Forbes تىزىمىندەگى كاسىپكەرلەر قوستانايدا تاسقىننان زارداپ شەككەندەرگە باسپانا ساتىپ اپەرەدى
قوستاناي. KAZINFORM - قوستاناي وبلىسىنا ءىرى بيزنەس وكىلدەرى كومەك كورسەتۋگە دايىن: ADD capital حولدينگىنىڭ نەگىزىن قالاۋشى دانيار ءابىلعازين، ERG كومپانياسىنىڭ ديرەكتورلار كەڭەسىنىڭ مۇشەسى شۋحرات يبراگيموۆ، «الليۋر» جانە «اگروماشحولدينگ» كومپانيالارىنىڭ ديرەكتورلار كەڭەسىنىڭ ءتوراعاسى اندرەي لاۆرەنتيەۆ، سونداي- اق «RG Brands» باسقارما ءتوراعاسى تيمۋر قالتايەۆ.
سۋ تاسقىنىنىڭ سالدارىمەن جانە الداعى قالپىنا كەلتىرۋ جۇمىستارىنىڭ كولەمىمەن ولاردى ۆيتسە- پرەمەر قانات بوزىمبايەۆ تانىستىردى.
قوستاناي، ارقالىق، امانگەلدى، جانگەلدى، قاراسۋ جانە قوستاناي اۋداندارىندا جەرگىلىكتى اۋقىمداعى ت ج رەجيمى ءالى دە ساقتالىپ وتىر.
ەۆاكۋاتسيالىق پۋنكتەردە 160 ادام بار.
كوشىرىلگەن ازاماتتارمەن، سونداي-اق ساياجايى سۋ استىندا قالعان تۇرعىندارمەن قانات بوزىمبايەۆ كەزدەسىپ، ولارعا وتەۋ ءتارتىبىن ءتۇسىندىردى.
ساياجاي ماسەلەسى قازاقستاننىڭ بارلىق سۋ باسقان ايماقتارىندا ەرەكشە ماندە تۇر، سوندىقتان ۇكىمەت قاۋلىسىمەن ولاردى قالپىنا كەلتىرۋ ءتارتىبى رەتتەلدى. بۇل تۋرالى حالىقپەن كەزدەسۋدە قانات بوزىمبايەۆ حابارلادى.
«تۇرعىن ءۇيدى قالپىنا كەلتىرۋ مۇمكىن بولماعان جاعدايدا ءبىز ءۇي سالىپ بەرەمىز نەمەسە اكىمدىك ونى ساتىپ الادى. تۇرعىن ءۇيدى قالپىنا كەلتىرۋ مۇمكىن بولسا، اكىمدىك ونى جوندەيدى. وسى جۇمىس دەمەۋشىلەر، مەتسەناتتار، بيزنەس وكىلدەرى ەسەبىنەن جاسالادى. الەۋمەتتىك جەلىلەردە ءىرى بيزنەس زارداپ شەككەندەرگە تۇرعىن ءۇيدى قالپىنا كەلتىرۋگە باعىتتايتىن قاراجاتتىڭ ساقتالۋىنا الاڭداۋشىلىق بىلدىرەتىنىن اتاپ وتكىم كەلەدى. بۇل قاراجاتتى نەگىزىنەن بيزنەس ءوز بەتىنشە جۇمسايتىنىن جاۋاپكەرشىلىكپەن ايتقىم كەلەدى. ولار زارداپ شەككەندەرگە باسپانا ساتىپ الادى، ءۇي سالادى نەمەسە جوندەيدى»، - دەپ ءتۇسىندىردى ۆيتسە- پرەمەر.
قانات بوزىمبايەۆ اتاپ وتكەندەي، دەمەۋشىلەر جەر ءبولۋ مەن ۇلگىلىك جوبانى ەسەپتەۋدى قوسپاعاندا، مەملەكەتتىك قىزمەتشىلەردىڭ ءۇي ساتىپ الۋ، جوندەۋ نەمەسە سالۋ پروتسەسىنە قانداي دا ءبىر اسەرىن تيگىزبەيدى، جەرگىلىكتى نەمەسە مەنشىكتى قۇرىلىس كومپانيالارىنا تىكەلەي تولەيدى.
ۆيتسە- پرەمەر وتەماقى مەن قارجىلىق كومەككە جەكە توقتالدى.
قوستاناي وبلىسىنىڭ تۇرعىندارىنان ءبىرجولعى تولەمدەرگە 3 مىڭنان استام ءوتىنىش كەلىپ ءتۇستى. جالپى سوماسى 705,2 ميلليون تەڭگەگە 2 مىڭعا جۋىق وتباسىنا قارجىلىق كومەك كورسەتىلدى.
«بارلىق زارداپ شەككەندەرگە 100 ا ە ك تولەۋ جەرگىلىكتى اتقارۋشى جانە وكىلدى ورگانداردىڭ، ياعني ءماسليحاتتار مەن اكىمدىكتەردىڭ قۇزىرەتىندە. ولار كىمگە قانداي سومانى جانە قالاي تولەۋ كەرەكتىگىن انىقتايدى. ءبىز پروبلەما بۇكىل ەل بويىنشا ءبىرتۇتاس ەكەنىن تۇسىنەمىز جانە جەدەل شتابتا بارلىق ادامعا، سونىڭ ىشىندە وتكىزىلەتىن ءىس- شارالار شەڭبەرىندە ەۆاكۋاتسيالانعان ۇيلەردى سۋ باسقان تۇرعىندارعا، سونداي- اق ءۇش ساناتتاعى ساياجاي تۇرعىندارىنا 100 ا ە ك تولەۋدى ۇسىندىق: ساياجاي يەلەرى، جالعا الۋشىلار جانە ساياجاي يەلەرىن انىقتاۋ، كوتتەدج جالعىز تۇرعىلىقتى جەرى بولعان جاعدايدا»، - دەدى قانات بوزىمبايەۆ.
سونداي- اق، سۋ تاسقىنىنان زارداپ شەككەندەر 150 ا ە ك كولەمىندە جوعالعان جانە بۇلىنگەن مۇلىك ءۇشىن وتەماقى الۋعا قۇقىلى.
مۇنداي مۇلىكتىڭ تىزىمىنە: تاماق ساقتاۋعا جانە دايىنداۋعا ارنالعان زاتتار، تاماق ىشۋگە ارنالعان جيھاز زاتتارى، ۇيىقتاۋعا ارنالعان جيھاز زاتتارى، ازاماتتاردى اقپاراتتاندىرۋ قۇرالدارىنىڭ زاتتارى، سۋمەن جابدىقتاۋ جانە جىلىتۋ قۇرالدارىنىڭ زاتتارى كىرەدى.
ۆيتسە- پرەمەر ارنايى كوميسسيالارعا 10-مامىرعا دەيىن سۋ تاسقىنىنىڭ زالالىن باعالاۋ جۇمىسىن تولىق اياقتاۋدى تاپسىردى.
بۇگىندە قوستاناي اۋدانىنىڭ تۇرعىندارىنا جاڭا كوپقاباتتى ۇيلەردىڭ بىرىندە پاتەر بەرىلە باستادى. اۋدان اكىمدىگى ءۇي بەرۋ ءۇشىن 30 عا جۋىق شارت جاساستى.
بۇل - كاسىپكەر دانيار ءابىلعازيننىڭ «ايالا» قورىنىڭ تۇرعىندارعا قارجىلاي كومەگى. كاسىپكەر قوستاناي اۋدانى مەن ارقالىق قالاسىنان جالپى 65 وتباسىنا جەكە قاراجاتىنان 1,5 ميلليارد تەڭگەگە پاتەر ساتىپ الىپ، تاعى 500 ميلليون تەڭگەنى «دەمەۋ» قورىنا جىبەرەدى.
«مەنىڭ ءۇيىم التىنسارين اۋىلىندا جارتىلاي سۋ استىندا قالدى. ول تۇرۋعا جارامسىز دەپ تانىلدى. بىردەن بىزگە ۇلكەن قولداۋ كورسەتىلدى، قاجەتتىنىڭ بارىمەن قامتاماسىز ەتتى. مەنىڭ ءۇش بالام بار، بىزگە جاڭا ۇيدەن ءۇش بولمەلى پاتەر بەرىلدى. سىزدەرگە كوپ راحمەت!» - دەپ قوستاناي وبلىسىنىڭ تۇرعىنى اسەم كامالوۆا العىسىن ايتتى.
كۇن سۋىتپاي تۇرىپ جەرگىلىكتى بيلىك باسپاناسىز قالعان بارلىق ادامداردى باسپانامەن قامتاماسىز ەتۋى كەرەك.
قوستاناي وبلىسىنىڭ اكىمدىگىنە ءىرى كاسىپكەرلەر 378 ءۇي ساتىپ الىپ، 638 ءۇيدى جوندەۋگە كومەكتەسەدى.
«ەل ءۇشىن قيىن ۋاقىتتا ەشكىم شەتتە قالماۋى كەرەك. قوستاناي وبلىسىندا ءبىزدىڭ بىرنەشە كاسىپورىندارىمىز بار جانە ءبىزدىڭ قىزمەتكەرلەر اپاتقا قارسى كۇرەسكە، اۋىل تۇرعىندارىن، اتاپ ايتقاندا بالالاردى سۋ باسۋ ايماعىنان شۇعىل ەۆاكۋاتسيالاۋعا بەلسەندى قاتىستى. ارقالىق ماڭىنداعى اۋىلدارعا بوگەتتەر سالۋ ءۇشىن ارنايى تەحنيكامىز جىبەرىلدى. باسپاناسىز قالعاندار ءۇشىن ءبىز دايىن باسپانا ساتىپ الامىز» ، - دەدى ERG كومپانياسىنىڭ مەنەدجەرلەر كەڭەسىنىڭ مۇشەسى شۋحرات يبراگيموۆ.
ايتا كەتەيىك، Eurasian Resources Group نەگىزىن قالاۋشى اكسيونەرلەر سۋ تاسقىنىنىڭ العاشقى كۇندەرىندە 400 ميلليون جانە تاعى 40 ميلليارد تەڭگە ءبولدى.
ERG قاراجاتىنا جول جانە ينجەنەرلىك ينفراقۇرىلىم، سونداي-اق قوستاناي وبلىسىنداعى زارداپ شەككەن مەكتەپتەر قايتا جاڭارتىلادى.
كاسىپكەر اندرەي لاۆرەنتيەۆ وڭىرگە 3 ميلليارد تەڭگە باعىتتايتىنىن ايتتى. بۇل قارجىلاي كومەك 140 ءۇي سالۋعا نەمەسە 96 پاتەر ساتىپ الۋعا، سونداي- اق 400 ءۇيدى جوندەۋگە جۇمسالادى.
سونىمەن قاتار اندرەي لاۆرەنتيەۆتىڭ كومپانيالارى «دەمەۋ قازاقستان قورى» كورپوراتيۆتىك قورىنا 500 ميلليون تەڭگە اۋدارعان بولاتىن.
«مىنا قيىن ءسات بىزدەردى بىرىكتىردى. قوستانايعا ۇلكەن سۋ كەلگەننەن كەيىن ءبىزدىڭ مىڭنان استام قىزمەتكەر اكىمدىك پەن ارنايى قىزمەتتەردىڭ ماماندارىمەن بىرگە بوگەتتەردى نىعايتۋمەن اينالىسىپ، ادامدارعا تاراتۋ پۋنكتتەرىندە كومەكتەستى. بۇل ءبىزدىڭ تۋعان ولكەمىز، ءبىزدىڭ بارلىق كاسىپورىندارىمىز وسىندا. بولىنگەن قاراجاتقا پاتەرلەر ساتىپ الىنىپ، ۇيلەر سالىناتىن بولادى. ءبىز مەملەكەت باسشىسىنىڭ ۇندەۋىنە جاۋاپ بەردىك جانە مەنىڭ ويىمشا، ءبىز بۇل جۇمىستى ۇكىمەتپەن بىرگە مىندەتتى تۇردە جاسايمىز»، - دەيدى اندرەي لاۆرەنتيەۆ.
ءوز كەزەگىندە RG Brands كومپانياسى قوستاناي وبلىسىندا تۇرعىن ءۇي سالۋعا جانە قالپىنا كەلتىرۋگە 1,46 ميلليارد تەڭگە بولەدى.
ەستەرىڭىزگە سالا كەتەيىك، مەتسەناتتاردى جەكەلەگەن وڭىرگە بەكىتۋ اياسىندا جاڭا تۇرعىن ءۇي قۇرىلىسى سولتۇستىك قازاقستان وبلىسىندا باستالدى.
مۇندا جەرگىلىكتى تۇرعىندارعا Kaspi.kz ديرەكتورلار كەڭەسىنىڭ ءتوراعاسى ۆياچەسلاۆ كيم، Kazakhmys Holding ديرەكتورلار كەڭەسىنىڭ ءتوراعاسى ەدۋارد وگاي جانە KAZ Minerals Management باسقارما ءتوراعاسى ەلدار مامەدوۆ كومەكتەسۋگە بەل بۋدى.
سۋ تاسقىنى سالدارىن جويۋعا Kazakhmys جانە KAZ Minerals كومپانيالارى بارلىعى 40 ميلليارد تەڭگە باعىتتايدى. ال Kaspi.kz 20 ميلليارد تەڭگە.