حالىقارالىق احۋال ودان سايىن كۇردەلەنە ءتۇستى - ميرزيەيەۆ رەسەيدەگى تەراكت جايلى

تاشكەنت. KAZINFORM - ءبىز قيىن ءارى قاۋىپتى كەزەڭدە ءومىر ءسۇرىپ جاتىرمىز. بۇل تۋرالى تاشكەنت حالىق دەپۋتاتتارى كەڭەسىنىڭ سەسسياسىندا ءسوز سويلەگەن وزبەكستان پرەزيدەنتى شاۆكات ميرزيەيەۆ ءمالىم ەتتى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

پرەزيدەنتتىڭ باسپا ءسوز حاتشىسى شەرزود اسادوۆتىڭ مالىمدەۋىنشە، شاۆكات ميرزيەيەۆ كەڭەس بارىسىندا قالىپتاسقان قازىرگى كۇردەلى حالىقارالىق جاعدايعا ەرەكشە توقتالدى.

«ءبىز قيىن ءارى قاۋىپتى كەزەڭدە ءومىر ءسۇرىپ جاتىرمىز. تاياۋ شىعىستاعى جانە نەگىزگى سەرىكتەستەرىمىز اراسىنداعى قاقتىعىستار ءالى شەشىمىن تاپپادى. سونىمەن قاتار ماسكەۋ وبلىسىنداعى تەررورلىق اكتىنىڭ سالدارىنان حالىقارالىق احۋال ودان سايىن كۇردەلەنە ءتۇستى. ءبىز قازىرگى ۋاقىتتا «قاي مەملەكەت وسىنداي جاعدايدىڭ بولمايتىنىنا كەپىلدىك بەرەدى؟» دەگەندى وي ەلەگىنەن وتكىزۋىمىز كەرەك»، - دەدى وزبەكستان باسشىسى.

شاۆكات ميرزيەيەۆ وسىنداي ۋاقىتتاردا وزبەكستان ۇكىمەتىنىڭ الدىندا تۇرعان باستى مىندەتتەردىڭ ءبىرى ەكونوميكاعا جانە حالىقتىڭ تابىسىنا تەرىس اسەر ەتەتىن فاكتورلاردى ازايتۋ ەكەنىن اتاپ ءوتتى.

«ول ءۇشىن ماحاللانىڭ ەكونوميكالىق بازاسىن نىعايتۋ جانە حالىقتىڭ تابىسىن ۇلعايتۋ ءۇشىن قولدا بار مۇمكىندىكتەردى تولىق پايدالانۋ قاجەت»، - دەپ توقتالدى ول.

كورشىلەس مەملەكەتتىڭ باسشىسى جاۋاپتى ورگاندارعا وزبەكستان ازاماتتارىنىڭ وزگە ەلدەردىڭ ەڭبەك نارىعىنا شىعۋىن جەڭىلدەتۋ جانە وتانىنا ورالعان ميگرانتتاردى جۇمىسپەن قامتۋ ماسەلەسىن جۇيەلى شەشۋ بويىنشا ءبىرقاتار تاپسىرما بەردى.

ەسكە سالا كەتسەك، 22-ناۋرىز كۇنى ماسكەۋ وبلىسىنداعى «Crocus City Hall» ورتالىعىنا قارۋلانعان ادامدار باسا كوكتەپ كىرىپ، كەلۋشىلەرگە وق جاۋدىرعان. سالدارىنان 500 دەن استام ادام جاراقات الىپ، 140 تان اسا ازامات مەرت بولدى. ولاردىڭ ىشىندە بالالار دا بار.

اۆتور

ءاليحان اسقار