فەرمەرلەردەن استىق ساتىپ الۋعا قوسىمشا قاراجات بولىنەدى - مينيستر
استانا. KAZINFORM – ق ر اۋىل شارۋاشىلىعى ءمينيسترى ايداربەك ساپاروۆ ازىق- تۇلىك كورپوراتسياسى ارقىلى شارۋالاردان استىقتى تىكەلەي ساتىپ الۋ جوسپارىنا تۇسىنىك بەردى.
«بۇل تۇرعىدا مەملەكەت باسشىسى تاپسىرما بەردى. ەرتەڭ ۇكىمەت وتىرىسىندا ازىق- تۇلىك كورپوراتسياسى ارقىلى فەرمەرلەردەن تىكەلەي استىق ساتىپ الۋ تاقىرىبىن تالقىلايمىز. باستاپقى 10 ميلليارد تەڭگەنى ءبولۋدى قارجى مينيسترلىگى دايىنداپ جاتىر. وسى قاراجاتقا ساتىپ الۋدى باستاي بەرەمىز. ارى قاراي تاعى قوسىمشا قاراجات بولىنەدى» - دەدى ا. ساپاروۆ پارلامەنت ماجىلىسىندە بيىلعى استىقتى وتكىزۋ ماسەلەسىن تالقىلاۋعا ارنالعان جيىننان كەيىن تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، ازىق-تۇلىك كورپوراتسياسىنداعى جيناقتالعان بيداي ساتىلعاننان كەيىن، وسى بوساعان قاراجات تا فەرمەرلەردى قولداۋعا باعىتتالادى.
«ءدال قازىر شارۋالاردان قانشا استىق تىكەلەي ساتىپ الىناتىنىن كۇن بۇرىن ايتا المايمىن. ەرتەڭ ۇكىمەتتە شەشىم قابىلدانعاننان سوڭ، جالپى كولەمى جاريالانادى»، - دەدى مينيستر.
ەسكە سالساق، جاقىندا پرەزيدەنت ۇكىمەتكە ازىق-تۇلىك كورپوراتسياسى ارقىلى شارۋالاردان استىق ساتىپ الۋدى تاپسىردى.
بۇعان دەيىن حابارلانعانداي، پرەمەر- ءمينيستردىڭ ورىنباسارى سەرىك جۇمانعارين قازاقستان استىعى قاي ەلدەرگە ەكسپورتتالاتىنىن ءتۇسىندىردى.