Golden Horde تاريحي سەريالىنىڭ ءتۇسىرىلىمى 2024 -جىلدىڭ كۇزىندە باستالادى
استانا. KAZINFORM —«دارا» پرەزيدەنتتىك باستامالار قورى Karga Seven Pictures كومپانياسىمەن بىرلەسە وتىرىپ، شىڭعىس حاننىڭ ۇلكەن ۇلى جوشى حاننىڭ ومىرىنەن سىر شەرتەتىن اعىلشىن تىلىندەگى التى ءبولىمدى گيبريدتى دەرەكتى درامانى ءتۇسىرۋدى باستادى. بۇل تۋرالى قوردىڭ باسپا ءسوز قىزمەتى حابارلادى.
سەريالدا جوشى حاننىڭ ءومىر تاريحى ارقىلى التىن وردا يمپەرياسىنىڭ دامۋ كەزەڭدەرى كورسەتىلەدى.
سەريالعا كرەاتيۆتى ديرەكتور ەمرە شاحيننىڭ جەتەكشىلىگىمەن Karga Seven Pictures پروديۋسەرلىك ەتەدى.
ءوندىرىس 2024 -جىلدىڭ كۇزىندە قازاقستان مەن تۇركيادا باستالادى دەپ جوسپارلانىپ وتىر.
Karga Seven Pictures Netflix ءۇشىن 90 نان استام ەلدە ۇزدىك 10 سەريالدىڭ قاتارىنا كىرگەن «يمپەريانىڭ ورلەۋى: وسمان يمپەرياسى» جانە «وسيەت: مۇسانىڭ باسىنان كەشكەندەرى» سياقتى ءىرى تاريحي دەرەكتى درامالاردى تۇسىرگەن.
— جوشى حاننىڭ ءومىر تاريحى كەرەمەت، ول الەم كورەرمەندەرى اراسىندا ۇلكەن قىزىعۋشىلىق تۋدىراتىنى ءسوزسىز. وسى اۋقىمدى تاريحي جوبانى ىسكە اسىرۋ ءۇشىن Dara قورىمەن ىنتىماقتاسۋ - ءبىز ءۇشىن ۇلكەن مارتەبە، - دەپ اتاپ ءوتتى Karga Seven Pictures كرەاتيۆتى ديرەكتورى ەمرە شاحين.
2024-جىلى جوشى ۇلىسىنىڭ قۇرىلعانىنا 800 جىل تولادى.
وسى اتاۋلى داتاعا ارنالعان تاريحي دەرەكتى جوبا مەملەكەتتىگىمىزدىڭ سان عاسىرلىق تاريحىن قامتىماقشى.