فوتورەپورتاج: الماتى «دۇنيەجۇزىندەگى قولونەر قالالارىنىڭ» تىزىمىنە ەنۋى مۇمكىن
الماتى. KAZINFORM - دۇنيەجۇزىلىك قولونەر كەڭەسى الماتى قالاسىن «دۇنيەجۇزىندەگى قولونەر قالالارىنىڭ» تىزىمىنە قوسۋ ماسەلەسىن قاراستىرىپ جاتىر.
وسى ورايدا، ق ر ورتالىق مەملەكەتتىك مۋزەيىندە قازاقستان قولونەرشىلەر وداعى مەن الماتى قولونەر پالاتاسىنىڭ باستاماسىمەن «الماتى -دۇنيەجۇزىلىك قولونەر قالاسى» كورمە-جارمەڭكەسى ۇيىمداستىرىلدى.
الەم بويىنشا ءارتۇرلى قالالاردا قولونەر كورمەلەرىن ۇيىمداستىرىپ، «دۇنيەجۇزىندەگى قولونەر قالالارىنىڭ» ءتىزىمىن جاساۋدى 2014 -جىلى دۇنيەجۇزىلىك قولونەر كەڭەسى قولعا العان. سول ۋاقىتتان بەرى تىزىمگە 67 قالا قوسىلعان. ولاردىڭ 11 ءى وڭتۇستىك امەريكادا، 47 ءسى ازيا-تىنىق مۇحيتى ايماعىندا، ال 7 ەۋى ەۋروپادا ورنالاسقان. بۇل تۋرالى دۇنيەجۇزىلىك قولونەر كەڭەسىنىڭ پرەزيدەنتى سااد بال ءال- كاددۋمي ايتتى.
- مەن قازاقستانعا ءبىرىنشى رەت كەلىپ تۇرعان جوقپىن. بۇعان دەيىن «دۇنيەجۇزىندەگى قولونەر قالالارىنىڭ» تىزىمىنە قوسىلعان تاراز قالاسىندا بولعانمىن. قازاقستاندا قولونەر سالاسى جاقسى دامىپ كەلە جاتىر. الماتىنىڭ قولونەرشىلەر قالاسى رەتىندە ءوتىنىش بەرۋى ءبىزدىڭ 60 جىلدىق مەرەيتويىمىزبەن تۇسپا تۇس كەلىپ تۇر. سوندىقتان الماتى بۇل تىزىمگە ەنەدى دەپ ويلايمىن. قالانىڭ وسى سالا بويىنشا الەۋەتى جوعارى، - دەدى دۇنيەجۇزىلىك قولونەر كەڭەسىنىڭ پرەزيدەنتى.
ال الماتى قالاسى تۋريزم باسقارماسىنىڭ باسشىسى عاليا توقسەيىتوۆا قولونەر سالاسى ءتۋريزمنىڭ دامۋىنا تىكەلەي اسەر ەتەتىنىن اتاپ ءوتتى.
- الماتىدا 250 دەن استام قولونەر شەبەرى بار. ولاردىڭ قاتارىنا زەرگەرلىك ونەردەن باستاپ، بىلعارى وڭدەۋ، قۇراق جاساۋ، اعاش ويۋ جانە وزگە دە قولونەر تۇرلەرى كىرەدى. ايتا كەتكەن ءجون، قولونەر سالاسى تۋريزممەن ءوزارا تىعىز بايلانعان. قالامىزعا كەلگەن تۋريستەر قولونەر بۇيىمدارىنىڭ ارتۇرلىلىگىن ءجيى اتاپ وتەدى، - دەدى عاليا توقسەيىتوۆا.
دۇنيەجۇزىلىك قولونەر كەڭەسىنىڭ ازيا-تىنىق مۇحيتى ءوڭىرى بويىنشا پرەزيدەنتى ءازيز مۇرتازايەۆ الماتى جىل سوڭىندا ۇيىمعا قوسىلۋى مۇمكىن ەكەنىن ايتتى.
- الماتى ءبىر جىلدام استام ۋاقىت دايىندالىپ، بيىل ماۋسىم ايىندا «دۇنيەجۇزىندەگى قولونەر قالالارىنىڭ» قاتارىنا قوسىلۋعا ءوتىنىش بەردى. بۇل ءوتىنىش الداعى ۋاقىتتا قارالىپ، جىل سوڭىندا دەيىن الماتى وسى مارتەبەگە يە بولادى دەپ ۇمىتتەنەمىن. ءبىراق بۇل مارتەبە قالانىڭ وزىنە نە بەرەدى دەيتىن بولساق، الماتى ءوزىنىڭ مادەني ءارى تاريحي مۇراسىن ساقتاي العانىن جانە قولونەر سالاسى جاقسى دامىعانىن الەم الدىندا دالەلدەيدى. سونداي- اق «دۇنيەجۇزىندەگى قولونەر قالالارىنىڭ» قاتارىنا قوسىلۋ ءتۋريزمنىڭ دامۋىنا دا وڭ اسەر ەتەدى، - دەدى ءازيز مۇرتازايەۆ.
ەسكە سالايىق، بۇعان دەيىن الماتىدا قانشا قوناق ءۇي بار ەكەنىن جازعانبىز.