حاماس: يزرايل شابۋىلىنان كەيىن تۇتقىنداردى الماستىرۋ كەلىسسوزى توقتادى

استانا. KAZINFORM - حاماس قوزعالىسى يزرايلدى وتكەن اپتادا قاتار استاناسى دوحاداعى كەلىسسوز كەزىندە ءوز دەلەگاتسياسىنا شابۋىل جاسادى دەپ ايىپتاپ، يزرايلمەن تۇتقىنداردى اۋىستىرۋ كەلىسسوزىن توقتاتقانىن مالىمدەدى، دەپ حابارلايدى شينحۋا.

- ەگەر كەلىسسوزدەرگە جاۋاپتى دەلەگاتسياعا دەلدال ەلدىڭ وزىندە شابۋىل جاسالسا، وندا مۇنداي جاعدايدا كەلىسسوزدەر جالعاسۋى مۇمكىن ەمەس، - دەدى حاماس قوزعالىسىنىڭ جوعارى وكىلى تاحەر ان-نۋنۋ.

وتكەن سەيسەنبىدە يزرايل حاماس جەتەكشىلەرى ا ق ش قولداعان اتىستى توقتاتۋ ۇسىنىسىن تالقىلاۋ ءۇشىن پايدالانعان دوحاداعى تۇرعىن ۇيلەرگە اۋەدەن سوققى جاسادى.

حاماس- تىڭ جوعارى لاۋازىمدى شەنەۋنىگى حاليل ءال-حايا باستاعان دەلەگاتسيا امان قالدى، ءبىراق حاماس-تىڭ بەس مۇشەسى مەن قاتار قاۋىپسىزدىك قىزمەتكەرى قازا تاپتى، دەپ حابارلادى ۇيىم.

ت. ان-نۋنۋ يزرايل پرەمەر-ءمينيسترى بينيامين نەتانياحۋدى بىتىمگە دە، تۇتقىندارمەن الماسۋعا دا قول جەتكىزۋ ارەكەتتەرىنە كەدەرگى كەلتىردى دەپ ايىپتادى. ول يزرايلدىڭ گازاداعى تۇرعىن ۇيلەرگە سوققى بەرۋىنىڭ كۇشەيۋى ونداعى يزرايلدىك تۇتقىندارعا قاۋىپ ءتوندىرۋى مۇمكىن ەكەنىن ەسكەرتتى.

- جالعىز قيسىندى شەشىم - حالىقارالىق قاۋىمداستىقتىڭ وسى سوعىستى توقتاتۋ شەشىمىن قابىلداپ، جۇزەگە اسىرۋى، - دەدى ول.

ت. ان- نۋنۋ سونداي-اق ا ق ش مەملەكەتتىك حاتشىسى ماركو رۋبيونىڭ جەكسەنبى كۇنى يزرايلگە ساپارىنا تەرىس باعا بەرىپ، حاماس ءيزرايلدىڭ ۇستانىمىندا ەشقانداي وزگەرىس كۇتپەيدى دەپ مالىمدەدى.

يزرايل سوڭعى كۇندەرى گازا قالاسىنداعى تۇرعىن ۇيلەرگە اۋە سوققىلارىن ۇدەتتى. پالەستيناداعى دارىگەرلەردىڭ ايتۋىنشا، بۇل شابۋىلداردا ونداعان ادام قازا تاپتى. يزرايل بۇل ارەكەتتەرىن حاماس توبىنىڭ اسكەري بازالارى مەن سودىرلارىنا قارسى باعىتتالعان دەپ تۇسىندىرەدى. ال پالەستينالىقتار بولسا، شابۋىلدىڭ كوپ زاردابىن بەيبىت تۇرعىندار تارتىپ جاتقانىن ايتادى.

قاتار، مىسىر جانە ا ق ش گازاداعى سوڭعى سوعىس باستالعاننان بەرى ءبىتىم مەن تۇتقىنداردى ايىرباستاۋعا دەلدالدىق جاساپ كەلەدى، ءبىراق دوحاعا جاسالعان شابۋىل ىلگەرىلەۋ بولاشاعىنا كۇمان كەلتىردى.

حاماس قوزعالىسى يزرايلدىڭ قاتار استاناسى دوحاداعى كەلىسسوزدەر توبىنا جاساعان سوققىسىنا قاراماستان، اتىستى توقتاتۋ جونىندەگى كەلىسسوزدەرگە قاتىستى ۇستانىمى مەن تالاپتارىن وزگەرتپەيتىنىن مالىمدەدى.