GE Healthcare الاڭدارىندا 6 مىڭ قازاقستاندىق مامان وقىتىلدى.
استانا. KAZINFORM - پرەمەر- مينيستر ولجاس بەكتەنوۆ جاھاندىق ينۆەستيتسيا جونىندەگى قازاقستاندىق دوڭگەلەك ۇستەل اياسىندا GE HealthCare وڭىرلىك پرەزيدەنتى كوستاس دەليگياننيسپەن كەزدەسۋ وتكىزدى. بۇل تۋرالى ۇكىمەتتىڭ باسپا ءسوز قىزمەتى حابارلادى.
مەملەكەت باسشىسى قاسىم-جومارت توقايەۆتىڭ قاتىسۋىمەن قول قويىلعان قازاقستان اۋماعىندا GE HealthCare جوعارى تەحنولوگيالىق دياگنوستيكالىق مەديتسينالىق جابدىقتارىنىڭ جاڭا ءوندىرىسىن ۇيىمداستىرۋ تۋرالى كەلىسىمدى جۇزەگە اسىرۋ بارىسى قارالدى.
General Electric امەريكالىق ترانسۇلتتىق كونگلومەراتىنىڭ ەنشىلەس كاسىپورنى GE HealthCare مەديتسينالىق جابدىقتار، فارماتسيەۆتيكالىق پرەپاراتتار وندىرۋدە، سونداي-اق سالاداعى تسيفرلىق شەشىمدەر مەن دەرەكتەردى تالداۋ جۇيەلەرىن ەنگىزۋدە الەمدىك كوشباسشىلاردىڭ ءبىرى.
كەزدەسۋگە قاتىسۋشىلار وزىق مەديتسينالىق دياگنوستيكالىق قۇرال-جابدىقتار ءوندىرىسىن لوكاليزاتسيالاۋ ماسەلەلەرىن، قازاقستاندا وندىرىستىك الاڭ مەن كلينيكالىق بەينەلەردىڭ ورتالىقتاندىرىلعان ۇلتتىق مۇراعاتىن قۇرۋ جوسپارلارىن تالقىلادى. لوكاليزاتسيالاۋدىڭ ءبىرىنشى كەزەڭىندە شىعارىلاتىن جابدىقتار جەلىسىن ودان ءارى كەڭەيتە وتىرىپ، سوڭعى بۋىننىڭ كومپيۋتەرلىك توموگرافتارى مەن ۋلترادىبىستىق دياگنوستيكا اپپاراتتارىن شىعارۋ جوسپارلانىپ وتىر. مەديتسينالىق بەينەلەردىڭ ورتالىقتاندىرىلعان مۇراعاتى پاتسيەنتتەردىڭ مەديتسينالىق دەرەكتەرىنىڭ قاۋىپسىزدىگىن جانە دۇرىس ساقتالۋىن قامتاماسىز ەتەتىن ءبىرىڭعاي تسيفرلىق دەنساۋلىق ساقتاۋ كەڭىستىگىن قۇرۋعا مۇمكىندىك بەرەدى.
ولجاس بەكتەنوۆ ۇكىمەت جۇمىسى باسىم باعىتتارىنىڭ ءبىرى قازاقستاندىقتاردىڭ قاۋىپسىزدىگى مەن دەنساۋلىعىن قامتاماسىز ەتۋگە بادارلانعان ساپالى، قولجەتىمدى ءارى زاماناۋي مەديتسينالىق ينفراقۇرىلىم قۇرۋ ەكەنىن اتاپ ءوتتى. دەنساۋلىق ساقتاۋ سالاسىندا سيفرلىق شەشىمدەر ەنگىزۋدىڭ، اۋرۋحانالاردى جاڭعىرتۋ مەن ساپالى جابدىقتاۋدىڭ، بىلىكتى كادرلار دايارلاۋدىڭ ماڭىزدىلىعى ايتىلدى.
ءوز كەزەگىندە كوستاس دەليگياننيس كومپانيانىڭ قازاقستاندىق نارىقتاعى قاتىسۋىن كەڭەيتۋ جوسپارلارى تۋرالى باياندادى. ەلىمىزدىڭ مەديتسينالىق مەكەمەلەرى، سونىڭ ىشىندە جەتەكشى كلينيكالار قازىردىڭ وزىندە 3 مىڭنان استام GE Healthcare جابدىعىن پايدالانادى. مەملەكەتتىك ونكولوگيالىق باعدارلاما اياسىندا وڭىرلەردە جۇزدەن استام مامموگرافتار قۇرىلدى. GE Healthcare الاڭدارىندا 6 مىڭ قازاقستاندىق مامان وقىتىلدى.
كەزدەسۋ قورىتىندىسى بويىنشا تاراپتار ەلىمىزدىڭ دەنساۋلىق ساقتاۋ جۇيەسىن جەتىلدىرۋ اياسىندا تىعىز ىنتىماقتاستىققا نيەتتى ەكەنىن راستادى.