فرانسياداعى ءىرى مۇراجايلاردىڭ ءبىرى قازاقستاندىق سۋرەتشىلەردىڭ جۇمىستارىن ساتىپ الدى

استانا. KAZINFORM - ەلەنا مەن ۆيكتور ۆوروبيەۆتەردىڭ «سۋرەتشى ۇيىقتاپ جاتىر» اتتى تۋىندىسىن فرانسياداعى ەڭ ءىرى مۇراجايلاردىڭ ءبىرى - جورج پومپيدۋ اتىنداعى ۇلتتىق مادەنيەت جانە ونەر ورتالىعى ساتىپ الدى، دەپ جاۋاپ بەردى ق ر مادەنيەت مينيسترلىگىنىڭ مادەنيەت كوميتەتى Kazinform ءتىلشىسىنىڭ رەسمي ساۋالىنا.

مادەنيەت كوميتەتىنىڭ مالىمەتىنشە، باتىستىق مۇراجايلار كونتەمپوراري ارت ستيلىندە جۇمىس ىستەيتىن قازاقستاندىق سۋرەتشىلەردىڭ تۋىندىلارىن ءجيى ساتىپ الادى. سونداي-اق، 2021 -جىلى يسپاندىق مەدياماگنات تاچو بەننەت ساتىپ العان زويا فالكوۆانىڭ «Evermust» اتتى جۇمىسى قازىر بارسەلوناداعى ونەر مۇراجايىندا تۇر.

- رەشات قوجاحمەتوۆتىڭ دا تۋىندىلارى شەتەلدە جوعارى سۇرانىسقا يە. ونىڭ تۋىندىلارىن ەگيپەتتىڭ كاير قالاسىنداعى ۇلتتىق زاماناۋي ونەر ورتالىعىنان جانە جاپونياداعى شيگاراكي قورىنىڭ كەراميكالىق مادەني ساياباعىنان كورۋگە بولادى. الماگۇل مەڭلىبايەۆا مەن ەربوسىن مەلدىبەكوۆتىڭ تۋىندىلارى كوپتەن بەرى شەتەلدە ءساتتى ساتىلىپ كەلەدى، - دەپ قوستى مادەنيەت كوميتەتى.

«دەربەس دەرەكتەر جانە ولاردى قورعاۋ تۋرالى» ق ر زاڭىنا سايكەس كارتينالاردىڭ قۇنى كوممەرتسيالىق قۇپيا سانالادى.

الپىسباي قازعۇلوۆتىڭ «بايقوڭىر» كارتيناسى بەلگيا حانزاداسى لوراننىڭ كوللەكتسياسىندا ساقتاۋلى ەكەنى بۇعان دەيىن حابارلانعان بولاتىن.

قازاقستاندىق سۋرەتشىلەردىڭ تۋىندىلارىن فرانسۋز جۇلدىزدارى پاتريسيا كااس پەن جەرار دەپاردەنىڭ جەكە كوللەكسيالارىنان دا كەزدەستىرۋگە بولادى.

شەتەلدىك مۇراجايلار مەن جەكە كوللەكسيونەرلەردىڭ قولىندا باقىت باپيشەۆ، اسقار ەسداۋلەتوۆ، كاميل مۋللاشەۆ، شولپان جانە ءبىرجان تولەش، ەۆگەني فريدلين، ەدۋارد كازاريان، اندرەي نودا، مارات بەكەيەۆ، الپىسباي قازعۇلوۆ، باتۋحان بايمەن، باقىتنۇر بۋردەسبەكوۆ، رافاەل سلەكەنوۆ، لەيلا ماحات، اسقار ەسەنبايەۆ جانە ءجاميلا تاكەن سياقتى قازاقستاندىق سۋرەتشىلەردىڭ جۇمىستارى ساقتالعان بار.

اۆتور
ەركەجان سماعۇلوۆا