فيلمگە بيۋدجەتتەن جارتى ميلليارد تەڭگە جۇمساپ، 325 ادام كورۋ ءۇشىن عانا تۇسىردىك پە - دەپۋتات
استانا. KAZINFORM - بۇگىن ءماجىلىستىڭ جالپى وتىرىسىندا دەپۋتات داۋلەت مۇقايەۆ مەملەكەت قاراجاتىنا تۇسىرىلگەن فيلمدەردىڭ ساپاسىنا سىن ايتتى.
«كينو - ونەر. كينو - بيزنەس. كينو - يدەولوگيانىڭ نەگىزگى قۇرالى. 2023 -جىلعى 17-ماۋسىمدا مەملەكەت باسشىسى قاسىم- جومارت توقايەۆ تۇركىستان قالاسىندا وتكەن ۇلتتىق قۇرىلتايدا وتاندىق كينو سالاسىن رەفورمالاۋ قاجەت ەكەنىنە ناقتى توقتالدى. ءبىراق بۇل سالاداعى ايقاي تولاستار ەمەس. كينو تۇسىرگىسى كەلگەندەر كوبەيگەنمەن، ولاردىڭ دەنى ءوز قاراجاتىنا ءتۇسىرىپ جاتىر. مەملەكەتتەن بولىنەتىن قارجىنىڭ كوبى «ءوز ارالارىندا» قالىپ جاتقانداي كورىنەدى. ويتكەنى، ۇلتتىق كينونى قولداۋ ورتالىعىنىڭ فيلمدەرى نە سۇرانىسقا، نە حالىقتىڭ قولداۋىنا يە ەمەس. ءتىپتى، حالىق قازىناسىنداعى قارجىنى ميلليونداپ قۇمعا قۇيىپ جاتقاندايمىز. ماسەلەن، 2019-2023 -جىلدار ارالىعىندا وتاندىق 100 فيلمگە شامامەن 23 ميلليارد تەڭگە بولىنگەن. ەڭ قىزىعى، ونىڭ ءبارى 100 پايىز يگەرىلگەن. ەسەبى تاپسىرىلىپ، كينو تۇسىرىلگەن»، - دەدى د. مۇقايەۆ مادەنيەت جانە اقپارات ءمينيسترى ايدا بالايەۆانىڭ اتىنا جولداعان دەپۋتاتتىق ساۋالىندا.
ونىڭ ايتۋىنشا، Atlas entertainment كومپانياسى تۇسىرگەن وتاندىق «ۆرەميا پاتريوتوۆ» فيلمىنە 1 ميلليارد قارجى جۇمسالسا، ونىڭ كاسسالىق جيناعى نەبارى 10 ميلليون تەڭگە. بۇل - كەتكەن سومانىڭ 1 پايىزى عانا.
Sataifilm تۇسىرگەن «بوكسشى» فيلمىنە 900 ميلليون جۇمسالسا، كاسسالىق جيناق نەبارى 25 ميلليون تەڭگەنى قۇرادى. كينو وتە ساپاسىز ءارى كورەرمەندەرگە اسەر سىيلاي المادى.
«سونداي- اق، مەدەت فيلم تۇسىرگەن «لەتو 1941-گ» وتاندىق كينوسىنا 700 ميلليون قارجى بولىنسە، ونىڭ 2 ميلليونى عانا قايتارىلعان. بۇل كەتكەن شىعىننان 350 ەسەگە از. مۇنىمەن قوسا، «جيزن» فيلمىنە 500 ميلليون كەتسە، نەبارى 650 مىڭ تەڭگەسى قايتقان. مىسالى، ورتا ەسەپپەن كينوتەاترلارداعى بيلەتتىڭ باعاسى 2000 تەڭگەنى قۇراسا، وندا بۇل فيلمدى 325 ادام كورىپتى- مىس. سوندا ءسىز بولىپ، ءبىز بولىپ «جيزن» دەگەن فيلمگە بيۋدجەتتەن جارتى ميلليارد كەتىرىپ، 325 ادام كورۋ ءۇشىن عانا تۇسىردىك پە؟ ! ياعني، مەملەكەتتەن بولىنگەن قاراجاتقا تۇسىرىلگەن فيلمدەردى دە حالىقتىڭ كورىپ قۋانىپ جاتقانى شامالى، وتاندىق كينووندىرۋشى ۇيىمداردىڭ كينوتەاتردا فيلم كورسەتۋىندە تاعى وزىندىك پروبلەما بار. ول - جارنامانىڭ السىزدىگى، وعان ارنايى قاراجاتتىڭ قاراستىرىلماۋى. مەملەكەت قولداۋىمەن تۇسىرىلگەن فيلمدەردىڭ جارناماسى جوقتىڭ قاسى. قانشاما فيلم ءتۇسىرىلىپ، شاڭ باسقان ارحيۆتەردە جاتىر. تاۋەلسىزدىكتەن بەرى قاراي مەملەكەت قارجىسىنا 600 دەن اسا فيلم تۇسىرىلسە، سونىڭ ىشىندە ءوز- ءوزىن اقتاپ، پايداعا شىققان فيلم - تەك «دوسمۇقاسان» عانا. بيىلعى ۇلتتىق كينو ورتالىعىنىڭ پيتچينگتى وتە ءساتتى ۇيىمداستىرعانىن كوردىك. فيلمدەر ادىلەتتى ءارى الەۋمەتتىك جەلىدە اشىق تاڭدالدى. سوندىقتان، جاڭا باسشىلىققا جوعارىداعى ماسەلەلەردى قاتاڭ ەسكەرۋ قاجەتتىگىن ايتامىز»، - دەدى دەپۋتات.
ونىڭ پايىمىنشا، مەملەكەتتەن قارجىلىق قولداۋ الۋعا ءۇمىتتى كينوجوبالارىمەن كەلگەن كينوگەرلەردى قولداۋدىڭ جان-جاقتى مەحانيزىمىن جەتىلدىرۋ قاجەت.