فۋتبولدان قازاقستان قۇراماسى جولداستىق كەزدەسۋدە تۇركىمەنستاندى جەڭدى

استانا. KAZINFORM - فۋتبولدان قازاقستان ۇلتتىق قۇراماسى بۇگىن، 14-ناۋرىزدا تۇركىمەنستانمەن جولداستىق كەزدەسۋ وتكىزدى.

بۇگىنگى تۇرىكمەنستان قۇراماسىمەن جابىق جولداستىق ويىن ءوتتى. ول تەلەارنالار ارقىلى كورسەتىلگەن جوق.

كەزدەسۋ بارىسىندا قازاقستاندىق فۋتبولشىلار قارسىلاس قۇراما قاقپاسىنا جاۋاپسىز ەكى گول سوقتى. ەل قۇراماسىنان يسلام چەسنوكوۆ 2، الەكساندر زۋيەۆ 47-مينۋتتا مەرگەندىك تانىتتى.

وسىلايشا ولار قارسىلاسىنان 2:0 ەسەبىمەن باسىم ءتۇستى.

ەكى قۇراما بۇعان دەيىن ءۇش مارتە كەزدەستى. بىرەۋىندە قازاقستاندىق فۋتبولشىلار جەڭىسكە جەتسە، ەكەۋىندە تەڭ ناتيجە تىركەلدى.

بۇل ويىن ۇلتتىق قۇرامانىڭ بىرىككەن اراب امىرلىگىندە وقۋ-جاتتىعۋ جيىنى اياسىندا ۇيىمداستىرىلىپ وتىر. ب ا ءا- ءنىڭ دۋباي قالاسىندا ءوتىپ جاتقان وقۋ-جاتتىعۋ جيىنىنا ويىنشىلاردىڭ باسىم بولىگى جينالدى.

ايتا كەتسەك، بىرىككەن اراب امىرلىكتەرىندە وتەتىن وقۋ-جاتتىعۋ جيىنى 19-ناۋرىزعا دەيىن سوزىلادى. قازاقستان قۇراماسى ۇلتتار ليگاسىندا س جولىمەن 2024 -جىلدىڭ 21-ناۋرىزىندا جارتىلاي فينالدا سىرت الاڭدا گرەكيامەن كەزدەسەدى.

جەڭگەن جاعدايدا 26-ناۋرىزدا تاعى دا سىرت الاڭدا گرۋزيا-ليۋكسەمبۋرگ جۇبىنىڭ جەڭىمپازىمەن شەبەرلىك بايقاسادى.

اۆتور

ءادىلجان ۇمبەت