FIFA پرەزيدەنتى لاۋازىمىنا ءۇش ۇمىتكەر ۇسىنىلدى

استانا. KAZINFORM - حالىقارالىق فۋتبول فەدەراتسياسى 2027-جىلى وتەتىن الداعى سايلاۋدا ۇيىم پرەزيدەنتى لاۋازىمىنا ءۇش ۇمىتكەردىڭ ەسىمىن رەسمي تۇردە جاريالادى.

Фото: france24.com

FIFA- نىڭ رەسمي سايتىندا وتىنىمدەردى قابىلداۋ مەرزىمى اياقتالعاننان كەيىن ۇيىمعا ۇلتتىق فۋتبول قاۋىمداستىقتارى ۇسىنعان ءۇش كانديداتۋرا كەلىپ تۇسكەنى كورسەتىلگەن. ولار FIFA - نىڭ قازىرگى پرەزيدەنتى دجانني ينفانتينو، فرانسيا فۋتبول فەدەراتسياسىنىڭ باسشىسى فيليپپ دياللو جانە جاپونيا فۋتبول قاۋىمداستىعىنىڭ قۇرمەتتى پرەزيدەنتى كودزو تاسيما.

دياللو UEFA اتقارۋ كوميتەتى مەن FIFA كەڭەسىندە ۇسىنىلعان ەۋروپالىق فۋتبول قاۋىمداستىقتارىنىڭ قولداۋىنا يە بولدى. شەشىم 16-قاراشادا UEFA باسشىسى الەكساندەر چەفەريننىڭ توراعالىعىمەن وتكەن وتىرىستا ءبىراۋىزدان قابىلداندى. جاپون فۋتبول قاۋىمداستىعى ءوز كەزەگىندە تاسيمانىڭ كانديداتۋراسىن 17-قاراشادا رەسمي تۇردە ۇسىندى.

FIFA رەگلامەنتىنە سايكەس، ءۇش ءوتىنىم دە تەكسەرۋ جۇرگىزىپ، كانديداتتاردى جىبەرۋ تۋرالى شەشىم قابىلدايتىن سايلاۋ كوميسسياسىنا بەرىلەدى. سايلاۋعا قاتىسۋشىلاردىڭ تۇپكىلىكتى ءتىزىمى ۇلتتىق قاۋىمداستىقتارعا 2027-جىلعى 18-اقپاننان كەشىكتىرىلمەي جەتكىزىلۋى ءتيىس.

FIFA- نىڭ جاڭا پرەزيدەنتىن سايلاۋ 2027-جىلعى 18-ناۋرىزدا راباتتا (ماروككو) وتەتىن ۇيىمنىڭ 77-كونگرەسى اياسىندا وتەدى.

دجانني ينفانتينو الەمدىك فۋتبولدى 2016-جىلعى اقپاننان بەرى باسقارىپ كەلەدى. 2023-جىلى ول كەزەكتى مەرزىمگە قارسىلاسسىز قايتا سايلانعان ەدى. ەندى وعان باسقا ۇمىتكەرلەرمەن سايلاۋعا قاتىسۋعا تۋرا كەلدى.

ەسكە سالساق، فۋتبولدان قازاقستان قۇراماسى 2028-جىلعى ەۋروپا چەمپيوناتىنىڭ ىرىكتەۋ تۋرنيرىنىڭ جەرەبە تارتۋ ءراسىمى الدىندا قاي سەبەتكە ورنالاسقانى بەلگىلى بولدى.