فرانسيا ليۆاندى قولداۋ ءۇشىن 100 ميلليون ەۋرو بولەدى

استانا. KAZINFORM - فرانسيا ليۆانعا قولداۋ كورسەتۋ ءۇشىن 100 ميلليون ەۋرو (108 ميلليون ا ق ش دوللارى) كولەمىندە كومەك بولمەكشى. بۇل تۋرالى فرانسيا پرەزيدەنتى ەممانۋەل ماكرون پاريجدە وتكەن ليۆانعا كومەك كورسەتۋ جونىندەگى حالىقارالىق كونفەرەنسيادا ايتتى، دەپ حابارلايدى Kazinform ءتىلشىسى.

ماكرون «قىسقا مەرزىمدى پەرسپەكتيۆادا ليۆان حالقىنا، سوعىس سالدارىنان قونىس اۋدارعان جۇزدەگەن مىڭ ادامدارعا دا، ولاردى قابىلداعان قاۋىمداستىقتارعا دا اۋقىمدى كومەك كەرەك» دەدى.

«حەزبوللا» مەن يزرايل اراسىنداعى سوعىس ءبىر ميلليون ليۆاندىقتى ەل ىشىندە قونىس اۋدارۋعا ماجبۇرلەدى، 2500-دەن استام ادامنىڭ ءومىرىن قيدى سونداي-اق ەكونوميكالىق داعدارىستى تەرەڭدەتە ءتۇستى.

ءوز كەزەگىندە ليۆان پرەمەر-ءمينيسترىنىڭ مىندەتىن اتقارۋشى نادجيب ميكاتي كونفەرەنسيادا ليۆان ارمياسىن نىعايتۋ جانە كەڭەيتۋ، سونداي-اق ەلدىڭ قيراعان ينفراقۇرىلىمىن قالپىنا كەلتىرۋ ءۇشىن حالىقارالىق قولداۋ قاجەت بولاتىنىن ايتتى.

ميكاتي ليۆان ۇكىمەتىنىڭ اتىستى توقتاتۋ جونىندەگى كەلىسىمى مەن ليۆاننىڭ وڭتۇستىگىنە ارميا ورنالاستىرۋدى تالاپ ەتەتىن ب ۇ ۇ قاۋىپسىزدىك كەڭەسىنىڭ قارارىن ورىنداۋ جوسپارىنىڭ ءبىر بولىگى رەتىندە قوسىمشا اسكەر تارتۋعا شەشىم قابىلداعانىن جانە 8 مىڭ سارباز جىبەرە الاتىنىن ايتتى.

بۇگىن فرانسيا استاناسىندا ليۆانعا كومەك كورسەتۋ جونىندەگى حالىقارالىق كونفەرەنسيا ءوتىپ جاتىر.

فرانسيا سىرتقى ىستەر ءمينيسترى جان-نوەل باررو كەشە شاراعا 70 كە جۋىق ەل مەن 15 حالىقارالىق ۇيىمنىڭ قاتىساتىنىن ايتىپ، فرانسيا «ليۆاندى جەرگە قاراتپايدى» دەپ ۋادە بەردى.

«ءبىز شاقىرعان ەلدەردىڭ ءبارى كەلىسىمىن بەردى»، - دەدى ول شاقىرىلعان قاتىسۋشى ەلدەردىڭ تىزىمىنە سىلتەمە جاساي وتىرىپ. وعان يران مەن يزرايل كىرگەن جوق.

فرانسۋز ۇيىمداستىرۋشىلارى قاتىسۋشىلاردىڭ قارجىلىق كەپىلى ب ۇ ۇ باعالاۋى بويىنشا شۇعىل قاجەت 426 ميلليون دوللاردى جينايدى دەپ ۇمىتتەنەدى.

پاريج سونداي-اق ليۆاننىڭ ەگەمەندىگىن قالپىنا كەلتىرۋگە جانە ونىڭ ينستيتۋتتارىن نىعايتۋعا كومەكتەسۋگە دايىن ەكەنىن حابارلادى.

اۆتور
باقىتگۇل اباي قىزى