فازىلبەك ءابساتتار ۇلى: قازاقستان بالالارىنا ەۋروپا فۋتبولىنىڭ ەسىگىن اشساق دەيمىز

قازاقستاندىق كاسىپكەر فازىلبەك ءابساتتار ۇلى پورتۋگاليانىڭ «براگالونا» كلۋبىنا قۇرىلتايشى بولدى. وسىعان وراي ول Kazinform ءتىلشىسىنىڭ ساۋالدارىنا جاۋاپ بەردى.

- فازىلبەك ءابساتتار ۇلى، مۇنداعى ماقساتىڭىز قانداي ەدى؟

- نەگىزگى ماقسات فۋتبولدى دامىتۋ عوي. مەنىڭشە، فۋتبولدى دامىتۋدىڭ جالعىز جولى بار. ول - وسى سپورت ءتۇرى وركەندەگەن ەۋروپاعا بارىپ ۇيرەنۋ، ءبىلىمىن الۋ، تاجىريبەسىمەن ءبولىسۋ.

قازاقستان فۋتبولىن دامىتۋ ءۇشىن 32 -جىلدا نە جاسامادى؟ بارلىق تالپىنىستار ىستەلدى. الايدا ماردىمدى ناتيجە شىقپادى. نەگە؟ سەبەبى فۋتبولدى دامىتۋ ءۇشىن وعان عىلىمي تۇرعىدا قارامادى، ەۋروپادا فۋتبولشى دايىندالمادى. ونىڭ ورنىنا قايداعى برازيلياعا اپارىپ ازىرلەدى. برازيلياعا بيۋدجەتتىڭ قانشاما قىرۋار قارجىسى جۇمسالدى. 32 جىلدا جۇزدەگەن ميلليارد قارجى كەتتى. ناتيجە جوق. ال، ەڭ دۇرىسى، فۋتبولدى عىلىم ارقىلى دامىتىپ وتىرعان ەۋروپادان ۇيرەنۋ كەرەك. ءبىز قانشا جەردەن «بەنفيكا»، «سپورتينگ»، «اياكس» سەكىلدى فۋتبول اكادەميالارىن قازاقستاندا سالامىز دەسەك تە، ول جاي عيمارات بولىپ قالادى. جانە قالدى دا، «قايرات» فۋتبول اكادەمياسى سەكىلدى. الەمدىك توپ اكادەميالار سەكىلدى بوي كوتەرگەنىمەن، وسى كۇنگە دەيىن «قايرات» اكادەمياسىنىڭ بىردە- ءبىر الەمدىك فۋتبول جۇلدىزىن دايىنداي الماۋى وسىعان دالەل.

مىسالى، گارۆارد، كەمبريدج، وكسفورد سەكىلدى ۋنيۆەرسيتەتتەر سالعانىمىزبەن، ءبارىبىر ونداي دەڭگەيگە جەتە المايدى.

- ەندەشە، تاڭداۋ نەلىكتەن پورتۋگالياعا ءتۇستى؟

- ويتكەنى پورتۋگاليا فۋتبولشىلار دايىنداۋ جونىنەن الەمدە الدىنا جان سالماي تۇر. «بەنفيكا» ، «سپورتينگ» اكادەميالارى الەمدىك توپ ۇشتىكتىڭ قاتارىندا.

الەمدىك دامۋ تاجىريبەسى كورسەتكەندەي، الدىمەن ماماندار دايىندالادى. مىسالى، جاپونيا وسىدان 100 -جىل بۇرىن دامىماعان ەلدەر قاتارىنان شىعۋ ءۇشىن الدىمەن بالالارىن ەۋروپا، امەريكاعا ءبىلىم الۋعا جىبەردى. سوسىن سول جاس جەتكىنشەكتەر مامان بولىپ كەلىپ، جاپونيانى كوتەردى. سول سەكىلدى فۋتبولدى دامىتامىز دەسەك، الدىمەن ويىنشىلار دايىنداۋىمىز كەرەك.

ەندى سولاردى دايىندايتىن «فابريكامىز» بولماسا، فۋتبول قايدان بولادى؟ فۋتبولشى دايىندايتىن «فابريكامىز» ءالى جوق. جالپى، قازاقستاندا ءوندىرىس ورىندارى عىلىممەن بايلانىستا دامۋى كەرەك، سوندا عانا ورگە باسادى. جانىندا زەرتحانالارى بولۋى قاجەت. كەرىسىنشە بىزدە اشىلعان وندىرىستەر ارتىنشا جابىلىپ جاتادى. سەبەبى ونىڭ ىرگەتاسىندا عىلىم جوق. ءبىر نارسەنى ەنگىزۋ ءۇشىن ساراپتامالىق قورىتىندى، اپروباتسياسى، ەمپيريكالىق زەرتتەۋ تاسىلدەرى بولۋى كەرەك.

فوتو: كەيىپكەردەن

ال اياقدوپ شەبەرلەرىن دايىنداۋدا الەمدىك رەيتينگتە ءبىرىنشى جانە ەكىنشى ورىندا جۇرەتىن پورتۋگاليانى تاڭداپ، سول جاقتان فۋتبول كلۋبىن اشۋدى جوسپارلادىم. كەيىننەن فۋتبول كلۋبىن اشۋ ەمەس، بۇرىننان جۇمىس ىستەپ كەلە جاتقان، جۇمىس تاجىريبەسى بار، بەكگراۋندى جاقسى، جۇيەسى قالىپتاسقان كلۋبتى ساتىپ الساق پا دەپ شەشتىك. سونىمەن، «براگالونا» فۋتبول كلۋبىنا توقتادىق. كەلىسسوزدەر جۇرگىزىپ، قۇرىلتايشى رەتىندە كىردىك. ەندى سول كلۋب ارقىلى قازاقستان بالالارىنا ەۋروپا فۋتبولىنىڭ قاقپاسىن اشساق پا دەپ وتىرمىز. سەبەبى وسى كۇنگە دەيىن قازاقستاننىڭ جاس ويىنشىلارى ەۋروپا فۋتبول فەدەراتسيالارىنان ليتسەنزيا الا الماي، ەسىكتەرىنەن ەنە الماي ءجۇر. بۇدان كەيىن «براگالونا» ارقىلى ليتسەنزيا الىپ، وزگە ەۋروپا فۋتبول كلۋبتارىنا ترانسفەر جاساۋىنا جەڭىلدىك بولادى. ەندى وسىنداي مۇمكىندىكتى پايدالانىپ، قازاقستان بالالارى پورتۋگاليانىڭ فۋتبول اكادەميالارى مەن كلۋبتارىنا بارۋلارى كەرەك دەپ ويلايمىن.

- كلۋبتىڭ قۇرامىندا قىزدار دا، ۇلدار دا وينايدى ما؟

- كلۋب بولعاندىقتان، وندا ۇلدار مەن قىزدار كومانداسى دا بار. ءبىراق قىزدار عانا پورتۋگاليا كاسىبي فۋتبول ليگاسىنىڭ 3-ديۆيزيونىندا ونەر كورسەتەدى. فۋتبول كلۋبى بولىپ تىركەلۋ ءۇشىن بارلىق كومانداسى بولۋى شارت. جالپى، شارتتارى كوپ. سولاردى ورىنداعاننان كەيىن تىركەلەدى.

- سپورتتىڭ باسقا سالاسىنا ەمەس، نەگە فۋتبولعا نازارىڭىز اۋدى؟

- سەبەبى فۋتبولدىڭ قازاقستان ەكونوميكاسىنا ىقپالى كۇشتى. قازىر ءبىز 100 پايىز دەرلىك ەۋروپا فۋتبولىنىڭ تۇتىنۋشىسىمىز. ەكيپيروۆكا، ترانسفەر، تەلەترانسلياتسيا، بۋكمەكەرلىك كەڭسەلەر ارقىلى ميللياردتاعان قارجى شەتەلگە كەتىپ جاتىر.

فۋتبول - الەمدەگى اۋديتورياسى ەڭ ۇلكەن سالا، ياعني №1-سپورت ءتۇرى بولىپ ەسەپتەلەدى. ەكىنشىدەن، ول ادامنىڭ دەنساۋلىعىن كىشكەنتايىنان شىڭدايدى. بالالار مەن جاستاردىڭ تەرىس ادەت- قىلىقتاردان بويىن اۋلاق سالۋىنا سەپتىگىن تيگىزەدى. يۋنيسەف-تىڭ سوڭعى 10 جىلداعى ستاتسيتيكاسىنا سايكەس، بالالار اراسىنداعى فيزيكالىق جانە پسيحيكالىق اۋرۋلار كۇرت ارتقان. مۇنىڭ سەبەبى مىنادا، تەحنولوگيا دامىعان سايىن دەنە قوزعالىسى باسەڭدەيدى. پاندەميادان كەيىن كومپيۋتەر مەن سمارتفونعا دەگەن تاۋەلدىلىكتىڭ ارتۋى دا اسەرىن تيگىزەدى. ماماندار بالالار اراسىنداعى مۇنداي كەلەڭسىزدىكتەر مەن اۋرۋلارعا قارسى ءدارىنىڭ جوقتىعىنا، ونىڭ جالعىز ەمى سپورت ەكەندىگىنە ەكپىن تۇسىرەدى. سوندىقتان ەۋروپا عالىمدارى فۋتبولدىڭ ادامزات ءۇشىن ماڭىزدىلىعىن العا تارتىپ، وسىناۋ سپورت ءتۇرىن بالالار اراسىندا كەڭىنەن ناسيحاتتاۋعا كوشتى. فۋتبولى دامىعان ەل بولامىز دەسەك، ءبىز دە وسى كوشتەن قالماۋىمىز كەرەك.

- اڭگىمەڭىزگە راحمەت، تالپىنىسىڭىزعا تابىس پەن ساتتىلىك تىلەيمىز.

اۆتور

عايساعالي سەيتاق