چەح تاۋلارىنان قۇنى 340 مىڭ دوللار تۇراتىن التىن قازىنا تابىلدى
استانا. KAZINFORM - چەحيانىڭ گرادەتس-كرالوۆە قالاسىنداعى شىعىس بوگەميا مۋزەيى ⅩⅩ عاسىردىڭ التىن قازىناسى تابىلعانىن جاريالادى. ونىڭ قۇنى 340 مىڭ ا ق ش دوللارىنان اسادى، دەپ حابارلايدى AZƏRTAC.
اقپاندا تۋريستەر توبى ەلدىڭ سولتۇستىك- شىعىسىنداعى كركونوشە تاۋىنىڭ ەتەگىن زەرتتەۋ كەزىندە اليۋمينييدەن جاسالعان جاشىك تاۋىپ الادى. ونىڭ ىشىنەن 11 بولەك ۇيىندىگە مۇقيات بولىنگەن، جۇقا قارا ماتاعا ورالعان 600 التىن تيىن شىققان. جانىنان ەكىنشى جاشىك تابىلىپ، ونىڭ ىشىنەن 16 پورتسيگار، 10 بىلەزىك، تاراق، شىنجىر مەن قاپتامالار تابىلعان. بارلىعى سارى مەتالدان جاسالعان، ناقتى قۇرامىن زەرتتەۋ الدا.
سالماعى 7 كەلىدەن اساتىن قازىنا تەز ارادا شىعىس بوگەميا مۋزەيىنە بەرىلگەن. ارحەولوگتار سول كەزدەن بەرى ونى زەرتتەپ جاتىر. تيىندار فرانسيا، بەلگيا، رەسەي، يتاليا، رۋمىنيا، اۆسترو- ۆەنگريا مەن وسمان يمپەرياسىنان شىققان. قىزىعى، نەمىس جانە چەحوسلوۆاكيالىق تيىندار جوق.
كوپشىلىگى فرانسۋز تيىندارى، ال جالپى قازىنا 1808- 1915-جىلدار ارالىعىنا جاتادى. ەرەكشە جايت - اۆسترو- ۆەنگريا تيىندارى يۋگوسلاۆيادا 1921 -جىلى قايتا شىعارىلعانى كورسەتىلگەن.
- قازىنا جەر استىندا ءجۇز جىلدان استام ۋاقىت جاتقان. 1921 -جىلى بۇل تيىندار چەحيا جەرىندە بولماعانى دا انىق. ولار سول كەزدە بالقاندا بولعان بولۋى مۇمكىن، - دەدى مۋزەيدىڭ تيىندار جونىندەگى مامانى ۆويتەح برادل.
ماماندار قازىنانىڭ جاسىرىلۋ سەبەپتەرى ءارتۇرلى بولۋى مۇمكىن ەكەنىن ايتادى: بۇل 1938 -جىلى ەكىنشى دۇنيەجۇزىلىك سوعىس قارساڭىندا، نەمەسە سوعىس كەزىندەگى يەۆرەيلەر مەن چەحتاردىڭ دەپورتاتسياسى كەزىندە، نە 1945 -جىلدان كەيىن نەمىستەردى ەلدەن شىعارۋ بارىسىندا جاسىرىلعان بولۋى ىقتيمال. تاعى ءبىر بولجام - 1953 -جىلعى كەڭەس وداعى ەنگىزگەن اقشا رەفورماسىنا بايلانىستى.
- قۇندى زاتتاردى جەرگە كومۋ كونە داۋىردەن بەرى جالعاسىپ كەلە جاتقان تاجىريبە. بۇل جەردە تيىنداردىڭ قۇنى ەمەس، ولاردىڭ التىن بولعانى ماڭىزدى، - دەيدى مۋزەيدىڭ ارحەولوگيا ءبولىمىنىڭ باسشىسى ميروسلاۆ نوۆاك.
قازىنا ءالى دە زەرتتەلىپ جاتىر، ال مۋزەي بولاشاقتا ونى كوپشىلىككە كورسەتۋ ءۇشىن ەكسپوزيتسيا ۇيىمداستىرماق.