فەدەراتسيا رەسمي مالىمدەمەسى: باقتيەر زاينۋتدينوۆ الداعى ويىندارعا قاتىسپايدى

فۋتبولدان قازاقستان ۇلتتىق قۇراماسىنىڭ ويىنشىسى باقتيەر زاينۋتدينوۆ 2024-جىلعى ەۋروپا بىرىنشىلىگىنىڭ ىرىكتەۋ تۋرنيرىندە سان-مارينو جانە سلوۆەنيامەن وتەتىن ماتچتارعا قاتىسا المايدى، دەپ حابارلايدى Kazinform.

قازاقستان فۋتبول فەدەراتسياسىنىڭ باسپا ءسوز قىزمەتىنەن ءمالىم ەتكەندەي، باقتيەر «بەشيكتاش» - «ىستامبۇل باشاكشەحير» ماتچىندا مۇرىن سۇيەگى مەن كوز ۇياسىنىڭ نەگىزىن سىندىرىپ العان.

ونىڭ ەمدەلۋىنە كەمىندە 2-3 اپتا ۋاقىت كەتەدى.

«جوسپار بويىنشا باقتيەر زاينۋتدينوۆ ۇلتتىق قۇراما ساپىنا بۇگىن قوسىلۋى كەرەك بولاتىن. وكىنىشكە قاراي، وقۋ-جاتتىعۋ جيىنىنا جانە شەشۋشى ەكى ويىنعا بارا المايدى. ءبارىمىز باحاعا بار قولداۋىمىزدى كورسەتىپ، تەزىرەك ساۋىعىپ كەتكەنىن تىلەيىك، دوستار!» دەپ جازادى فەدەراتسيانىڭ باسپا ءسوز قىزمەتى.

ەسكە سالا كەتەيىك، بۇدان بۇرىن زاينۋتدينوۆقا رەسمي تۇردە دياگنوز قويىلىپ، وتا جاسالعانىن جازعان بولاتىنبىز.