ءىس-شارا شىمىلدىعىن اشقان ق ر پرەمەر-ءمينيسترىنىڭ ورىنباسارى قانات بوزىمبايەۆ اتالعان ۇيىمنىڭ قۇرىلعانىنا 33 جىل تولعانىن اتاپ ءوتتى. وسى ۋاقىت ارالىعىندا قور بىرەگەي ءارى قاجەتتى ايماقتىق الاڭعا اينالدى. وعان مۇشە مەملەكەتتەردىڭ قارىم-قاتىناسى ءوزارا سەنىم، سىيلاستىق جانە سەرىكتەستىك نەگىزىندە جالعاسىپ كەلەدى.
- بۇل ورتا ازياداعى سۋ، ەكولوگيا، الەۋمەتتىك- ەكونوميكالىق سالالاردا بىرلەسكەن ءىس-قيمىلعا مۇمكىندىك بەرەدى. ەلدەرىمىزدىڭ ورتاق جۇمىسى مەن مەملەكەت باسشىلارىنىڭ ساياسي ەرىك-جىگەرىنىڭ ارقاسىندا ءبىراز جۇمىس اتقارىلدى. ترانسشەكارالىق سۋ رەسۋرستارىن باسقارۋ جانە ارال تەڭىزىنىڭ جاعدايىن جاقسارتۋ بويىنشا تۇراقتى سەرىكتەستىكتى ساقتاپ قالدىق، - دەدى ق. بوزىمبايەۆ.
سونىمەن بىرگە ول بۇل باسقوسۋ الداعى ۇلكەن جيىنعا دايىندىق ەكەنىن مالىمدەدى. 22-ساۋىردە استانادا ح ا ق ق-عا مۇشە مەملەكەتتەر باسشىلارى كەڭەسىنىڭ وتىرىسى وتپەك.
ايتا كەتەيىك باسقارما وتىرىسىنا قازاقستان رەسپۋبليكاسى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ، تاجىكستان رەسپۋبليكاسى پرەمەر-ءمينيسترىنىڭ ورىنباسارى سۋلايمون زيەزودا، تۇرىكمەنستان مينيسترلەر كابينەتى ءتوراعاسىنىڭ ورىنباسارى تانگرىگۋلى اتاحاللىيەۆ، وزبەكستان رەسپۋبليكاسى پرەزيدەنتىنىڭ كەڭەسشىسى شۋحرات گانيەۆ، وزبەكستان رەسپۋبليكاسىنىڭ سۋ شارۋاشىلىعى ءمينيسترى شاۆكات حامرايەۆ، قىرعىز رەسپۋبليكاسىنىڭ سۋ رەسۋرستارى، اۋىل شارۋاشىلىعى جانە قايتا وڭدەۋ ونەركاسىبى ءمينيسترىنىڭ ورىنباسارى - مينيسترلىك جانىنداعى سۋ رەسۋرستارى قىزمەتىنىڭ ديرەكتورى الماز جەەناليەۆ، حالىقارالىق ارالدى قۇتقارۋ قورى اتقارۋشى كوميتەتىنىڭ ءتوراعاسى اسحات ورازباي قاتىستى.
ەلىمىزدىڭ سۋ رەسۋرستارى جانە يرريگاتسيا مينيسترلىگى مالىمەتىنشە، ارالدى ساقتاۋ ماقساتىندا كەشەندى شارا جۇزەگە اسىپ جاتىر. مەملەكەتارالىق كەلىسىمدەر قاتاڭ ساقتالعانىنىڭ ارقاسىندا سوڭعى ءۇش جىلدا سولتۇستىك ارالعا 6 ميلليارد تەكشە مەتردەن استام سۋ قۇيعان. تەڭىزدىڭ سۋ كولەمى 2022 -جىلى 18,9 ميلليارد تەكشە مەتر بولسا، ال 2025 -جىلدىڭ سوڭىندا 23 ميلليارد تەكشە مەترگە جەتتى.
بۇل باعىتتاعى جۇمىستار ءالى دە جالعاسادى. ق ر سۋ رەسۋرستارى جانە يرريگاتسيا مينيسترلىگى تۇركىستان جانە قىزىلوردا وبلىستارىنداعى سۋلاندىرۋ جۇيەلەرىن جاڭعىرتۋ جانە اۆتوماتتاندىرۋ بويىنشا 160 جوبالىق-سمەتالىق قۇجاتتامانى ازىرلەپ جاتىر.
سونىمەن قاتار مينيسترلىك دۇنيەجۇزىلىك بانكتىڭ قولداۋىمەن كوكارال بوگەتىن جاڭعىرتپاق. سونىڭ ارقاسىندا تەڭىز دەڭگەيى بالتىق جۇيەسىمەن 44 مەترگە دەيىن كوتەرىلەدى دەپ بولجانىپ وتىر. ال سۋ كولەمى 34 ميلليارد تەكشە مەترگە جەتپەك.
ايتا كەتەيىك بۇعان دەيىن ولجاس بەكتەنوۆ حالىقارالىق ارالدى قۇتقارۋ قورىنىڭ باسقارما مۇشەلەرىمەن كەزدەسكەنىن جازعانبىز.
اۆتور
الپامىس فايزوللا