حاماس پەن ف ا ت ح بەيجىڭدە تاتۋلاسۋ دەكلاراتسياسىنا قول قويدى

بەيجىڭ. KAZINFORM -  حاماس پەن ف ا ت ح الاۋىزدىقتى توقتاتۋ مەن بىرلىكتى نىعايتۋعا باعىتتالعان «بەيجىڭ دەكلاراتسياسىنا» قول قويدى.

قىتاي سىرتقى ىستەر مينيسترلىگى 23-شىلدەدە تاراتقان حابارعا قاراعاندا، قىتاي سىرتقى ىستەر ءمينيسترى ۋاڭ يدىڭ توراعالىعىمەن 14 پالەستينالىق فراكسيا وكىلدەرى بەيجىڭدە جينالىس وتكىزىپ، «پالەستينانىڭ ءبولىنۋىن توقتاتۋ جانە ۇلتتىق بىرلىكتى نىعايتۋ تۋرالى بەيجىڭ دەكلاراتسياسىنا» قول قويعان.

«بۇل - پالەستينانى ازات ەتۋ جولىنداعى ماڭىزدى جانە تاريحي ءسات»، - دەدى ۋاڭ ي.

فوتو: قىتاي سىرتقى ىستەر مينيسترلىگى

ۋاڭ ي قىتايدىڭ بۇكىل تاراپتاردىڭ بىتىمگە كەلۋ جولىنداعى تالپىنىسىن جوعارى باعالايتىنىن جانە بەيجىڭ ديالوگىنىڭ ءساتتى وتكەنىن ءسوز ەتىپ، بەيجىڭ دەكلاراتسياسىنا قول قويعانداردى قۇتتىقتادى.

ۋاڭ ي سونداي-اق دەكلاراتسياعا قول قويۋ ارقىلى قوس تاراپ ەلەۋلى كەلىسپەۋشىلىكتى شەشۋ جولىندا جاڭا قادام جاساعانىن ايتتى.

ونىڭ ايتۋىنشا، بەيجىڭ دەكلاراتسياسىندا «پالەستينانى ازات ەتۋ ۇيىمى» - بۇكىل پالەستينا حالقىنىڭ جالعىز زاڭدى وكىلى ەكەنى ناقتىلانعان.

حاماس پەن ف ا ت ح 17 جىلعا سوزىلعان ساياسي كەلىسپەۋشىلىگىن شەشۋ ءۇشىن وسى جىلدىڭ ءساۋىر ايىندا بەيجىڭدە كونسۋلتاتسيا وتكىزگەن.

سوڭعى جىلدارى قىتاي ۇزاق ۋاقىت بويى ا ق ش-تىڭ ۇستەمدىگىندە بولعان تاياۋ شىعىستا ءوزىنىڭ ديپلوماتيالىق ىقپالىن بەلسەندى تۇردە كورسەتىپ كەلەدى.

فوتو: قىتاي سىرتقى ىستەر مينيسترلىگى

ديپلوماتيالىق قارىم-قاتىناسى ۇزاق جىلدار بويى ۇزىلگەن يران مەن ساۋد ارابياسى اراسىنداعى وتكەن جىلعى بىتىمگەرشىلىك كەلىسىمىنەن كەيىن بيىل ولار پالەستينا ىشىلىك بىتىمگەرشىلىككە جاردەمدەسۋ جانە ايماقتاعى بىتىمگەرشىلىك دەلدال پوزيتسياسىن يەلەنۋ ءۇشىن تالپىنىسىن كۇشەيتتى.

اۆتور
مۇقتار مۇرات