فرانسيا پرەزيدەنتى ماكرون سولشىل ۇكىمەت نۇسقاسىنان باس تارتتى

استانا. قازاقپارات - 26-تامىزدا پرەزيدەنت ەممانيۋەل ماكرون پارلامەنتتىك پارتيالاردىڭ جەتەكشىلەرى جانە قوس پالاتا باسشىلارىمەن العاشقى كونسۋلتاتسيالار وتكىزدى. مەملەكەت باسشىسىمەن كەزدەسۋگە قاتىسۋشىلار كەلىسسوزدەردەن كەيىن بىردەن تۇسىنىكتەمە بەرۋدەن باس تارتتى، دەپ حابارلايدى Euronews.

كەشكە ەليسەي سارايى كونسۋلتاتسيالاردان كەيىن كومميۋنيكە جاريالاپ، ماكروننىڭ سولشىل ۇكىمەت نۇسقاسىنان باس تارتاتىنىن رەسمي تۇردە راستادى.

«پرەزيدەنت كونسۋلتاتسيالاردان كەيىن «جاڭا حالىقتىق مايداننىڭ» جالعىز باعدارلاماسى نەگىزىندە ۇكىمەتكە باسقا پارلامەنتتىك پارتيالار بىردەن سەنىمسىزدىك بىلدىرەتىنىن مالىمدەدى. مۇنداي ۇكىمەت ءتيىمسىز بولار ەدى»، - دەلىنگەن مالىمدەمەدە.

وسىلايشا، «جاڭا حالىقتىق مايدان» سولشىل اليانسى رەسپۋبليكا پرەمەر-ءمينيسترى لاۋازىمىنا ۇسىنعان كانديداتۋرا وتپەي قالدى. اڭگىمە 37 جاستاعى ەكونوميست ليۋسي كاستە تۋرالى بولىپ جاتىر.

پارتيا وكىلدەرى مەن تاجىريبەلى ساياساتكەرلەرمەن كەڭەسۋدىڭ جاڭا كەزەڭى 27-تامىزدا باستالادى.

ەلدە وتكەن پارلامەنتتىك سايلاۋدا ۋلتراوڭشىلدار رەكوردتىق ناتيجە كورسەتتى، ءبىراق ولارعا قارسى بىرىككەن كۇشتەر - «جاڭا حالىقتىق مايدان» سولشىل كواليتسياسى مەن «رەسپۋبليكا ءۇشىن بىرگە» ورتالىقشىل پرەزيدەنتتىك بلوكتان جەڭىلىپ، ءۇشىنشى ورىنعا شىقتى.

اۆتور
زارينا تۋعانبايەۆا