رەسەي فۋتبول قۇراماسى FIFA جانە UEFA اياسىنداعى بارلىق تۋرنيردەن شەتتەتىلدى
22:54, 01 - ناۋرىز 2022
نۇر-سۇلتان. قازاقپارات - فۋتبولدان رەسەي ۇلتتىق قۇراماسى مەن كلۋبتارى FIFA جانە UEFA اياسىنداعى بارلىق تۋرنيردەن شەتتەتىلدى، دەپ حابارلايدى قازاقپارات ءتىلشىسى.
بۇل جونىندە UEFA سايتىندا حابارلاندى.
اتالعان شەشىم ەۋروپاداعى جاعدايدىڭ كۇردەلەنۋىنە بايلانىستى قابىلدانعان.
ايتا كەتسەك، رەسەي قۇراماسى 24- ناۋرىزدا 2022-جىلعى الەم چەمپيوناتىنا پلەي-وفف ساتىسىندا پولشامەن كەزدەسۋ وتكىزۋ ءتيىس بولاتىن. قارسىلاسىن جەڭگەن جاعدايدا 29- ناۋرىزدا پلەي-وفف ساتىسىنىڭ فينالىندا چەحيا جانە شۆەتسيا جۇبىنىڭ جەڭىمپازىمەن شەبەرلىك بايقاساتىن ەدى.
سونداي-اق، ەۋروپا ليگاسى 1/8 فينالىندا رەسەيدىڭ «سپارتاك» (ماسكەۋ) كومانداسى 10- جانە 17- ناۋرىز كۇندەرى گەرمانيانىڭ «ر ب لەيپتسيگ» كلۋبىمەن كەزدەسۋى جوسپارلانعان.
ەسكە سالساق، بۇدان بۇرىن بيىل چەمپيوندار ليگاسىنىڭ فينالدىق ماتچى پاريجدە وتەتىنى حابارلاندى.