حالىقارالىق ىزدەۋدە بولعان قازاقستاندىق مىسىردا ۇستالدى

استانا. KAZINFORM - قازاقستان ءى ءى م ينتەرپول ۇلتتىق ورتالىق بيۋروسىنىڭ سۇراۋى بويىنشا مىسىر استاناسى كاير قالاسىندا حالىقارالىق ىزدەۋدە جۇرگەن قازاقستاندىق ازامات ۇستالدى. ول كريمينالدىق پوليتسيا قىزمەتكەرلەرىمەن شىمكەنت قالاسىنا جەتكىزىلدى. بۇل تۋرالى Polisia.kz جازدى.

- 2023 -جىلى ەر ادام باسقا ادامدارمەن ءسوز بايلاسىپ، جابىرلەنۋشىلەردىڭ اتىنا اۆتوكولىكتەردى نەسيەگە راسىمدەپ، كەيىن ولاردى ءۇشىنشى تۇلعالارعا ساتقان. وسى بويىنشا پوليتسياعا 105 ادام ارىزدانعان. كەلتىرىلگەن جالپى ماتەريالدىق شىعىن 1,5 ميلليارد تەڭگەدەن استى، - دەلىنگەن حابارلامادا.

كۇدىكتىگە قاتىستى قازاقستان رەسپۋبليكاسى قىلمىستىق كودەكسىنىڭ كەلەسى باپتارى بويىنشا قىلمىستىق ءىس قوزعالدى: 190-باپتىڭ 4-بولىگى - اسا ءىرى كولەمدە جاسالعان الاياقتىق؛ 262-باپتىڭ 1-بولىگى - ۇيىمداسقان توپ، قىلمىستىق ۇيىم قۇرۋ جانە ولارعا باسشىلىق ەتۋ، سول سياقتى ولارعا قاتىسۋ؛ 217-باپتىڭ 1-بولىگى - قارجىلىق (ينۆەستيتسيالىق) پيراميدانى قۇرۋ جانە وعان باسشىلىق ەتۋ.

تەرگەۋ امالدارى جالعاسىپ جاتىر.

بۇعان دەيىن اسا اۋىر قىلمىس جاساعانى ءۇشىن كۇدىكتى ازەربايجاننان ەكستراديتسيالانعان بولاتىن.