حالىقارالىق جۋرناليستيكا مەكتەبىنىڭ العاشقى تۇلەكتەرى ديپلومدارىن الدى
استانا. KAZINFORM - استانادا قازاقستان رەسپۋبليكاسى پرەزيدەنتىنىڭ تەلەراديوكەشەنى مەن ماقسۇت نارىكبايەۆ ۋنيۆەرسيتەتىنىڭ بىرلەسكەن جوباسى - حالىقارالىق جۋرناليستيكا مەكتەبىنىڭ العاشقى تۇلەكتەرى ديپلوم الدى، دەپ حابارلايدى Kazinform اگەنتتىگىنىڭ ءتىلشىسى.
حالىقارالىق جۋرناليستيكا مەكتەبى تەك تەورياعا عانا ەمەس، حالىقارالىق تاجىريبەگە دە سۇيەنەدى. بۇنى 2024 -جىلدىڭ ءساۋىر ايىندا Al Jazeera تەلەارناسىمەن وتكەن ءبىلىم بەرۋ اپتالىعى راستايدى. حالىقارالىق ىنتىماقتاستىق جاڭا وقۋ جىلىنىڭ باسىنان باستاپ جالعاسادى - ستۋدەنتتەر مەن وقىتۋشىلارعا Al Jazeera ساراپشىلارى عانا ەمەس، سونىمەن قاتار قىتاي مەديا كورپوراتسياسى CMG ماماندارى دا ءدارىس وقيدى.
حالىقارالىق جۋرناليستيكا مەكتەبىنىڭ «جۋرناليستيكا: اناليتيكا جانە زەرتتەۋ» بىرەگەي باعدارلاماسىنىڭ العاشقى تۇلەكتەرى 25 ادام بولدى. باعدارلاما ءتورت نەگىزگى باعىتتان تۇردى: جۋرناليستيكا، قۇقىق، ەكونوميكا جانە IT. وقىتۋ قازاق جانە ورىس تىلدەرىندە جۇرگىزىلدى. بارلىق تۇلەكتەر قازاقستاننىڭ جەتەكشى رەداكتسيالارىندا تاجىريبەدەن ءوتىپ، 11 ب ا ق- تا جاريالانعان مەديا جوبالاردى جۇزەگە اسىردى.
ديپلوم تاپسىرۋ سالتاناتى ماقسۇت نارىكبايەۆ اتىنداعى ۋنيۆەرسيتەت عيماراتىنىڭ جانىنداعى اشىق الاڭدا سالتانات پەن قولداۋ جاعدايىندا ءوتتى.
حالىقارالىق جۋرناليستيكا مەكتەبىنىڭ ءبىرىنشى تۇلەكتەرىنە ديپلومداردى قازاقستان رەسپۋبليكاسى پرەزيدەنتىنىڭ تەلەراديوكەشەنى ديرەكتورىنىڭ ورىنباسارى اسقار جالدينوۆ، م ۇ ۋ باسقارما ءتوراعاسى تالعات نارىكبايەۆ جانە پارلامەنت ءماجىلىسىنىڭ دەپۋتاتى اسحات ايماعامبەتوۆ تابىس ەتتى.
بيىلعى جىلى وقۋ ورنىن بارلىعى 828 ستۋدەنت ءبىتىردى، ونىڭ ىشىندە 698 باكالاۆر دارەجەسى جانە 130 ماگيستراتۋرا يەگەرى. جاس مامانداردىڭ ەڭ كوپ بولىگى قۇقىق جوعارى مەكتەبىن (271 باكالاۆر جانە 69 ماگيستر) ءبىتىردى. تۇلەكتەردى قازاقستان رەسپۋبليكاسىنىڭ عىلىم جانە جوعارى ءبىلىم ءمينيسترى ساياسات نۇربەك قۇتتىقتادى.
مەرەكەنىڭ كوركىن كەشتىڭ حەدلاينەرى ALEM ورىنداۋشىسىنىڭ ونەرى تولىقتىردى.