شۆەيتساريالىق ساعات كومپانياسىنىڭ قىزمەتكەرلەرىنە دارەتحاناعا بارۋ مۇڭ بولدى

استانا. KAZINFORM - شۆەيتساريالىق Jean Singer - Cie كومپانياسىنىڭ قىزمەتكەرلەرى دارەتحاناعا بارسا دا ەسەپ بەرۋگە مىندەتتى. سەبەبى، قاجەتىن وتەۋ ءۇشىن از ۋاقىتقا سىرتقا شىعۋدىڭ ءوزى ءۇزىلىس بولىپ سانالادى. مۇنداي ەرەجە كاسىپورىندا جۇرگىزىلگەن تەكسەرۋى كەزىندە بەلگىلى بولدى، دەپ حابارلايدى BILD.

نيەۆشاتەل كانتونىنىڭ ەڭبەك جاعدايلارى باسقارماسى بۇل جۇيەنى قىزمەتكەرلەردىڭ قۇقىعىن بۇزادى دەپ ساناپ، ءىس سوتقا جىبەرىلدى. الايدا Jean Singer - Cie وكىلى كومپانيا قىزمەتكەرلەر اراسىنداعى تولىق تەڭدىككە ۇمتىلادى، سوندىقتان ءۇزىلىس ماقساتتارىن اجىراتپايدى دەگەنمەن كەلىسكەن جوق. اقىرى سوت جۇمىس بەرۋشىنى قولدادى.

وسىدان كەيىن كەيبىر باسقا شۆەيتساريالىق كومپانيالار Jean Singer - Cie مودەلىن ۇلگى ەتىپ الىپ، جۇمىسشىلاردىڭ دارەتحانادا قانشا ۋاقىت وتكىزەتىنىن باقىلاي باستادى. نەمىس زاڭگەرى نيكول مۋچكەنىڭ ساناۋىنشا، مۇنداي ەرەجەلەردى گەرمانيادا زاڭ جۇزىندە ەنگىزۋ مۇمكىن ەمەس.

«گەرمانيادا الدەبىرەۋ دارەتحانا ۇزىلىستەرىنە تىيىم سالىپ نەمەسە ونى قاتاڭ تۇردە رەتتەي الاتىنىن ەلەستەتە المايمىن. ويتكەنى، بۇل ءسوزدىڭ شىن ماعىناسىندا شۇعىل قاجەتتىلىك، ونى شەكتەۋلى دەڭگەيدە عانا باقىلاۋعا بولادى»، - دەپ اتاپ ءوتتى ول.

مۋچكە گەرمانيادا ءاربىر جۇمىس بەرۋشى ءوز قىزمەتكەرلەرىنە قامقورلىق جاساۋعا مىندەتتى ەكەنىن ەسكە سالدى.

«اتاپ ايتقاندا، جۇمىس بەرۋشى قىزمەتكەرلەردىڭ دەنساۋلىعىن ساقتاۋ شارالارىن قابىلداۋعا مىندەتتى. ەگەر جۇمىس بەرۋشى بۇل ەرەجە بۇزسا، ول ءتىپتى گەرمانياداعى قىزمەتكەرلەر كەلتىرىلگەن شىعىندى تالاپ ەتىپ، ارىزدانۋى مۇمكىن»، - دەپ قوستى زاڭگەر.

بۇعان دەيىن Rolex قازاقستاندىق كاسىپكەردى سوتتا جەڭىپ العانى حابارلانعان بولاتىن.

ەسكە سالا كەتسەك، شۆەيتساريانىڭ تاماقتانۋ ماسەلەلەرى جونىندەگى عالىمدار شوكولادتى جاساۋدىڭ جاڭا ءادىسىن ويلاپ تاپتى.

اۆتور
زارينا تۋعانبايەۆا