حالىق جازۋشىسى قابدەش جۇمادىلوۆتىڭ 90 جىلدىق مەرەيتويى قالاي اتاپ وتىلەدى

استانا. KAZINFORM - كەلەر جىلى حالىق جازۋشىسى، قوعام قايراتكەرى قابدەش جۇمادىلوۆتىڭ 90 جىلدىق مەرەيتويىنا وراي 84 ءىس-شارا ۇيىمداستىرىلادى. بۇل جايىندا ءماجىلىس دەپۋتاتتارىنىڭ ساۋالىنا جاۋاپ بەرگەن پرەمەر-ءمينيستردىڭ ورىنباسارى ەرمەك كوشەربايەۆ ايتتى.

- مادەنيەت جانە اقپارات مينيسترلىگىنىڭ اقپاراتىنا سايكەس، جازۋشىنىڭ 90 جىلدىق مەرەيتويىن اتاپ ءوتۋ ءۇشىن ەلىمىزدىڭ بارلىق ءوڭىرىنىڭ مادەنيەت وشاقتارى مەن ءبىلىم بەرۋ ۇيىمدارىندا تانىمدىق ساعاتتار، ادەبي جانە شىعارماشىلىق كەشتەر، دوڭگەلەك ۇستەلدەر، كىتاپ كورمەلەرى، عىلىمي كونفەرەنسيالار، ادەبي وقۋلار، تاربيە ساعاتتارى، وقىرمان كونفەرەنتسيالارى، كىتاپ وقۋ كونكۋرستارى، جازۋشى پورترەتتەرى، بۇقارالىق اقپارات قۇرالدارىندا ماقالالار مەن ەستەلىك باسىلىمداردى جاريالاۋ بويىنشا 84 ءىس-شارا ۇيىمداستىرىلاتىن بولادى. وسىعان قوسا قازاقستان جازۋشىلار وداعى رەسپۋبليكالىق قوعامدىق بىرلەستىگى قابدەش ءجۇمادىلوۆتىڭ 90 جىلدىعىنا وراي رەسپۋبليكا دەڭگەيىندە ءىس شارالار ۇيىمداستىراتىنىن حابارلاۋدا، - دەدى ۇكىمەت باسشىسىنىڭ ورىنباسارى.

ونىڭ اتاپ وتۋىنشە، ەلدى مەكەندەردەگى كوشەلەر مەن وبەكتىلەرگە جازۋشىنىڭ اتىن بەرۋ قولدانىستاعى ونوماستيكا سالاسىنداعى زاڭناماعا سايكەس قاراستىرىلادى.

- جالپى بەلگىلەنگەن ءتارتىپ بويىنشا كوشەلەر مەن مەكتەپتەرگە عىلىم، مادەنيەت جانە قوعام قايراتكەرلەرىنىڭ ەسىمدەرىن ولار قايتىس بولعان كۇنىنەن باستاپ كەمىندە بەس جىل وتكەن سوڭ بەرۋ كوزدەلگەن. قازاقستاننىڭ حالىق جازۋشىسى قابدەش جۇمادىلوۆتىڭ 90 جىلدىعى جوسپارعا سايكەس وڭىرلەردە اتالىپ وتىلەدى. ماسەلە مادەنيەت جانە اقپارات مينيسترلىگىنىڭ باقىلاۋىندا بولادى، - دەدى ەرمەك كوشەربايەۆ.

قابدەش جۇمادىلوۆ 1936 -جىلى 24 - ساۋىردە ق ح ر، شينجاڭ ولكەسى، تارباعاتاي ايماعى، شاۋەشەك اۋدانىندا دۇنيەگە كەلگەن. 2021 -جىلى 5- ساۋىردە دۇنيەدەن ءوتتى.

قالامگەردىڭ ارتىندا 10 رومان، 20 دان استام پوۆەست، 70 تەن استام شىعارما قالدى. «سوڭعى كوش»، «دارابوز»، «قازدار قايتىپ بارادى» سىندى مول مۇرا ادەبيەتتىڭ التىن قورىنا ەندى. جازۋشى، ءوز ەڭبەكتەرىندە قازاق حالقىنىڭ تاۋەلسىزدىگى جولىنداعى كۇرەسىن شىنايى بەينەلەپ، ۇلت بوستاندىعى ءۇشىن جانىن قيعان ەرلەر، ونىڭ ىشىندە بوگەنباي، قابانباي، وسپان باتىرلاردىڭ ازاتتىق جولىنداعى كۇرەسىن تەرەڭ زەرتتەپ، ولاردى تەك ساربازدار رەتىندە عانا ەمەس، تۇتاس حالىقتىڭ تاعدىرى ءۇشىن كۇرەسكەن تۇلعالار رەتىندە سيپاتتايدى.

ول تەك جازۋشى عانا ەمەس، سونداي-اق ۇلت تاعدىرىنا ەرەكشە ۇلەس قوسقان قايراتكەر ەدى. اشارشىلىق كەزىندە توتاليتارلى جۇيەدەن قاشىپ ارعى بەت اسقان قاراكوز قانداستارىمىزدىڭ كەيىنگى تاعدىرىنا بەي-جاي قاراماي، ولاردىڭ كوشى-قونى، ءتىل جانە مادەنيەت ماسەلەلەرىن اشىق كوتەرىپ، ۇلتتىق مۇددەنى قورعاۋ جولىندا اتسالىستى. الپىسىنشى جىلدارى قىتايدا ساياسي جاعداي كۇردەلەنە باستاعاندا، قابدەش جۇمادىل قازاق باۋىرلارىنىڭ اۋىر بولاشاعىنا اراشا ءتۇستى. ماسكەۋگە دەيىن بارىپ، كرەملگە حات جازىپ، قاداستارىمىزدىڭ كوشى-قونىن ۇيىمداستىرۋ ماسەلەسىن كوتەردى. ناتيجەسىندە 1962-جىلى 200 مىڭنان استام قانداسىمىزدىڭ تاريحي وتانىنا ورالۋىنا سەبەپكەر بولدى.