حالىقارالىق وپەراتسيالاردان ەلىمىزگە تۇسەتىن كىرىستەر ارتادى - دەپۋتات

استانا. KAZINFORM - جاقىندا ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ترانسفەرتتىك باعا بەلگىلەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكىنشى وقىلىمدا قارالىپ، قۇجات قابىلدادى.

بۇل رەتتە، زاڭنىڭ ماقساتىنا قاتىستى ءماجىلىس دەپۋتاتى ءادىل جۇبانوۆ تۇسىنىك بەردى.

زاڭ نورمالارىن ىسكە اسىرۋ حالىقارالىق ىسكەرلىك وپەراتسيالاردا جانە حالىقارالىق ىسكەرلىك وپەراتسيالارمەن بايلانىستى كەلىسىمشارتتاردا مەملەكەتتىك كىرىستىڭ جوعالۋىن بولدىرماۋعا وڭ اسەر ەتەدى. اتاپ ايتقاندا، بيرجالىق تاۋارلار بويىنشا تاۋار بيرجاسىندا جاسالعان مامىلەلەر اياسىندا باقىلاۋدى ەنگىزۋ؛ جەرگىلىكتى ەسەپتىلىكتى ۇسىناتىن سالىق تولەۋشىلەردىڭ سانىن كەڭەيتۋ؛ باعا دياپازونىن جانە رەنتابەلدىلىك (مارجا) دياپازونىن ايقىنداۋ تارتىبىنە، رەنتابەلدىلىكتى انىقتاۋ تارتىبىنە قاتىستى جاڭا باپتاردى ەنگىزۋ؛ سونداي-اق باسقا دا وزگەرىستەر مەن تولىقتىرۋلار ەنگىزۋ ەسكەرىلگەن.

ءا. جۇبانوۆ اتالعان زاڭ ەلدەن شىعارىلىپ جاتقان كاپيتالدى قالاي باقىلايتىنى جونىندە ايتىپ بەردى.

«بۇل پروتسەسكە باعا ارقىلى قاداعالاۋ جاسالادى. سەبەبى «ساۋدا مۇراتى - ۇتۋ» دەگەندەي، قازىر سالىقتى از تولەۋ ءۇشىن ءونىمدى ارزان باعامەن ساتىپ، ال ساتىپ العاندا جوعارى باعا بەلگىلەپ جاتادى. سوندىقتان پارلامەنتتە قارالىپ جاتقان قۇجاتتا كەيبىر زاڭسىز ارەكەتتەردى بولدىرماۋ ەسكەرىلگەن. وكىلەتتى ورگان تاۋار بيرجاسىنداعى ساۋدا-ساتتىقتى باقىلاۋعا الىپ جاتىر»، - دەدى دەپۋتات.

سونىمەن قاتار ول زاڭ ارقىلى سالىق سالاسىنداعى ادىلدىك پەن اشىقتىق قامتاماسىز ەتىلەتىنىن ناقتىلادى.

ءا. جۇبانوۆتىڭ پايىمىنشا، زاڭ ۇستەمدىگىن قامتاماسىز ەتۋ اياسىندا ءتيىستى وكىلەتتى ورگاننىڭ مۇمكىندىگىن كۇشەيتۋ كەرەك.

«ماسەلەن، حالىقارالىق بيرجادا نەمەسە شەتەلگە ەكسپورتقا شىعارىلاتىن ءبىر تاۋاردىڭ باعاسى 50 ا ق ش دوللارىن قۇرايدى. وسى ءونىم 30 دوللاردان ساتىلعانىن انىقتاساق، وكىلەتتى ورگان سالىقتىڭ 50 دوللارعا ساي دەڭگەيدە تولەتكىزەدى. شەتەلدەگى سۇرانىس 50 دوللار بولا تۇرا، كومپانيا ونى 30 دوللارعا وتكىزىپ جاتسا، بۇل تۇرعىدا سالىقتان جالتارۋ ارەكەتى بولۋى مۇمكىن»، - دەدى دەپۋتات.

ونىڭ سوزىنە قاراعاندا، 2019 -جىلى تاۋار بيرجاسى باقىلاۋدان الىنعاننان كەيىن، قازىر سالىق تولەيتىندەر سانى ايتارلىقتاي وسكەن.

«وكىلەتتى ورگانداردىڭ اقپاراتىنشا، قازىر تاۋار بيرجاسىندا قىزمەت ەتىپ، ساۋدامەن اينالاسىپ جاتقان سالىق تولەۋشىلەردىڭ ناقتى سانى بەلگىسىز. ەندى باقىلاۋ باستالعاننان كەيىن، ناقتى ەسەپتىلىك پايدا بولادى... الداعى ۋاقىتتا مەملەكەتتىڭ كىرىسى ەداۋىر كوبەيەدى. ەكسپورتتىق الەۋەتى بار كومپانيالاردىڭ ءونىمدى شەتەلگە شىعارعاندا، وسى سالانى قاداعالاۋ كەرەك بولادى. ياعني ءادىل باعامەن وتكىزىلۋى ماڭىزدى»، - دەدى ءادىل جۇبانوۆ.

بۇدان بۇرىن حابارلانعانداي، وسى زاڭ حالىقارالىق وپەراتسيالاردان مەملەكەتكە تۇسەتىن كىرىستەردى ۇلعايتۋعا مۇمكىندىك بەرەدى.

كاپيتالدى شىعارۋعا باقىلاۋدى كۇشەيتۋ ماقساتىندا تاراپتاردىڭ ءوزارا بايلانىستىلىعىن ايقىنداۋدى كەڭەيتۋ قاراستىرىلعان. سەبەبى كەيبىر ءىرى سالىق تولەۋشىلەر جاساندى دەلدالدىق قۇرىلىمدار قۇرادى.

قارجى مينيسترلىگىنىڭ مالىمەتىنشە، شيكىزات ونىمدەرىن سونداي «ەكسكليۋزيۆتى» ترەيدەرلەرگە تومەندەتىلگەن باعامەن ساتۋ فاكتىلەرى بار. بۇل رەتتە ونداي ترەيدەرلەر بويىنشا قارجىلىق ەسەپتىلىكتى الۋ مۇمكىن ەمەس. ياعني تەكسەرىلەتىن مامىلەلەر بويىنشا جەتكىلىكتى اقپاراتتىڭ بولماۋىنا بايلانىستى ەلدەن كاپيتالدى الىپ كەتۋ تاۋەكەلى تۋىندايدى. سوندىقتان ءوزارا بايلانىستى تاراپتار ۇعىمىن كەڭەيتۋ ۇسىنىلدى.

زاڭ بويىنشا قوسىمشا دەلدالداردىڭ پايدا بولۋىنا شەكتەۋ قويىلماق. مۇنداي دەلدالدار كوپ جاعدايدا شەتەلدە قۇرىلادى.

ياعني بىزدەن العان شيكىزاتتىق تاۋارلاردى ولار تومەن باعامەن شىعارىپ، شەتەلدە جوعارى باعاعا وتكىزەدى. وسىدان العان تابىستى قالتالارىنا باسىپ كەلدى.