فەرمەرلەر رەسەي استىعىن قازاقستاندىكى دەپ يران مەن اۋعانستانعا وتكىزىپ كەلگەن

پاۆلودار. KAZINFORM - زاڭسىز استىق يمپورتى بويىنشا وڭىردەگى شارۋا قوجالىقتارىنا قاتىستى 12 قىلمىستىق ءىس تىركەلگەن. ونىڭ ىشىندە مەملەكەتكە 4,1 ميلليارد تەڭگە زالال كەلتىرگەن 10 قىلمىستىق ءىس سوتتا قارالدى.

پاۆلودار وبلىسى بويىنشا ەكونوميكالىق تەرگەپ-تەكسەرۋ دەپارتامەنتى ەڭ قاۋىپتى ءارى كۇدىكتى قارجىلىق وپەراتسيالاردى تالداي كەلىپ، 30 قىلمىستى انىقتاعان.

بۇل زاڭبۇزۋشىلىقتار بويىنشا قىلمىستىق جاۋاپكەرشىلىك ق ر قىلمىستىق كودەكسىنىڭ 216-بابىندا ايقىن كورسەتىلگەن.

كەلگەن زالال 6 ميلليارد تەڭگەدەن اسقان.

ونىڭ 300 ميلليون تەڭگەسى تەرگەۋ پروتسەسى كەزىندە وتەلدى.

- كورشىلەس مەملەكەتتەردە، اتاپ ايتقاندا، رەسەيدە وندىرىلگەن استىقتى ۇلكەن كولەمدە ەلگە اكەلىپ، جالعان شوت- فاكتۋرا جاساۋ ارقىلى تاياۋ شىعىس ەلدەرىنە قازاقستاندىق ءونىم رەتىندە ەكسپورتقا شىعارىپ جاتقاندار انىقتالدى. ولار ءونىمدى كوبىنە اۋعانستان، يران، تاجىكستان سياقتى مەملەكەتتەرگە جىبەرەدى. بۇل ءبىزدىڭ وتاندىق ەكونوميكامىزعا، ءوڭىرىمىزدىڭ شارۋا قوجالىقتارىنا ايتارلىقتاي زيان كەلتىرىپ وتىر. ءوزىمىزدىڭ ونىمدەرىمىز شەتەلگە شىقپاي قالادى نەمەسە ساتىلعان كۇندە دە باعاسى تومەندەپ كەتەدى. سوندىقتان دا مۇنداي زاڭسىز ءىس-ارەكەتتەر ءبىزدىڭ ۇلتتىق ەكونوميكامىزعا ۇلكەن زالال كەلتىرەدى، - دەيدى پاۆلودار وبلىسى بويىنشا ەكونوميكالىق تەرگەپ- تەكسەرۋ دەپارتامەنتىنىڭ باسشىسى ەرىك ەسەنوۆ.

وبلىستاعى جۇيەلى پروبلەمالاردىڭ ءبىرى - زاڭسىز استىق يمپورتى. بۇل رەتتە شارۋا قوجالىقتارىنا قاتىستى 12 قىلمىستىق ءىس تىركەلگەن.

ونىڭ ىشىندە مەملەكەتكە 4,1 ميلليارد تەڭگە زالال كەلتىرگەن 10 قىلمىستىق ءىس سوتقا جولدانىپ، قارالدى.

اتاپ ايتقاندا، ولاردىڭ ءبىرى - «ەرتىس» شارۋا قوجالىعى. باسشىسى جالعان شوت- فاكتۋرا جاساۋ ەسەبىنەن 50 ميلليون تەڭگەگە جۋىق كىرىس تاپقان.

ول بۇل قاراجاتقا Toyota Camry اۆتوكولىگى مەن پاۆلودارداعى ەليتالىق تۇرعىن ءۇي كەشەنىنەن پاتەر ساتىپ العان.

شارۋا قوجالىعى باسشىسى ءۇش جىلعا باس بوستاندىعىنان ايىرىلىپ، مۇلكى تاركىلەندى.

تاعى ءبىر كاسىپورىن - «ۆوستوك» ج ك وكىلدەرى ءبىر جارىم جىلعا باس بوستاندىعىنان ايىرىلدى.

ولار «داماس» ش ق، «ديار» ، «التىن بيداي» ، «سيەۆەر» ، «انسار» ج ك جانە «Ansar_ANSAR» ج ش س- تەرى ءۇشىن ءداندى جانە ءداندى-بۇرشاقتى داقىلدار بويىنشا جالعان شوت- فاكتۋرا دايىنداپ وتىرعان.

قىلمىستىق تابىس سوماسى 50 ميلليون تەڭگەنى قۇراعان.

ەسكە سالا كەتەيىك، مۇنىڭ الدىندا زاڭسىز سپيرت وندىرگەن زاۋىت باسشىسى بيلىككە 20 مىڭ دوللار پارا ۇسىنعان ەدى.

اۆتور

مۇرات اياعان