گۋگل كومپانياسى يزرايلمەن كەلىسىمگە نارازىلىق بىلدىرگەن 28 قىزمەتكەرىن جۇمىستان شىعاردى

لوندون. قازاقپارات - Google وسى اپتادا كومپانيانىڭ يزرايل ۇكىمەتىمەن اراداعى كەلىسىمشارتقا نارازىلىق بىلدىرگەن جيىرمادان استام قىزمەتكەرىن جۇمىستان شىعاردى، دەپ حابارلايدى CNN.

جۇمىسشىلار نيۋ-يورك پەن ساننيۆەيلدەگى (كاليفورنيا شتاتى) Google كەڭسەلەرىندە نارازىلىق اكتسياسىن وتكىزگەنى انىقتالعاننان كەيىن جۇمىستان شىعارىلدى. نارازىلىق بىلدىرۋشىلەر «پايدا ءۇشىن گەنوتسيدكە جول جوق» جانە «ءبىز پالەستينالىق، اراب جانە مۇسىلمان گۋگلشىلەرىن قولدايمىز» دەگەن جازۋلار ۇستاعان.

«نارازىلىق بىلدىرگەن ازداعان قىزمەتكەر ءبىزدىڭ بىرنەشە نىسانعا كىرىپ، كومپانياعا تيەسىلى مۇلىكتەردى قيراتتى. باسقا قىزمەتكەرلەردىڭ جۇمىسىنا فيزيكالىق تۇردە كەدەرگى جاساعان. ولاردىڭ ارەكەتتەرى ءبىزدىڭ ساياساتىمىزدى ايقىن بۇزۋ جانە مۇلدەم قولايسىز مىنەز-قۇلىق بولىپ تابىلادى»، - دەيدى Google وكىلى.

«قازىر ءبىز 28 قىزمەتكەردى جۇمىستان شىعارۋعا اكەلگەن جەكە تەرگەۋلەردى اياقتادىق جانە تەرگەۋدى جانە قاجەت بولعان جاعدايدا شارا قولدانۋدى جالعاستىرامىز»، - دەپ قوستى ول.

Google كومپانياسىنىڭ No Tech for Apartheid دەپ اتالاتىن ءبولىمى قىزمەتكەرلەرى 2021 -جىلدان بەرى قولدانبانىڭ يزرايلگە تەحنولوگيا ساتۋ تۋرالى كەلىسىمىنە نارازىلىق ءبىلدىرىپ حات جازىپ كەلەدى. اتاپ ايتقاندا، Google يزرايل مەن Amazon بىرلەسىپ جاساعان Nimbus (رەد. بۇلتتى ينفراقۇرىلىم، مەملەكەتتىك سەكتور مەن اسكەري دەرەكتەردى بۇلتقا كوشىرۋگە باعىتتالعان كوپ جىلدىق جوبا) باعدارلاماسىنا بايلانىستى شيەلەنىس ارتتى.

«بۇل - ورەسكەل ارەكەت Google-دىڭ گەنوتسيدتىك يزرايل ۇكىمەتىمەن جانە اسكەريلەرىمەن جاساعان 1,2 ميلليارد دوللارلىق كەلىسىمىن ءوز قىزمەتكەرلەرىنەن دە جوعارى باعالايتىنىنىڭ ايقىن بەلگىسى»، - دەلىنگەن توپتىڭ بەيسەنبى كۇنى Medium سايتىندا جاريالانعان مالىمدەمەسىندە.

Google Cloud جانە يزرايل

Google Cloud كومپانياسىنىڭ يزرايل ۇكىمەتىمەن كەلىسىم-شارتى 2021 -جىلدان باستالادى. ول كومپانيا «ەلدىڭ قوعامدىق سەكتورىنداعى پروبلەمالاردى، سونىڭ ىشىندە دەنساۋلىق ساقتاۋ، كولىك جانە ءبىلىم بەرۋدى شەشۋگە كومەكتەسەتىن قوعامدىق بۇلتتىق قىزمەتتەردى» ۇسىنۋ ءۇشىن تاڭدالعانىن جاريالادى.

ءبىراق نارازىلىق وسى ايدىڭ باسىندا Time جۋرنالىندا يزرايل قورعانىس مينيسترلىگى Google Cloud تۇتىنۋشىسى بولعانى تۋرالى كومپانيانىڭ ىشكى قۇجاتىنا سىلتەمە جاساعان حاباردان كەيىن باستالعان.

اۆتور

جاراسقان نۇرىبايەۆ