حاڭجوۋداعى ازيا ويىندارىنا قىتايلىق 4 قازاق سپورتشى قاتىسادى - شەتەلدەگى قازاق باسپا ءسوزى
«قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
قازاقستان مەن موڭعوليا پرەزيدەنتتەرى كەلىسسوز جۇرگىزدى - «Kaznews»
قازاقستان رەسپۋبليكاسىنىڭ قاسىم-جومارت توقايەۆ پەن موڭعوليا پرەزيدەنتى ۋحنااگين حۋرەلسۋحپەن كەلىسسوز جۇرگىزدى.
بۇل تۋرالى وسى اپتادا موڭعوليانىڭ «Kaznews» اقپاراتتىق پورتالى دا حابارلادى.
اتالعان باسىلىمنىڭ كەلتىرگەن دەرەگىنشە، كەلىسسوز بارىسىندا، مەملەكەت باسشىلارى قازاقستان مەن موڭعوليا اراسىنداعى تىعىز ءارى ءداستۇرلى دوستىق قارىم-قاتىناستى اتاپ وتكەن. سونىمەن قاتار پرەزيدەنتتەر ەكىجاقتى بايلانىستاردى ستراتەگيالىق سەرىكتەستىك دەڭگەيىنە دەيىن كەڭەيتۋ مۇمكىندىگىنە نازار اۋداردى. ساۋدا- ەكونوميكالىق ىقپالداستىققا تىڭ سەرپىن بەرۋ ءۇشىن ۇكىمەتارالىق كوميسسيانىڭ جۇمىسىن جانداندىرىپ، قازاقستان مەن موڭعوليانىڭ ىسكەرلىك كەڭەسىن قۇرۋ قاجەت ەكەنىن ايتقان.
«كەزدەسۋ سوڭىندا پرەزيدەنتتەر جاقىن ارادا ءبىر- ءبىرىنىڭ ەلىنە ساپارمەن بارۋ مۇمكىندىگىن تالقىلادى» ، دەپ تۇيىندەيدى موڭعوليالىق ب ا ق.
حاڭجوۋداعى ازيا ويىندارىنا قىتايلىق 4 قازاق سپورتشى قاتىسادى- CNR
16-قىركۇيەكتە حاڭجوۋدا 19-شى ازيا ويىندارىنا ارنالعان ازيا ويىندارى قالاشىعى رەسمي تۇردە اشىلدى. وسى ازيا ويىندارىندا قىتاي سپورت دەلەگاتسياسىنىڭ قۇرامىندا جالپى سانى 13 شينجاڭ سپورتشىسى بىرنەشە جارىسقا قاتىسادى. سولاردىڭ تورتەۋى قازاق.
ولار بوكسشى توقتاربەك تاڭاتقان ۇلى، بايقونىس دانابەك، بالۋان كابيران ابۋشايمان ۇلى جانە ەرلەر فۋتبول كومانداسىنان ەلجان شىنار. حاڭجوۋداعى ازيا ويىندارىنا جولداما العان شينجاڭدىق 13 سپورتشى جاعاجاي ۆولەيبولى، جەڭىل اتلەتيكا، بوكس، ات سپورتى، ساداق اتۋ، فۋتبول جانە كۇرەستەن قاتىسادى، - دەپ حابارلايدى قىتايدىڭ «ورتالىق حالىق راديوسى» اقپاراتتىق پورتالى.
ايتا كەتەيىك، التاي قالاسىنان كەلگەن 26 جاستاعى توقتاربەك تاڭاتقان ۇلى ازيا ويىندارىنا وسىمەن ەكىنشى رەت قاتىسىپ وتىر. 2021 -جىلى توكيو وليمپياداسىنا قاتىسىپ، 1/8 فينالدا چەمپيون اتانعان برازيليالىق ويىنشىدان 2:3 ەسەبىمەن جەڭىلىپ قالدى. 2023 -جىلعى بوكستان الەم چەمپيوناتىندا توقتاربەك تاڭاتقان ۇلى فينالعا دەيىن جەتىپ، سوڭىندا قازاقستاندىق بوكسشىعا ەسە جىبەرىپ، كۇمىس جۇلدەنى قاناعات تۇتقان. وسى ازيا ويىندارىندا ول تاعى دا چەمپيون بولۋعا تالاسادى.
سونداي-اق شىنجاڭدىق بوكسشى بايقونىس دانابەك 92 كەلى جانە ودان جوعارى سالماق بويىنشا سىنعا تۇسەدى.
بايقونىس دانابەك تاشكەنتتەگى الەم چەمپيوناتىنا قاتىسقان ەتنيكالىق قازاق بوكسشىلارىنىڭ ءبىرى. قىتايدىڭ تارباعاتاي ايماعىندا تۋعان. بيىل العاش رەت ءوز ەلىنىڭ چەمپيونى اتانىپ، الەم بىرىنشىلىگىندە ەكىنشى رەت باق سىناعان. جۇلدەگە جەتپەسە دە، بۇل سىندا بايقونىس الىسقا شاۋىپ، ازۋلى قارسىلاستارىن ۇتتى.
ال كابيران ابۋشايمان ۇلى اتتى ۇلتى قازاق سپورتشى بيىل 25 جاستا، ول تارباعاتايدىڭ ەمين وكرۋگىنەن. وسى جىلدىڭ اقپان ايىندا ك. ابۋشايمان ۇلى دۇنيەجۇزىلىك كۇرەس فەدەراتسياسىنىڭ اشىق چەمپيوناتىندا ەرلەر اراسىندا ەركىن كۇرەستەن 97 كەلى سالماقتا قولا جۇلدەنى جەڭىپ الدى. ءساۋىر ايىندا 2023 -جىلعى كۇرەس تۇرلەرىنەن ازيا چەمپيوناتىنىڭ كۇمىس جۇلدەگەرى اتاندى. سونداي- اق ماۋسىم ايىندا قىرعىزستانداعى دۇنيەجۇزىلىك كۇرەس فەدەراتسياسىنىڭ حالىقارالىق ۇپايلار تۋرنيرىندە تاعى دا كۇمىس جۇلدەنى ەنشىلەگەن.
سونىمەن قاتار وسى اپتاداعى قىتايدىڭ ەرلەر فۋتبول كومانداسىنا شينجاڭنان ەكى جاس ويىنشى تاڭدالدى، اتاپ ايتقاندا، قىتاي سۋپەرليگاسىندا «شانحاي سيپگ» ساپىندا ونەر كورسەتەتىن قاشقارلىق جاس ويىنشى ابراحام حاليك جانە نانتۋڭ جيۋن كومانداسىنىڭ التايلىق جاس ويىنشىسى ەلجان شىنار.
ايتا كەتەيىك، ەلجان شىنار 2019 -جىلى فۋتبولدان 20 جاسقا دەيىنگى قىتاي جاستار قۇراماسىنا شاقىرتۋ العان.
قىتايلىق دەرەككوزدىڭ مالىمەتىنشە، ق ح ر فۋتبول فەدەراتسياسى قىتايدىڭ U-20 قۇراماسىنا شاقىرتۋ العان فۋتبولشىلاردىڭ ءتىزىمىن جاريالاعان. ولاردىڭ قاتارىندا قىتاي ەلىندە تۇراتىن قانداسىمىز ەلجان شىنار ەسىمى دە اتالادى. ەلجان قىتاي سۋپەرليگاسىندا ونەر كورسەتەتىن «شىنجەن» كلۋبىندا ويناعان. ول قۇراماداعى ۇزدىك ويىنشىلاردىڭ ءبىرى اتانعان. ەلجان شىنار - 1999 -جىلى ق ح ر-نىڭ التاي ايماعى، بۋرىلتوعاي اۋدانىندا تۋعان.
قوقاندا حالىقارالىق قولونەر فەستيۆالى وتۋدە - «ءوز ا»
قوقان قالاسى حالىقارالىق قولونەر فەستيۆالىن ەكىنشى رەت وتكىزىپ وتىر. ايتۋلى شاھارعا الەمنىڭ جانە رەسپۋبليكانىڭ تۇكپىر- تۇكپىرىنەن قولونەرشىلەرى جينالدى. تاڭەرتەڭ سىرتقا شىققان شەتەلدىك قوناقتار، قولونەرشىلەر مەن جەرگىلىكتى تۇرعىندار تۇركىستان كوشەسىنىڭ بويىمەن سالتاناتتى شەرۋمەن باستادى، دەپ حابارلايدى «ءوز ا» اقپاراتتىق اگەنتتىگى.
اتالعان ب ا ق-تىڭ مالىمەتىنشە، حالىقارالىق قولونەر مۇراجايىنىڭ سالتاناتتى اشىلۋ بولىپ وندا، پرەزيدەنت اكىمشىلىگىنىڭ الەۋمەتتىك دامۋ ءبولىمىنىڭ مەڭگەرۋشىسى و. ابدۋراحمانوۆ، دۇنيەجۇزىلىك قولونەرشىلەر كەڭەسىنىڭ پرەزيدەنتى سااد ءال كادۋمي، فەرعانا وبلىسىنىڭ اكىمى ح. بوزوروۆ بۇل فەستيۆال حالىقتار دوستىعىن نىعايتۋدا ماڭىزدى ءرول اتقاراتىنىن اتاپ ءوتتى.
ايتۋلى شاراعا كەلگەن قوناقتار مۇراجايداعى جادىگەرلەرمەن تانىسقان. وردا الاڭىنداعى پاۆيلونداردا رەسپۋبليكانىڭ ايماقتارىنان جانە شەتەلدەن كەلگەن شەبەرلەردىڭ قولونەر بۇيىمدارىنىڭ كورمەسى مەن ساۋداسى ۇيىمداستىرىلماق.
قازاق بالۋان - الەم چەمپيونى - «TRT»
كۇرەس تۇرلەرىنەن الەم چەمپيوناتىندا قازاق بالۋانى ريزابەك ايتمۇحان الەم چەمپيونى اتاندى.
وسى اپتادا قازاق سپورتىنداعى جاعىمدى جاڭالىقتى تۇركيا راديو تەليەۆيزيا پورتالى دا وقىرماندارىنا ءبولىستى.
تۇركيالىق باسىلىم قازاقستان پرەزيدەنتى قاسىم-جومارت توقايەۆ التىن مەدال جەڭىپ العان سپورتشىنى قۇتتىقتاعانى تۋرالى دا جازعان.
ەسكە سالا كەتەيىك، قازاقستاندىق سپورتشى ريزابەك ايتمۇحان سەربيادا وتكەن كۇرەس تۇرلەرىنەن الەم چەمپيوناتىندا التىن مەدال جەڭىپ العان بولاتىن.
92 كەلىدە سىنعا تۇسكەن ايتمۇحان فينالدا ءازىربايجاندىق وسمان نۋرماگومەدوۆپەن بەلدەستى. قازاقستاندىق پالۋان 4-2 ەسەبىمەن جەڭىسكە جەتكەن ەدى.
بۇل اتاۋلى جەڭىستى قازاقستان پرەزيدەنتى قاسىم-جومارت توقايەۆ سپورتشىنى جەڭىسىمەن قۇتتىقتاعان.
«توقايەۆ ايتمۇحاننىڭ قازاقستان تاريحىندا بۇل جەڭىسكە قول جەتكىزگەن تۇڭعىش سپورتشى ەكەنىن اتاپ ءوتىپ، «بۇل تاريحي جەتىستىك» دەدى. سونداي-اق ول سپورتشىنىڭ بۇل جەڭىسى كۇرەسكە جاس ۇرپاقتىڭ قۇلشىنىسىن ارتتىرۋعا سەپتىگىن تيگىزەتىنىنە سەنەتىنىن ءبىلدىردى»، دەپ جازدى «TRT».
سونداي-اق وسى اپتادا اتالعان تۇركيالىق ب ا ق-تا «ستامبۋلدان استانا مەن الماتىعا ۇشاتىن ۇشاق سانى ارتادى» دەگەن تاقىرىپتاعى اقپارات جاريالاندى.
تۇركيا راديو تەليەۆيزيا پورتالىنىڭ دەرەگىنشە، ق ر كولىك مينيسترلىگىنىڭ ازاماتتىق اۆياتسيا كوميتەتى «Turkish Airlines» باسشىلىعىمەن كەزدەسكەن. كەزدەسۋدە ستامبۋل - استانا جانە ستامبۋل - الماتى باعىتتارى بويىنشا رەيستەر سانىن ارتتىرۋ جوسپارلارى تالقىلاندى.
كوميتەت ءتوراعاسى تالعات لاستايەۆ جولاۋشىلارعا قولايلى جاعداي جاساۋ جانە اۋە كەمەلەرىنىڭ جولاۋشىلار وتكىزۋ قابىلەتىن ارتتىرۋ ماسەلەسىنە توقتالدى.
تۇركيالىق ب ا ق-تىڭ مالىمەتىنشە، THY وكىلدەرى «Anadolu Jet»-تى جەكە زاڭدى تۇلعاسى بار كومپانياعا ءبولۋ ارەكەتتەرى تۋرالى ايتقان. بۇل ۇدەرىس اياقتالعاننان كەيىن جاڭا اۆياكومپانيا 2024 -جىلدىڭ ناۋرىز ايىنان باستاپ قازاقستانعا رەيستەردى باستايدى دەپ كۇتىلۋدە.
«Turkish Airlines» اۋە كومپانياسىنا قازاقستانعا ۇشاتىن رەيستەردە بەسىنشى دارەجەدەگى اۋە ەركىندىگىن پايدالانۋ مۇمكىندىگى ۇسىنىلدى.
پارسى ءتىلى - يران مەن قازاقستاننىڭ مادەني ورتاقتىعى - «Parstoday»
وسى اپتادا «Parstoday» اقپارات اگەنتتىگىندە يران مەن قازاقستاننىڭ مادەني ورتاقتىعى تۋرالى شىعىستانۋشى ماماننىڭ پىكىرى بەرىلگەن.
شىعىس تانۋشى عاليا قامباربەكوۆانىڭ ايتۋىنشا، ءارتۇرلى كەزەڭدەردە ساياسي شەكارالار وزگەرگەنىنە قاراماستان، قازاقتار مەن يراندىقتاردىڭ اتا- بابالارى تاريحي كورشى بولعاندىقتان ەكى ەلدىڭ مادەنيەتى مەن ميفولوگياسىندا ۇقساستىقتار وتە كوپ.
عاليا قامباربەكوۆانىڭ دەرەگىنشە، اللاعا عاشىقتىق، وتانعا دەگەن سۇيىسپەنشىلىك، ادامزاتقا ماحاببات ءاردايىم ءتۇرلى حيكايالار قالىبىندا يران پوەزياسى مەن پروزاسىندا باياندالىپ، ءتۇرلى حالىقتاردىڭ ومىرىندە بيىك ورىنعا يە بولعان.
سونداي-اق ول «شاحنامانىڭ» تاريحي ماڭىزدىلىعىنا توقتالىپ، «ورتا عاسىردا بۇل كىتاپتىڭ «ورتالىق ازيانىڭ ورتاق تۇركى» تىلىنە اۋدارىلۋى وزبەك جانە قازاق شايىرلارىنىڭ شاحناما داستاندارىن باسقا تاسىلدەرمەن قايتا جىرلاۋىنا سەبەپ بولعانىن ايتادى.
قاشقارداعى مىڭ جىلدىڭ ءدامى بار بايىرعى شايحانا - «جەنمين جيباو»
شينجاڭنىڭ قاشقار قالاسىنداعى كوشەلەردىڭ بىرىندە تاريحى تىم تەرەڭدە جاتقان عاسىرلىق شايحانانى كورۋگە بولادى. بۇل جەرگىلىكتى تۇرعىندار ءۇشىن ماڭىزدى كەزدەسۋ ورنى، سونىمەن قاتار تۋريستەردى جەرگىلىكتى مادەنيەتپەن تانىستىرۋعا مۇمكىندىك بەرەتىن تاپتىرماس ورىن.
بۇل تۋرالى وسى اپتادا قىتايلىق «جەنمين جيباو» باسىلىمى حابارلادى.
قاشقاردا كۇز كەلگەنىمەن ءالى دە ساياحاتشىلاردىڭ اياعى ۇزىلگەن جوق. بايىرعى شايحانا ءار كۇنى ءار جەردەن كەلگەن قوناقتاردى كۇتىپ الادى. ادامدار وسى ارادا ايالداپ، اس ىشەدى. بۇل شايحانادان بايىرعى جىبەك جولىنداعى مىڭ جىلدان بەرى جالعاسىپ كەلە جاتقان شايدىڭ قوش ءيىسى اڭقيدى»، دەپ جازادى قىتايلىق ب ا ق.
اۆتورى بەيسەن سۇلتان ۇلى