فرانسيا پرەزيدەنتى سامارقاندتا

 وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆتىڭ شاقىرۋىمەن فرانسيا رەسپۋبليكاسىنىڭ پرەزيدەنتى ەممانيۋەل ماكرون 1-قاراشادا وزبەكستانعا رەسمي ساپارمەن باردى، Kazinform بۇل تۋرالى UzA اگەنتتىگىنە سىلتەمە جاساپ حابارلايدى. 

ەممانۋيۋل ماكرون وزبەكستان رەسپۋبليكاسىنىڭ پرەزيدەنتىمەن بىرگە تۇنگى سامارقاندتى ارالادى.

مەملەكەت باسشىلارى يۋنەسكو-نىڭ بۇكىلالەمدىك مۇرالار تىزىمىنە ەنگەن رەگيستان كەشەنىندە بولدى.

جوعارى مارتەبەلى مەيمانعا شىعىس ساۋلەت ونەرىنىڭ بۇل جاۋھارىنىڭ قۇرىلىس تاريحى، قايتالانباس ناقىشتارى، اتاقتى وقيعالار مەن وسى جەرگە قاتىستى تۇلعالار تۋرالى مالىمەت بەرىلدى.

فرانسيا پرەزيدەنتىنىڭ ساپارىنىڭ سامارقاندتا ءوتۋى جانە رەگيستاننان باستاۋ الۋى كەزدەيسوق ەمەس. ەكى حالىقتىڭ تاريحىن بەينەلەيتىن تۇستارى كوپ.

اسىرەسە، اتاقتى قولباسشى ءامىر تەمىر ساۋدا مەن عىلىمنىڭ قامقورشىسى رەتىندە ازيا مەن ەۋروپادا بولىپ جاتقان تاريحي وزگەرىستەرگە ۇلكەن اسەر ەتكەن. XV عاسىردا پاريجدە ونىڭ قۇرمەتىنە «ەۋروپانى ازات ەتۋشىگە» دەپ اتالاتىن ەسكەرتكىش ورناتىلعان. ءامىر تەمىر مەن فرانسيا كورولى كارل VI ءبىر-بىرىنە حات جولداپ، بايلانىس ورناتقان. ساياسي ماسەلەلەرمەن قاتار ساۋدا-ەكونوميكالىق قارىم-قاتىناستارعا دا ۇلكەن كوڭىل بولىنگەن.

تيمۋريلەر تۋرالى فرانسيادا كوپتەگەن عىلىمي جانە كوركەم شىعارمالار جارىق كورگەن. مىسالى، فرانسۋز ويشىلى، جازۋشىسى ۆولتەردىڭ شىعارماسىنداعى ميرزو ۇلىقبەك تۋرالى، ال ايگىلى جازۋشى جيۋل ۆەرننىڭ رومانىندا رەگيستون تۋرالى جازبالار بار.

سول الاڭعا كەلگەن فرانسۋز دەلەگاتسياسىنا كەشەننىڭ ءسان-سالتاناتى مەن اسەمدىگى جاعىمدى اسەر قالدىردى.

بۇدان كەيىن پرەزيدەنتتەر «ۇلى جىبەك جولى» حالىقارالىق تۋريستىك ورتالىعىنداعى «بوقي شاھار» تاريحي-ەتنوگرافيالىق كەشەنىندە بولدى.

سامارقاند قالاسى الەمدىك وركەنيەتتىڭ كونە بەسىگى بولىپ، بۇگىندە حالىقارالىق سامميت پەن تۋريزم ورتالىعىنا اينالىپ وتىرعانى ايتىلدى. قوناقتارعا وزبەك حالقىنىڭ بىرەگەي ونەرى، قولونەرى جانە مۋزىكالىق مادەنيەتى كورسەتىلدى.

ساپاردىڭ نەگىزگى بولىگى، ونىڭ ىشىندە جوعارى دەڭگەيدەگى كەلىسسوزدەر 2-قاراشادا وتەدى.