فۋتبولدان قازاقستان قۇراماسىنىڭ باس باپكەرى قىزمەتىنەن كەتە مە

استانا. KAZINFORM -تۋريزم جانە سپورت ءمينيسترى ەرمەك مارجىقپايەۆ فۋتبولدان قازاقستان قۇراماسىنىڭ باس باپكەرىنە قاتىستى پىكىر ايتتى.

«فۋتبولدان قازاقستان قۇراماسىنىڭ باس باپكەرى ماگومەد اديەۆ اۋىسپايدى. ونىڭ جۇمىس ىستەيتىنىنە سەنىمدىمىز. وعان قاتىستى (ماگومەد اديەۆپەن) كەلىسىمشارت 2025-جىلى بىتەدى»، - دەدى ە. مارجىقپايەۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ايتا كەتەيىك، بۇگىن ءماجىلىستىڭ الەۋمەتتىك-مادەني دامۋ كوميتەتىنىڭ وتىرىسىندا قازاقستان فۋتبول قۇراماسىنىڭ باس باپكەرى ماگومەد اديەۆتى ورنىنان الۋ تۋرالى ۇسىنىس ايتىلدى. دەپۋتاتتار الدىندا ەلدەگى سپورت پەن تۋريزمنىڭ دامۋ بارىسى تۋرالى ەسەپ بەرگەن تۋريزم جانە سپورت ءمينيسترى ەرمەك مارجىقپايەۆقا فۋتبولدىڭ توڭىرەگىندە سۇراق كوپ قويىلدى.

«فۋتبول جانكۇيەرى رەتىندە ءوتىنىشىم بار. ۇلتتىق قۇراماداعى باس باپكەرىمىزگە كوز تيگەن بە، بىردەڭە. «احمات» ويناسا دا جەتى گول كىرگىزەدى، بىزدە ويناسا دا بەس گول كىرگىزەدى. وسى كىسىنىڭ بىلىكتىلىگى جايلى ماسەلە كوتەرىپ، اۋىستىرۋ كەرەك سياقتى»، - دەدى ءماجىلىس دەپۋتاتى رينات زايتوۆ.

ەسكە سالا كەتەيىك، جاقىندا ماگومەد اديەۆ رەسەيدىڭ «احمات» كومانداسىنىڭ باس باپكەرى قىزمەتىنە تاعايىندالدى.

ماگومەد اديەۆ 2022-جىلدان بەرى قازاقستان قۇراماسىنىڭ باس باپكەرى قىزمەتىن اتقارىپ كەلەدى. سودان بەرى 22 ويىننىڭ 11 دە جەڭىسكە جەتىپ، 1 دە تەڭ ويناسا، قالعانىندا قارسىلاستارعا ەسە جىبەردى.