فرانسيا پرەزيدەنتى ەممانيۋەل ماكرون وتاۋ قۇرۋعا بەل بۋعان قازاق جاستارىن قۇتتىقتادى

استانا. KAZINFORM - فرانسيا پرەزيدەنتى ەممانيۋەل ماكرون وتاۋ قۇرماق بولعان قازاق جاستارىن قۇتتىقتادى. «سۇيىكتى قىزىما ۇيلەنۋگە ۇسىنىس جاسادىم. فرانسيا پرەزيدەنتى ە. ماكرون بىرنەشە ساعاتتان كەيىن ءبىزدى قۇتتىقتادى»، - دەپ جازدى سانجار تايجان Instagram پاراقشاسىندا.

الەۋمەتتىك جەلىدە جاريالانعان بەينەماتەريالدان جاستاردىڭ پاريج كوشەسىندە فرانسيا پرەزيدەنتىمەن كەزدەسىپ قالىپ، وعان قازاقستاننان ەكەنىن، پرەزيدەنتى قاسىم-جومارت توقايەۆ ەكەنىن ايتقانىن بايقاۋعا بولادى.

ال ەممانيۋەل ماكرون تاياۋدا ەلىمىزدە بولعانىن، ەكى قازاقى تازىسىنىڭ بارىن جانە ولار ۇيىندە ەكەنىن اتاپ ءوتتى. سونىمەن قاتار ول نەكەلەسۋگە ۋادەلەسكەن جاستاردى قۇتتىقتاپ، بار جاقسىلىقتى تىلەيتىندىگىن جەتكىزەدى.

ايتا كەتەيىك، وتكەن جىلدىڭ قاراشاسىندا فرانسيا پرەزيدەنتى ەممانيۋەل ماكروننىڭ قازاقستانعا رەسمي ساپارىنا وراي حالقىمىزدىڭ باي مادەني مۇراسىمەن تانىستىراتىن ارنايى «ەتنواۋىل» كورمەسى ۇيىمداستىرىلعان ەدى.

كورمە ورتالىعىن تاماشالاۋ بارىسىندا ەممانيۋەل ماكرونعا قازاقى تازىنىڭ تۇقىمى ەرەكشە ۇناعان بولاتىن. سول كەزدە قاسىم-جومارت توقايەۆ فرانتسيالىق ارىپتەسىنە تازى سىيلاۋعا ۋادە بەرگەن-تىن. بيىل اقپاندا مەملەكەت باسشىسى قاسىم-جومارت توقايەۆ فرانسيا پرەزيدەنتى ەممانيۋەل ماكرونعا سىيلاعان قازاقى تازىنىڭ ەكى كۇشىگى فرانسياعا جەتكىزىلدى. تازى كۇشىكتەرىنە جيۋل جانە جاننا دەگەن جاراسىمدى ەسىم بەرىلگەن.