حالىقارالىق رەيتينگ اگەنتتىگى قازاقستاننىڭ كرەديتتىك رەيتينگىن «تۇراقتى» دەپ راستادى

استانا. قازاقپارات- Fitch Ratings حالىقارالىق رەيتينگ اگەنتتىگى قازاقستاننىڭ تاۋەلسىز كرەديتتىك رەيتينگىن «BBB» دەڭگەيىندە راستادى، بولجام - «تۇراقتى». بۇل جايىندا ۇلتتىق ەكونوميكا مينيسترلىگىنەن حابارلاندى.

ەلىمىزدىڭ رەيتينگىن قولدايتىن نەگىزگى فاكتورلاردىڭ قاتارىنا - ەلەۋلى سىرتقى بۋفەرلەر، شەتەل ۆاليۋتاسىنداعى رەزەرۆتەر، تۇراقتى فيسكالدىق جاعداي، مەملەكەتتىك قارىزدىڭ تومەن دەڭگەيى، سونداي-اق سىرتقى تاۋەكەلدەرگە ورتاشا اسەر ەتۋ ەنىپ وتىر.

Fitch Ratings ساراپشىلارى ۆاليۋتالىق رەزەرۆتەردىڭ ودان ءارى نىعايۋىن، سونداي-اق يمپورتتىڭ قالىپتى ءوسۋى جانە مۇناي ءوندىرۋ مەن ەكسپورت كولەمىنىڭ ۇلعايۋى اياسىندا اعىمداعى شوت تاپشىلىعىنىڭ قىسقارۋىن بولجاۋدا.

Fitch پىكىرىنشە، بيۋدجەت شىعىستارىنىڭ ءوسۋىن شەكتەيتىن جاڭا فيسكالدىق ەرەجەلەر جانە قازاقستاننىڭ ۇلتتىق قورىنان كەپىلدەندىرىلگەن ترانسفەرت سالىق-بيۋدجەت ساياساتىن نىعايتۋعا ءتيىس.

بۇعان قوسا، Fitch قايتالاما سانكسيالاردى ەنگىزۋدىڭ سالىستىرمالى تۇردە تومەن تاۋەكەلدەرىن جانە ولاردىڭ قازاقستان ەكونوميكاسىنا اسەرىن اتاپ ءوتتى.