فرانسيادا اپتاپ ىستىقتان ەكى ادام قازا تاپتى

استانا. KAZINFORM - فرانسيادا ەۋروپالىق بولىكتىڭ كوپ بولىگىن قامتىعان اپتاپ ىستىقتان ەكى ادام كوز جۇمدى. بۇل تۋرالى فرانسيانىڭ ەكولوگيالىق اۋىسۋ ءمينيسترى انەس پانە-ريۋناشە پاريجدە وتكەن باسپا ءسوز ءماسليحاتىندا مالىمدەدى، دەپ حابارلايدى ت ا س س.

- ىستىقتان دەنساۋلىعى ناشارلاپ، سونىڭ سالدارىنا تىكەلەي بايلانىستى ەكى ءولىم جاعدايى تىركەلدى، - دەدى مينيستر.

ونىڭ ايتۋىنشا، تاعى 300 دەن استام ادامعا قۇتقارۋشىلاردىڭ شۇعىل كومەگى قاجەت بولعان.

ءمينيستردىڭ مالىمدەۋىنشە، بيىلعى ماۋسىم ايى فرانسيادا مەتەوباقىلاۋ تاريحىنداعى ەڭ ىستىق ايلاردىڭ ءبىرى بولدى - تەك 2003-جىلى ورتاشا تەمپەراتۋرا بۇدان جوعارى بولعان. الداعى كۇندەرى ەلدىڭ سولتۇستىگى مەن سولتۇستىك-باتىسىندا اۋا تەمپەراتۋراسى بىرتىندەپ تومەندەيدى دەپ بولجانىپ وتىر.

30-ماۋسىم كۇنى فرانسيانىڭ ۇلتتىق مەتەورولوگيالىق قىزمەتى - Meteo France ەلدىڭ ەۋروپالىق بولىگىندەگى 16 دەپارتامەنتتە، سونىڭ ىشىندە پاريجدە دە 1-شىلدەدە اۋا رايىنىڭ ەڭ جوعارى قاۋىپتىلىك دەڭگەيىن جاريالادى. الدىن الا مالىمەت بويىنشا، كەيبىر ەلدى مەكەندەردە اۋا تەمپەراتۋراسى 41 گرادۋسقا دەيىن جەتكەن، ال پاريجدە ەڭ جوعارى كورسەتكىش - 39 گرادۋس.

ايتا كەتەيىك، فرانسيادا انومالدى ىستىققا بايلانىستى 1350 گە جۋىق مەكتەپ ۋاقىتشا جابىلدى.