حيدجابقا بايلانىستى مەكتەپكە بارماي جۇرگەن وقۋشىلار بار ما - مينيستر جاۋابى

 وقۋ-اعارتۋ ءمينيسترى عاني بەيسەمبايەۆ حيدجاب كيۋىنە بايلانىستى ساباققا بارماي جۇرگەن وقۋشى قىزدار تۋرالى ساۋالعا جاۋاپ بەردى، دەپ حابارلايدى Kazinform اگەنتتىگى. 

بۇگىن ۇكىمەت وتىرىسىنان كەيىنگى بريفينگتە ب ا ق وكىلدەرى مينيستردەن «اتىراۋ وبلىسىندا 150 قىزدىڭ مەكتەپكە بارماي جۇرگەنى تۋرالى ناقتى اقپارات بار. ويتكەنى، ولار حيدجابپەن جۇرەدى، كىرگىزبەيدى. وزگە وڭىرلەر بويىنشا اقپارات بار ما؟» دەپ سۇراعان ەدى.

عاني بەيسەمبايەۆ جاڭا وقۋ جىلى باستالعان كەزدە حيدجاپ كيگەن وقۋشى قىزداردىڭ سانى 150 دەن دە كوپ بولعانىن جاسىرعان جوق.

دەگەنمەن، ولاردىڭ اتا-اناسىمەن ءتۇسىندىرۋ جۇمىسى جۇرگىزىلگەنىن اتاپ ءوتتى.

«مەكتەپ بالالاردىڭ ساپالى ءبىلىم مەن تاربيە الۋعا ارنالعانىن جاقسى بىلەسىزدەر. سوندىقتان اتا-انالار ءتۇسىنىپ، قابىلداي باستادى. قازىرگى ۋاقىتتا بۇل ماسەلە شەشىلدى. مەندەگى اقپاراتقا سايكەس، باسقا وڭىرلەردە ورامال تاعاتىن وقۋشىلار جوق»، - دەدى مينيستر.

وسى رەتتە ب ا ق وكىلدەرى ەلىمىزدە مەكتەپكە حيدجابپەن بارىپ جۇرگەن ءبىر دە ءبىر وقۋشىنىڭ جوقتىعىن تاعى دا ناقتىلاپ سۇرادى.

«باسىندا پروبلەما بولدى. بۇگىندە ماسەلە تولىعىمەن شەشىلدى. اتا-انالار مەكتەپتىڭ ەڭ ءبىرىنشى مىندەتى - ساپالى ءبىلىم مەن تاربيە بەرۋ ەكەندىگىن تۇسىنە باستادى. ءبىر-ءبىرىن شاتاستىرىپ الماۋعا ءتيىسپىز»، - دەدى عاني بەيسەمبايەۆ.