فرانسيادا فەرمەرلەر ەرەۋىلى باستالدى

استانا. KAZINFORM - فرانسۋز فەرمەرلەرى بيلىكتىڭ اۋىل شارۋاشىلىعى سالاسىنداعى ساياساتىنا، سونداي-اق ەۋرووداق پەن لاتىن امەريكاسى ەلدەرى اراسىنداعى «مەركوسۋر» ساۋدا كەلىسىمىنە نارازىلىق رەتىندە تاعى دا ەرەۋىلگە شىعۋدى جوسپارلاپ وتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

وتكەن دەمالىس كۇندەرىنەن بەرى ۋازا دەپارتامەنتىنىڭ شارۋالارى بىرنەشە جولدى جاۋىپ تاستاۋعا ارەكەتتەندى.

ەسسون دەپارتامەنتى ساكلە، يۋليس، ەتاپ، موريني-شامپيني جانە وۆەرنو فەرمەرلەرى دە جەرگىلىكتى نارازىلىق اكتسيالارىنا قاتىساتىنىن جاريالادى.

ەسسون پرەفەكتۋراسى جەكسەنبى كۇنى پاريج باعىتىنداعى RN118 تاس جولىندا ساعات 17.00 دەن باستاپ كولىك قوزعالىسى توقتاتىلعانىن حابارلايدى.

ەرەۋىلدى ۇيىمداستىرۋشىلاردىڭ ءبىرى - فرانسياعا شەتەلدىك ونىمدەردى يمپورتتاۋعا قارسى FNSEA كاسىپوداعى. جەكسەنبىدە FNSEA پرەزيدەنتى ارنو رۋسسو جەرگىلىكتى باق- قا فرانتسيا بويىنشا 80 دەپارتامەنتتە 82 نارازىلىق اكسياسى جوسپارلانعانىن ايتتى.

«ەرەۋىل جەلتوقساننىڭ ورتاسىنا دەيىن جالعاسادى، ءبىراق جاڭا جىلعا دەيىن سوزىلمايدى. فرانتسۋز داستارحانىندا ءبىزدىڭ ونىمدەرىمىز بولادى. ءبىز فرانتسۋزداردى اۋىل شارۋاشىلىعى سالاسىندا بولىپ جاتقان توتەنشە جاعدايعا كۋا بولۋعا شاقىرۋىمىز كەرەك»، - دەدى كاسىپوداق وكىلى.

جۇما كۇنى ۇكىمەت فەرمەرلەرگە بەرىلەتىن نەسيە شارتتارىن اتاپ ءوتتى.

«مەن قولىمنان كەلگەننىڭ ءبارىن جاسايمىن جانە جىل باسىندا نارازىلىق بىلدىرگەن فەرمەرلەرگە بەرىلگەن بارلىق ۋادەلەر ورىندالادى»، - دەپ سەندىردى پرەمەر- مينيستر ميشەل بارنە. ول سونداي- اق مەركوسۋر مەملەكەتتەرىمەن ەو ساۋدا كەلىسىمىمەن كەلىسپەيتىنىن ايتتى.

ءوز كەزەگىندە فرانتسيانىڭ ىشكى ىستەر ءمينيسترى برۋنو رەتەيلو اۋىلشارۋاشىلىق كاسىپوداقتارىنىڭ باسشىلارىن قابىلداعانىن، ولارعا «ءۇش شەكتەۋدى» ەسكەرتكەنىن ايتتى: مۇلىككە جانە ادامدارعا شابۋىل جاساماۋ، بوگەت جاساماۋ. ونداي جاعدايدا پوليتسيا كولىك قوزعالىسىن قالپىنا كەلتىرۋ ءۇشىن ارەكەت ەتەدى.