فرانسيا پالەستينانى مەملەكەت رەتىندە رەسمي تانۋعا شەشىم قابىلدادى
استانا. KAZINFORM - فرانسيا پرەزيدەنتى ەممانۋەل ماكرون الەۋمەتتىك جەلىدە پاريجدىڭ پالەستينانى دەربەس مەملەكەت رەتىندە تانۋعا دايىن ەكەنىن مالىمدەدى. ونىڭ ايتۋىنشا، بۇل تۋرالى رەسمي مالىمدەمە قىركۇيەك ايىندا ب ۇ ۇ باس اسسامبلەياسىنىڭ جاڭا سەسسياسىندا جاسالادى، دەپ حابارلايدى BBC.
«تاياۋ شىعىستا ادىلەتتى ءارى بەرىك بەيبىتشىلىكتى قامتاماسىز ەتۋ جونىندەگى تاريحي مىندەتىمىزگە بەرىك بولا وتىرىپ، مەن فرانسيانىڭ پالەستينا مەملەكەتىن تانۋ تۋرالى شەشىم قابىلدادىم. بۇل تۋرالى قىركۇيەك ايىندا بۇۇ باس اسسامبلەياسىندا سالتاناتتى تۇردە جاريالايمىن»، - دەپ جازدى ەممانۋەل ماكرون ح الەۋمەتتىك جەلىسىندەگى پاراقشاسىندا.
پوستقا ول پالەستينا اۆتونومياسىنىڭ باسشىسى ماحمۇد ابباسقا جولداعان رەسمي حاتىن دا قوسا جاريالادى.
فرانسيا باسشىسىنىڭ پىكىرىنشە، تاۋەلسىز پالەستينا مەملەكەتى تاياۋ شىعىستاعى قاۋىپسىزدىكتى قامتاماسىز ەتۋگە ءوز ۇلەسىن قوسا الادى، ءبىراق بۇل ءۇشىن پالەستينا تاراپى ءيزرايلدى تولىق ءارى ءسوزسىز مويىنداپ، قارۋلى قۇرىلىمداردان باس تارتۋى ءتيىس.
«قازىر ەڭ باستىسى - دەرەۋ اتىستى توقتاتۋ، بارلىق تۇتقىنداردى بوساتۋ جانە گازا تۇرعىندارىنا جاپپاي گۋمانيتارلىق كومەك كورسەتۋ»، - دەدى ماكرون.
سونداي-اق ول حاماس قوزعالىسىن قارۋسىزداندىرۋ، گازا سەكتورىندا قاۋىپسىزدىكتى قامتاماسىز ەتۋ جانە ايماقتى قالپىنا كەلتىرۋ قاجەت ەكەنىن اتاپ ءوتتى.
پالەستينا بيلىگى فرانسيانىڭ بۇل شەشىمىن قۇپتاپ قارسى الدى.
ال يزرايل پرەمەر-ءمينيسترى بينيامين نەتانياحۋ بۇل قادامدى «تەررورعا بەرىلگەن ماراپات» دەپ اتادى.
«مۇنداي جاعدايدا پالەستينا مەملەكەتى يزرايلمەن بەيبىت قاتار ءومىر ءسۇرۋ ءۇشىن ەمەس، ونى جويۋ ءۇشىن پلاتسدارمعا اينالادى. پالەستينالىقتار يزرايلمەن قاتار ءومىر سۇرەتىن مەملەكەت قۇرۋدى كوزدەمەيدى، ولار ءيزرايلدىڭ ورنىنا ءوز مەملەكەتىن قۇرۋدى ماقسات ەتەدى»، - دەلىنگەن نەتانياحۋ مالىمدەمەسىندە.
قازىرگى تاڭدا ب ۇ ۇ-عا مۇشە 193 ەلدىڭ 140 تان استامى پالەستينانى ەگەمەن مەملەكەت رەتىندە مويىنداعان. سوڭعى بولىپ، شامامەن ءبىر جىل بۇرىن يرلانديا، يسپانيا جانە نورۆەگيا بۇل قادامعا بارعان بولاتىن.