حاربين قىسقى ازيا ويىندارىنا ءوتىنىش بەرگەن ەلدەر سانى رەكوردتىق كورسەتكىشكە جەتتى

بەيجىڭ. KAZINFORM - شينحۋا اگەنتتىگىنىڭ حابارلاۋىنشا، 2025-جىلى حاربين قالاسىندا وتەتىن ءدۇبىرلى دودا تاريحتا ەڭ كوپ ەل قاتىسقان قىسقى ازيادانىڭ ءبىرى بولماق.

قازىرگى ۋاقىتتا 34 ەل/ايماقتىڭ وليمپيادالىق كوميتەتتەرى حاربين قىسقى ازيا ويىندارىنا قاتىسۋعا ءوتىنىش بەرىپ ۇلگەردى.

ايتا كەتەرلىگى، 2017-جىلى جاپونيانىڭ ساپپورو قالاسىندا وتكەن قىسقى ازيا ويىندارىنا 32 ەل/ايماقتان 1147 سپورتشى باق سىناعان بولاتىن.

IX قىسقى ازيا ويىندارى 2025-جىلدىڭ 7-14-اقپانى ارالىعىندا حاربين قالاسىندا وتەدى. جارىستار اياسىندا سپورتشىلار 12 سپورت ءتۇرى بويىنشا 64 مەدال جيىنتىعىن ساراپقا سالادى.

اتالمىش قالا قىسقى ازيا ويىندارىن ەكىنشى مارتە وتكىزگەلى وتىر. بۇعان دەيىن، Ⅲ قىسقى ازيا ويىندارى 1996-جىلى وسى قالادا ءوتىپ، 17 ەل/ايماقتان كەلگەن 458 سپورتشى سىنعا تۇسكەن بولاتىن. قازاقستان قۇراماسى سول جىلى 14 التىن، 9 كۇمىس، 8 قولا (بارلىعى 31) جۇلدەمەن جالپى ەسەپتە جارىس قوجايىنىنان كەيىنگى 2-ورىننان كورىنگەن.

ەسكە سالا كەتەيىك، بۇعان دەيىن ۇ و ك وكىلدەرى حاربين قىسقى ازيا ويىندارىنا دايىندىق سەمينارىنا قاتىسقانىن جازعان ەدىك.