الداعى ۋاقىتتا اۋرۋحانادا ەرەكشە وپەراتسيالاردى ەنگىزۋ جوسپاردا بار ما؟
- كەيىنگى كەزدە ەنگىزىلگەن ەرەكشەلىككە توقتالسام، ەپيلەپسيانىڭ اۋىر تۇرىنە شالدىققان ناۋقاستارعا كۇردەلى وپەراتسيالار جاسالىپ كەلەدى. بۇرىن وسى وپەراتسيانى جاساۋ قيىن بولعان ەدى. قازىر ستەرەوتاكسيستىك ادىسپەن، سونداي-اق روبوتتى پايدالانۋ ارقىلى ميعا ەلەكترود قويىپ، دياگنوز ناقتىلانادى. وسى ءتاسىل ارقىلى بىرنەشە ناۋقاسقا وپەراتسيا جاسادىق. ولار تولىقتاي ەپيلەپسيادان جازىلۋ مۇمكىندىگىن الدى.
بۇدان بولەك، جۇلىننان زاقىم العان ادامدار اياعىن باسا الماي قالاتىنى بەلگىلى. قازىر ءتيىستى چيپتەر ارقىلى ادامداردىڭ اياعىن قيمىلداتۋ زەرتتەۋلەرى جالعاسىپ جاتىر. بۇل تەحنولوگيالار تاجىريبەگە ەنگىزىلسە، ونى ەلىمىزدە پايدالانۋدى جوسپارلاپ وتىرمىز.
ەكىنشىدەن، ميدىڭ تامىرلارىنا قويىلاتىن چيپتەر بار. وسى چيپتەردىڭ مۇمكىندىگىن پايدالانىپ، ناۋقاستاردى ەمدەۋ باعىتى عىلىمي تۇرعىدا زەرتتەلىپ وتىر.
تاعى ءبىر جاڭا باعىت بار. روبوت حيرۋرگياسىن قاشىقتان پايدالانۋدى ەنگىزۋ جوسپارلانعان. قازىر ەلىمىزدە بار روبوتتار ءبىر قالادان ەكىنشى قالادا وپەراتسيا جاساۋعا مۇمكىندىك بەرمەيدى. قاشىقتان پايدالانا الاتىن روبوتتاردى قىتايدا شىعارىپ جاتىر. وسى روبوتتاردىڭ مۇمكىندىگىمەن شەتەلدىك دارىگەرلەرمەن بىرلەسە وپەراتسيا جاساۋ جوسپارىمىزدا بار.
اۆتور
رۋسلان عابباسوۆ