فرانسۋز ب ا ق- تارىنىڭ مالىمەتىنشە، كيبەرشابۋىل بۋرگۋنديا - فرانش-كونتە ايماعىندا بولعان.
قاسكويلەر فرانسۋز قان قىزمەتىنىڭ كونتەينەرلەرىنە قىزمەت كورسەتەتىن Coolworld كومپانياسىنىڭ سالقىنداتۋ جۇيەسىنە قول جەتكىزىپ، بىرنەشە قويماداعى تەمپەراتۋرا پارامەترلەرىن مينۋس 30 گرادۋستان پليۋس 110 گرادۋسقا دەيىن وزگەرتكەن.
الايدا تەحنيك تەمپەراتۋرانىڭ قالىپتان تىس كوتەرىلگەنىن دەر كەزىندە بايقاپ، اۋىر زارداپتاردىڭ الدىن العان.
فرانسيانىڭ دەنساۋلىق ساقتاۋ مينيسترلىگى بۇل وقيعا مەكەمەنىڭ جۇمىسىنا اسەر ەتپەگەنىن حابارلادى.
فرانسۋز قان قىزمەتىنىڭ باسشىسى فرەدەريك پاكۋد ساقتاۋلى ماتەريالداردىڭ قاۋىپسىزدىگىنە نۇقسان كەلمەگەنىن راستادى. سونىمەن قاتار شابۋىل سالدارىنان ناۋقاستاردى ەمدەۋگە ارنالعان ۇلگىلەر مەن قان پلازماسىنىڭ قورىن جوعالتۋ قاۋپى بولعانىن اتاپ ءوتتى.
كيبەرشابۋىلدى ۇيىمداستىرۋشىلاردىڭ كىم ەكەنى ازىرگە انىقتالعان جوق.
بۇعان دەيىن نەمىس تىلىندەگى Charité ۋنيۆەرسيتەتتىك كلينيكاسىنىڭ سەرۆەرىنە حاكەرلەر شابۋىل جاساپ، جەكە بايلانىس دەرەكتەرىنە قول جەتكىزگەنىن جازعانبىز.
سونىمەن قاتار جاپونيانىڭ GMO Internet Group ينتەرنەت-پروۆايدەرى ۆاليۋتا ساۋداسى قىزمەتىنە زاڭسىز كىرگەن حاكەرلەردى انىقتاۋعا كومەكتەسەتىن اقپارات ءۇشىن 1 ميلليون دوللارعا دەيىن سىياقى بەرەتىنىن مالىمدەدى.