فانيدەن وتكەن 5 دونور 19 قازاقستاندىقتىڭ ءومىرىن ساقتاپ قالدى
استانا. قازاقپارات - 2024-جىلدىڭ باسىنان بەرى قازاقستاندا 5 ادام قايتىس بولعاننان كەيىن دونور بولىپ، 19 ادامنىڭ ءومىرىن ساقتاپ قالدى. بۇل تۋرالى ق ر دەنساۋلىق ساقتاۋ مينيسترلىگى مالىمدەدى.
2024-جىلدىڭ 9 ايىنىڭ قورىتىندىسى بويىنشا 6782 قازاقستاندىق قايتىس بولعاننان كەيىنگى دونورلىققا كەلىسىم بەرگەن.
ءار ءتۇرلى ايماقتاردا 5 ادام دونور بولىپ ۇلگەردى:
اقمولا وبلىسى - 2 ادام
پاۆلودار وبلىسى - 1 ادام
تۇركىستان وبلىسى - 1 ادام
الماتى - 1 ادام
دەنساۋلىق ساقتاۋ مينيسترلىگى 4103 ادام، ونىڭ ىشىندە 85 ءى بالالار ورگان ترانسپلانتاتسياسىن قاجەت ەتىپ، كەزەكتە تۇرعانىن اتاپ ءوتتى.
بۇعان دەيىن «قازاقستان حالقىنا» قورىنىڭ ءتوراعاسى بولات جامىشيەۆ قازاقستاندا ءمايىت دونورلىعى ماسەلەسى ايانىشتى حالدە ەكەنىن مالىمدەگەن بولاتىن.
ايتا كەتەيىك، 4 مىڭنان استام قازاقستاندىق دونورلىق ورگان ترانسپلانتاتسياسىنا كەزەكتە تۇر. ستاتيستيكاعا سايكەس، ولاردىڭ كوپشىلىگى كەزەگىنە جەتىپ ۇلگەرمەيدى. 200 گە جۋىعى جىل سوڭىنا دەيىن ءومىر سۇرە المايدى. قايتىس بولعان دونوردىڭ ترانسپلانتاتسياسى باسقا ادامداردىڭ ءومىرىن ساقتاپ قالۋى مۇمكىن، ءبىراق قازاقستاندا قايتىس بولعان دونورلاردىڭ اعزالارىن ترانسپلانتاتسيالاۋعا كوزقاراس ەكى-ۇشتى. كوبىنەسە تۋىستارى الىپ تاستاۋعا كەلىسىم بەرمەيدى. پاۆلودار وبلىسىنداعى ترانسپلانتولوگيا جونىندەگى ۇيلەستىرۋشى دميتري پوتەرەبۋح «قازاقپارات» اگەنتتىگىنىڭ تىلشىسىنە قازاقستاندا قايتىس بولعاننان كەيىنگى دونورلىق تۋرالى ايتتى.