فينالدا جەڭىلىپ قالعان قىزدى شاپالاقپەن تارتىپ جىبەرگەن باپكەر جازالاندى

استانا. قازاقپارات - تاەكۆوندودان البانيا استاناسى تيرانادا وتكەن تۋرنيردەگى وقيعا الەم نازارىن اۋداردى. فينالدا جەڭىلگەن 8 جاسار قىزدى جاتتىقتىرۋشىسى شاپالاقپەن بەتىنەن تارتىپ جىبەرگەن.

Telegrafi اقپارات كوزى Koha.net مەدياعا سىلتەمە جاساپ حابارلاعانداي، جاتتىقتىرۋشى قىزدىڭ اكەسى بولعان. ول ءوزىنىڭ ارەكەتىن اشۋمەن ەمەس، قىزىن جىگەرلەندىرۋ ماقساتىندا ۇرعانىن ايتقان. ب ا ق مالىمەتىنشە، باپكەر التى ايعا جۇمىستان شەتتەتىلدى.

«مەن ونى سابىرعا شاقىرۋىم كەرەك بولدى، ويتكەنى ول بۇل جاعدايدى جۇرەگىنە تىم جاقىن قابىلدادى. ونى جىگەرلەندىرىپ، ەسىن جيعىم كەلدى. ول جەڭىلگەننەن كەيىن جىلاپ، ايقايلاي باستادى جانە مەن ونىڭ باسقالاردىڭ الدىندا وسىنداي كۇيدە بولعانىن قالامادىم. بۇل ءبىرىنشى ورىن ءۇشىن كۇرەس بولاتىن. ول ەكىنشى ورىندى يەلەندى، ءبىراق قارسىلاسىنان الدەقايدا جاقسى بولدى. ول نەبارى 8 جاستاعى قىز جانە جىلاپ جىبەردى. مەن وعان سابىر ساقتاۋدى ايتتىم»، - دەپ ايتقان قىزدىڭ اكەسى ۆالمير فەتيۋ.

سونداي-اق VoxNews مالىمەتىنشە، بۇل وقيعاعا كوسوۆو بالالاردى قورعاۋ كواليتسياسى پىكىر ءبىلدىرىپ، ونىڭ بالالاردىڭ قۇقىقتارىن بۇزاتىنىن جانە ەشقانداي اقتاۋعا كەلمەيتىنىن مالىمدەدى.

«زورلىق-زومبىلىقتى اقتاۋعا بولمايدى، ول ەشقاشان ءتارتىپ قۇرالى رەتىندە قولدانىلماۋى كەرەك، ويتكەنى ول بالالاردىڭ ەموتسيونالدىق ءال-اۋقاتىنا جانە پسيحولوگيالىق دامۋىنا زيان كەلتىرەدى، قۇرمەت پەن وزىنە دەگەن سەنىمنىڭ ورنىنا قورقىنىش پەن ۇرەي تۋدىرادى. سپورت فەدەراتسيالارى مەن كلۋبتارى بالالاردى قورعاۋ ءۇشىن ارنايى ەرەجەلەر مەن راسىمدەرگە باعىنۋى كەرەك، بۇل بالالار قۇقىقتارىنىڭ بۇزىلۋىن بولدىرماۋعا جانە ولارعا جاۋاپ بەرۋگە باعىتتالعان ىشكى جۇيەنى قۇرۋعا مۇمكىندىك بەرەدى. ءبىز بالالاردىڭ نەگىزگى قۇقىقتارى قورعالعان، قاۋىپسىز جانە قامقورلىقپەن قامتاماسىز ەتىلگەن ورتادا ءوسۋىن قامتاماسىز ەتۋگە جاۋاپتىمىز»، - دەپ حابارلايدى اقپارات كوزى.