فۋتبولدان قازاقستان قۇراماسىنىڭ باس باپكەرى تاعايىندالدى

 استانا. KAZINFORM - فۋتبولدان قازاقستان ۇلتتىق قۇراماسىنىڭ باس باپكەرى قىزمەتىنە رەسەيلىك مامان ستانيسلاۆ چەرچەسوۆ تاعايىندالدى.

بۇل جونىندە قازاقستان فۋتبول فەدەراتسياسى رەسمي تۇردە حابارلادى.

ستانيسلاۆ چەرچەسوۆ فۋتبولشى مانسابىندا رەسەيدىڭ «سپارتاك» (وردجونيكيدزە)، «سپارتاك» (ماسكەۋ)، «لوكوموتيۆ» (ماسكەۋ) جانە گەرمانيانىڭ «دينامو» (درەزدەن) كلۋبتارىندا ويناعان.

باپكەرلىك قىزمەتىندە رەسەيدىڭ «سپارتاك» (ماسكەۋ)، «جەمچۋجينا»، «تەرەك»، «امكار»، «دينامو» (ماسكەۋ) سىندى كوماندالاردا ەڭبەك ەتتى. سونداي- اق ول رەسەي قۇراماسى، پولشانىڭ «لەگيا»، ۆەنگريانىڭ «فەرەنتسۆاروش» كوماندالارىندا باس باپكەر بولدى.

باپكەرلىك مانسابىندا رەسەي چەمپيوناتىنىڭ كۇمىس جۇلدەگەرى اتانسا، پولشا چەمپيونى، پولشا كۋبوگىنىڭ جەڭىمپازى اتاندى. وعان ۆەنگريانىڭ ەكى مارتە چەمپيونى جانە كۋبوگىنىڭ يەگەرى بولدى.

رەسەي قۇراماسىمەن 2018 -جىلعى الەم چەمپيوناتىنىڭ 1/4 فينالىنا دەيىن جەتتى.

ەسكە سالساق، بۇدان بۇرىن ماگومەد اديەۆ قازاقستان فۋتبول قۇراماسى باس باپكەرى قىزمەتىنەن كەتتى.

ماگومەد اديەۆ 2022 -جىلدىڭ 27-ساۋىرىنەن قازاقستان قۇراماسىنىڭ باس باپكەرى قىزمەتىن اتقارىپ كەلدى.

سودان بەرى 22 ويىننىڭ 11 ىندە جەڭىسكە جەتىپ، 1 ىندە تەڭ ويناسا، قالعانىندا قارسىلاستارعا ەسە جىبەردى.

قازاقستان قۇراماسى ەندى 7-مامىردا ارمەنيا، 10-ماۋسىمدا ءازربايجان قۇرامالارىمەن جولداستىق كەزدەسۋ وتكىزەدى.