شۆەيتساريادا ايەلدەر اراسىندا فۋتبولدان ەۋروپا چەمپيوناتى باستالادى
استانا. KAZINFORM - قازىرگى زامانعى ستاندارت بويىنشا ايەلدەر اراسىنداعى 2025-جىلعى ەۋرو - سالىستىرمالى تۇردە كىشىگىرىم جارىس، وعان 16 ايەلدەر قۇراماسى قاتىسادى، ولار ءتورت توپقا بولىنەدى.
ءار توپتاعى ەڭ ۇزدىك ەكى كوماندا پلەي-وفف كەزەڭىنە شىعادى، ول ءۇش كەزەڭنەن تۇرادى: شيرەك فينال، جارتىلاي فينال جانە فينال. تۋرنير 2-شىلدەدەن 27-شىلدەگە دەيىن شۆەيتساريانىڭ سەگىز قالاسىندا وتەدى، دەپ جازدى DW.
ەۋرو-2025 فاۆوريتتەرى قاتارىندا انگليا، يسپانيا جانە گەرمانيا ايەلدەر قۇرامالارى بار. الايدا انگليا كومانداسى كادر ماسەلەلەرىنە تاپ بولدى - بىرنەشە فۋتبولشىسى جاراقاتتانىپ، وزگە دە سەبەپتەرگە بايلانىستى جارىسقا قاتىسپايتىن بولدى. گەرمانيا قۇراماسىندا 2023-جىلعى الەم چەمپيوناتىنداعى ساتسىزدىكتەن كەيىن باپكەرلەر قۇرامى اۋىستى، ال كاپيتان الەكساندرا پوپپ ۇلتتىق قۇراماداعى مانسابىن اياقتادى.
چەمپيوناتتىڭ نەگىزگى جۇلدىزدارىنىڭ ءبىرى - گەرمانيا قۇراماسىنىڭ جاڭا كاپيتانى، «باۆاريا» كومانداسىنىڭ جارقىراعان جارتىلاي قورعاۋشىسى دجۋليا گۆينن. يسپانيا قۇراماسىندا ەكى سوڭعى «التىن دوپ» يەگەرى - جارتىلاي قورعاۋشىلار ايتانا بونماتي مەن الەكسيا پۋتەلياس ەرەكشەلەنەدى، ولاردىڭ كومەگىمەن يسپانيا 2023-جىلى الەم چەمپيونى اتاندى.
ايەلدەر اراسىنداعى 2025-جىلعى ەۋروعا ارنالعان جۇلدە قورى رەتىندە ۋ ە ف ا 41 ميلليون ەۋرو ءبولدى، بۇل الدىڭعى تۋرنيرگە قاراعاندا 6 عا كوپ (16 ميلليون ەۋرو). ۇيىمنىڭ مالىمدەمەسىندە مۇنداي قارجى كولەمىنىڭ ءوسۋى ۋ ە ف ا- نىڭ ەۋروپاداعى ايەلدەر فۋتبولىن دامىتۋعا دەگەن تۇراقتى مىندەتتەمەسىن كورسەتەتىنى ايتىلعان. ەرلەر اراسىنداعى 2024-جىلعى ەۋرونىڭ جالپى جۇلدە قورى 331 ميلليون ەۋرونى قۇرادى، بۇل شامامەن 8 ەسە كوپ.
الدىڭعى ءىرى ايەلدەر فۋتبولى تۋرنيرىندە داۋلى جاعداي بولدى. 2023-جىلعى الەم چەمپيوناتى فينالىنان كەيىن يسپانيانىڭ كورولدىك فۋتبول فەدەراتسياسىنىڭ سول كەزدەگى باسشىسى لۋيس رۋبيالەس فۋتبولشى دجەنني ەرموستى ءسۇيىپ العان. ول جىنىستىق قىسىم جاسادى دەگەن ايىپتاۋدان كەيىن قىزمەتىنەن كەتتى، ءارى كەيىن سەكسۋالدىق زورلىق-زومبىلىق جاساعانى ءۇشىن كىنالى دەپ تانىلدى.
ال جاقىندا فۋتبولدان ايەلدەر اراسىنداعى قازاقستان چەمپيوناتىنىڭ ون ءبىرىنشى تۋرى وتكەن ەدى.