حاماس اسكەرى پالەستينادا ەمەس، شەتەلدە دايىندالعان بولۋى مۇمكىن - تالعات قاليەۆ

 پالەستينا مەن يزرايل اراسىنداعى قان توگىلگەن قاقتىعىسقا قاتىستى پىكىر بىلدىرگەن قولدانبالى ەتنو- ساياسي زەرتتەۋلەر ينستيتۋتىنىڭ ديرەكتورى تالعات قاليەۆ شيەلەنىستىڭ نەمەن اياقتالاتىنى تۋرالى بولجام ايتتى، دەپ حابارلايدى Kazinform اگەنتتىگى.

تالعات قاليەۆ اۋەلى قالىپتاسقان جاعدايدىڭ سەبەبىنە توقتالدى. ونىڭ ايتۋىنشا، بۇل قاقتىعىسقا الەم ەلدەرىندە بولىپ جاتقان شيەلەنىستەر تۇرتكى بولعان.

«بۇعان رەسەي مەن ۋكراينا اراسىنداعى جاعداي دا ءبىراز اسەر ەتتى. كورىپ وتىرعانداي، ازەربايجان قاراباقتا سوعىس جاريالاپ، بۇكىل جەرىن قايتارىپ الدى. سونىمەن بىرگە، قىتاي مەن تايۆان اراسىنداعى ءسوز قايتادان كوتەرىلە باستادى. ول جاعدايلار دۇنيەجۇزىندەگى وسىنداي قاقتىعىستارعا ەرەكشە يمپۋلس بەردى. ونىڭ ۇستىنە، قازىر ساۋد ارابياسى مەن يزرايل كەلىسىمشارتتارعا قول قويماق بولىپ جاتقان كەز. سوندىقتان ولاردى قاستاستىرۋ يرانعا وتە ءتيىمدى. ويتكەنى، يران ساۋد ارابياسىمەن باسەكەلەس، ءتىپتى قاس دەۋگە دە بولادى. ەكى ەلدىڭ قارىم- قاتىناسى وتە ناشار. يزرايلمەن دە دۇرىس ەمەس، سوندىقتان وسى ەكى ەلدىڭ جاقىنداسىپ كەتكەنىن جاقتاماي وتىر»، - دەپ قاقتىعىستىڭ سەبەبىنە توقتالدى تالعات قاليەۆ.

ساراپشى ا ق ش بيلىگى يزرايلگە ۇشاق تاسىعىش اسكەري كەمە، اتوم سۇڭگۋىر قايىقتارىن جىبەرگەنىن اتاپ ءوتتى. تالعات قاليەۆتىڭ پايىمىنشا، بۇل - امەريكالىقتاردىڭ سوعىسقا كىرىسۋگە دايىن ەكەنىن كورسەتەتىن بەلگى.

«مىنا «حاماس» پەن «حەزبوللانى» ءارقاشان قولدايتىن - يران. بۇل شابۋىل ۇلكەن دايىندىقتى قاجەت ەتەدى. ولار - («حاماس» - اۆتور تۇسىندىرمەسى) سودىرلار. ال سودىرلار اياق استىنان ۇيىمداسا سالمايدى. اسكەري نۇسقاۋشىلاردىڭ دايىندىعىنان ءوتۋى كەرەك جانە بارلاۋ اقپاراتتارى بولۋى ءتيىس. سوسىن تولاسسىز زىمىران اتىپ جاتىر. ولاردىڭ قايدان كەلگەنى ەرەكشە سۇراق. حاماس- تىڭ اسكەرلەرى پالەستينادا ەمەس، شەتەلدە دايىندالعان بولۋى مۇمكىن. ەگەر ول پالەستينادا دايىندىق جۇرگىزسە، وندا موسساد (يزرايلدىڭ ۇلتتىق بارلاۋ قىزمەتى) ونى بىلەر ەدى»، - دەدى تالعات قاليەۆ.

وسى رەتتە ساراپشى اتالعان قارۋلى قاقتىعىستىڭ نەمەن اياقتالۋى مۇمكىن ەكەنىن ايتتى.

«ەگەر ءبىر مەملەكەت قوسىلىپ كەتپەسە، حاماس يزرايلدى جەڭە المايدى. ويتكەنى، ول - توپ. ال يزرايلدىڭ اسكەرى وتە مىقتى. سوندىقتان تۇبىندە يزرايل جەڭەدى دەپ ويلايمىن. قازىرگى جاعداي وڭاي ەمەس، تۇتقىنعا الىنعاندار بار. ەگەر باسقا ءبىر ەلدەر كىرىسىپ كەتسە، وندا بۇل ۇلكەن سوعىسقا دا اينالىپ كەتۋى مۇمكىن»، - دەپ ءوز پايىمىن ايتتى ت. قاليەۆ.

ساياسات تانۋشى بۇل قاقتىعىستىڭ قازاقستانعا تيگىزەر تەرىس سالدارىنا دا توقتالدى.

«جالپى، ءبىزدىڭ يزرايلمەن قارىم- قاتىناسىمىز جاقسى. يرانمەن دە قاتىناس بار، ول بىزگە كورشى ەل سانالادى. بىزگە سوعىستىڭ بولماعانى ءتيىمدى. قانداي جاعداي بولسا دا بەيبىت، دوستىق قارىم- قاتىناستى قولدايمىز. باستىسى - حالىقتىڭ قىرىلماعانى، قاننىڭ توگىلمەگەنى»، - دەپ ءسوزىن تۇيىندەدى تالعات قاليەۆ.

ەسكە سالايىق، سەنبى كۇنى حاماس سودىرلارى يزرايلگە زىمىرانمەن شابۋىل جاسادى. ەكى كۇننەن اسقان شيەلەنىستە 700 دەن استام ادام قازا تاپتى.

ارتىنشا يزرايل رەسمي تۇردە «سوعىس جاعدايى» رەجيمىن ەنگىزدى.