حالىقارالىق «الاش» ادەبي سىيلىعىن كىمدەر الدى

الماتى. KAZINFORM - قازاقستان جازۋشىلار وداعىنىڭ «كوركەم ادەبيەت: تالانت پەن تالعام» اتتى 2023 -جىلعى ادەبي جىل قورتىندىسى جيىنى ءوتتى. وعان ەلىمىزدىڭ ءار وڭىرىنەن كەلگەن قالامگەرلەر، اقىن-جازۋشىلار، ادەبيەتتانۋشى عالىمدار، جۋرناليستەر قاتىستى.

سالتاناتتى جيىندى قازاقستان جازۋشىلار وداعى باسقارما ءتوراعاسىنىڭ ءبىرىنشى ورىنباسارى، بەلگىلى جازۋشى نۇرجان قۋانتاي ۇلى اشىپ، جۇرگىزىپ وتىردى.

- 2023 -جىلى جاس قالامگەرلەرگە مەملەكەتتىك قولداۋ كورسەتۋ ماقساتىندا تۇڭعىش رەت پرەزيدەنتتىك ارناۋلى ادەبي سىيلىق تاعايىندالدى. 18 بەن 35 جاس ارالىعىنداعى، جاس قالامگەرلەرگە ارنالعان بۇل ادەبي سىيلىق «بالالار ادەبيەتى»، «دراماتۋرگيا»، «پوەزيا»، «پروزا» نوميناتسيالارى بويىنشا بىلتىر كۇزدە تابىس ەتىلدى. بۇل ادەبي بايقاۋ بيىل دا وتكىزىلمەك. رەسپۋبليكالىق «ايبوز» ادەبي سىيلىعى بىلتىر ەكىنشى مارتە وتكىزىلىپ، جەتى نوميناتسيا بويىنشا سىيلىقتار بەرىلدى. جاستارعا ارنالعان، بۇدان دا باسقا، ءداستۇرلى «التىن توبىلعى»، «التىن ساقا»، «ايتۇمار» بايقاۋلارى بىلتىر دا وتكىزىلدى. قازاقستان جازۋشىلار وداعىنىڭ مۇرىندىق بولۋىمەن وڭىرلەردە وبلىستىق اكىمدىكتەردىڭ اقىن- جازۋشىلارعا جىل سايىن اتاۋلى ادەبي سىيلىق تاعايىنداۋ ءىس-شاراسى قولعا الىنعانى ءمالىم، - دەدى نۇرجان قۋانتاي ۇلى.

ءىس-شارا بارىسىندا ءبىرقاتار قالامگەرگە قازاقستان جازۋشىلار وداعىنىڭ حالىقارالىق «الاش» ادەبي سىيلىعى تابىستالدى. حالىقارالىق «الاش» ادەبي سىيلىعىن العان قالامگەرلەر: اقىن عايساعالي سەيتاق، جازۋشى ءومىر كارىپ ۇلى، اقىن سۇراعان راحمەت ۇلى، جازۋشى جاراسباي سۇلەيمەنوۆ، اقىن مۇرات شايماران، ادەبيەتتانۋشى جۇمات تىلەپوۆ، اقىن نۇرتاس يسابايەۆ، جازۋشى تورەحان مايباس، اقىن ءاليا داۋلەتبايەۆا، جازۋشى سەرىك ەلىكباي، اقىن ەربول الشىنباي، ساتيريك جازۋشى بەرىك سادىروۆ، اقىن اۋباكىر سمايىلوۆ، جازۋشى تىنىمباي تولەپباي، اقىن ەگەۋحان مۇحامادي قىزى، جازۋشى بولاتبەك تولەپبەرگەن، اقىن عايني الىمبەكوۆا، جازۋشى جالعاسقالي دۇتماعامبەتوۆ، اقىن داريعا مۇشتانوۆا، جازۋشى مومبەك ابداكىم ۇلى جانە جازۋشى الەكساندر كارليۋكيەۆيچ الدى.

سونىمەن بىرگە بىرنەشە قالامگەر «قازاقستاننىڭ قۇرمەتتى جازۋشىسى» اتاعىمەن ماراپاتتالدى. حالىقارالىق «الاش» ادەبي سىيلىعىن العان قالامگەرلەردىڭ اراسىندا Kazinform ءتىلشىسى، ارىپتەسىمىز عايساعالي سەيتاق تا بار. ءبىز ارىپتەسىمىزدى وسى ماراپاتتى الۋىمەن قۇتتىقتاي وتىرا، وعان شىعامارىشىلىق شابىت پەن ساتتىلىك تىلەيمىز.

اۆتور

دۋمان ارعىنگەلدى